Fieljeton Lizy Kavalčyk pra vyniki dziciačaha «Jeŭrabačańnia».
— Dobry viečar, Minsk!
— Dobry viečar, Kijeŭ! Minsk na drocie… Senk ju for e vandefuł šou!
— Minsk, što ŭ vas tam z bałami?
— Jak zaŭsiody: 8 bałaŭ Armienii, 10 — Rasii, i narešcie 12 bałaŭ idzie… Kamu b vy dumali?.. Biełarusi!
— Minsk, heta niemahčyma!
— Čamu? Jura ž Dziemidovič ze best — my ŭsie tak i zapisali ŭ esemeskach: śpiavaŭ afihicielna!
— Samim sabie davać nielha!
— Chiba ž my sabie?! My što ž, pravił nie viedajem?! Usio najlepšaje dzieciam! Vy što, dumajecie nam hetaja statuetka z pazałočanaha kaŭčuku patrebnaja?! Usio ž dziela maładoha pakaleńnia… Kijeŭ, miarkujcie sami: makiedoncy dorać bały sierbskim dzieciam, armianie — hruzinskim, hałandcy —niderłandskim. A chto našym dzietkam daść? Vialikaje Kniastva Lichtenštejn? Tak i z čaroŭnym nulikam zastacca možna…
— Minsk, nie vydurniajciesia! Jaki jašče čaroŭny nulik: u vas užo Ksienija Sitnik vyjhravała i jašče tam adzin chłopčyk…
— A ŭ nas płan na piacihodku: adzin dziciačy pieramožca «Jeŭrabačańnia» na kožnyja try miljony nasielnictva.
— Minsk, dyk vas ža dziesiać miljonaŭ, to bok miljon lišni…
— Słuchajcie, Kijeŭ, nu, vy tam u svaim «Jeŭrabačańni» zusim kryvažernyja: vy što, chočacie pazbycca miljona ludziej, zamiest taho, kab prosta dać adnamu čałavieku vyjhrać konkurs?! Što vy jašče nam prapanujecie, dać biełaruskaje hramadzianstva Rybaku, kab na raźmierkavańni ŭ Małych Durkavičach jon narešcie u svaju «Kazku» patrapiŭ?!
— Dobra, Minsk, nie ciśnicie muzyčnym intelektam! 12 bałaŭ ad Biełarusi idzie Biełarusi. Senk ju for e vandefuł šou!