RUP «Minsk Kryštal» u 2010 hodzie pačnie licenzijny vypusk romu i tekiły. Pra heta na pres-kanfierencyi 26 listapada ŭ Minsku paviedamiŭ hienieralny dyrektar pradpryjemstva Leanid Kučaravy.
Rom budzie pastaŭlacca ŭ Biełaruś z Kuby i Vieniesueły, tekiła — ź Mieksiki.
Płanujecca raźlivać pa 5 tys. dał kožnaha vidu pradukcyi ŭ hod. Pieršyja partyi romu i tekiły biełaruskaha raźlivu pastupiać u handal u pieršym paŭhodździ 2010 hoda. Zavod płanuje ŭ dalejšym ekspart hetaj pradukcyi ŭ Rasiju i krainy Jeŭropy.
Jak paviedamiŭ hiendyrektar, pa prahramie impartazamiaščeńnia pradpryjemstva sioleta vypuściła 130 tys. dał kańjaku. Siońnia asartymient hetaj pradukcyi składaje 10 najmieńniaŭ vytrymkaj ad piaci da dziesiaci hadoŭ. Da navahodnich i kaladnych śviataŭ pradpryjemstva vypuściła novyja marki kańjaku: «Kryštal Hłoryja», «Kryštal Ekziupiery» i «Kryštal Hardy». Hetyja kańjaki vypuskajucca z francuzskich śpirtoŭ kampanii Hardy.
Pradpryjemstva pieršym u SND pačało vypuskać šatłandskaje viski.
Abjom vypusku sioleta skłaŭ 20 tys. dał. Taki ž abjom zapłanavany na nastupny hod.
Kučaravy paviedamiŭ, što pradpryjemstva ekspartuje pradukcyju ŭ 15 krain. Sioleta ŭpieršyniu pastaŭlena pradukcyja ŭ Hvinieju. 20 tys. dał harełki pastaŭlena ŭ tureckija hateli sistemy all inclusive. Sioleta płanujecca pastavić na ekspart 150 tys. dał pradukcyi, što na 50% bolš, čym u 2008 hodzie.
***
Zavod zasnavany ŭ 1893 hodzie. Z 1970 hoda «Kryštal» staŭ śpirta-harełačnym kambinatam, a ŭ 1976 hodzie na jaho bazie było stvorana Minskaje vytvorčaje abjadnańnie śpirtavoj i likiora-harełačnaj pramysłovaści. «Minsk Kryštal» śpiecyjalizujecca na vytvorčaści harełki i likiora-harełačnych vyrabaŭ — balzamu, horkich i sałodkich nastojek, likioraŭ, brendzi. Taksama vypuskaje vina pładovyja, vinahradnyja, fruktova-jahadnyja, pitnuju vadu.
