Va ŭzroście 89 hadoŭ pamior amierykanski piśmieńnik, łaŭreat Pulitceraŭskaj premii Kormak Mak-Karci, paviedamlaje Deadline sa spasyłkaj na syna piśmieńnika Džona Mak-Karci.
Jak piša The Guardian sa spasyłkaj na vydaviectva, ź jakim pracavaŭ Mak-Karci, piśmieńnik pamior u svaim domie «z naturalnych pryčyn».
Piśmieńnik byŭ viadomy pierš za ŭsio svaimi ramanami «Daroha», «Kryvavy mierydyjan» i «Starym tut nie miesca» (apošni byŭ ekranizavany ŭ 2007 bratami Koen). Film atrymaŭ čatyry premii «Oskar», u tym liku ŭ naminacyi «Najlepšy film».
Raman Kormaka Mak-Karci «Kryvavy mierydyjan», vydadzieny ŭ 1985 hodzie, uniesieny ŭ śpis «100 najlepšych knih na anhlijskaj movie, vydadzienych u pieryjad z 1923 pa 2005 hod» pa viersii časopisa Time. A ŭ 2006 hodzie The New York Times źmiaściła hety raman na druhoje miesca ŭ śpisie najlepšych amierykanskich ramanaŭ, apublikavanych za apošnija 25 hadoŭ.
Kormak Mak-Karci atrymaŭ Pulitceraŭskuju premiju i premiju Džejmsa Tejta Błeka za raman «Daroha». Jahonyja knihi byli vydadzienyja ŭ 48 krainach śvietu.
Pa infarmacyi Deadline, Mak-Karci byŭ zakrytym čałaviekam i vielmi redka davaŭ intervju.
Letaś «Daroha» Kormaka Mak-Karci była vydadziena vydaviectvam «Januškievič» pa-biełarusku, jaje možna nabyć praz płatformu Allegro.
Kamientary