Palitviaźniu Jaŭhienu Prapolskamu dadali da raniejšych vaśmi jašče paŭtara hoda źniavoleńnia

Jaŭhiena zatrymali 29 vieraśnia 2020 hoda. 19 lipienia 2021 hoda palitviaźnia asudzili da 8 hadoŭ kałonii pa spravie «ŭdzielnikaŭ čata». Jaho pryznali vinavatym pavodle č. 1 art. 13 i č. 2 art. 293 KK (padrychtoŭka da ŭdziełu ŭ masavych biesparadkach u Minsku), a taksama č. 1 art. 13 i č. 3 art. 218 KK (padrychtoŭka da naŭmysnaha źniščeńnia abo paškodžańnia majomaści).

Prapolskaha razam ź inšymi fihurantami spravy abvinavacili va ŭdziele ŭ telehram-čacie «radykalnaha napramku». U pakazańniach ahučvalisia niekalki čataŭ — u pryvatnaści, «OHSB» (Otriad hraždanskoj samooborony), «Podrabotka Minsk», «100», «101». Akramia hetaha — u namiery paškodzić abo źniščyć try «Tabakierki».

Na sudzie palitźniavoleny raspavioŭ pra katavańni:

«Mianie prymušali pisać čystasardečnaje pryznańnie na imia načalnika USK. Mnie pahražali, katavali — bili maim elektrašokieram. Dobraachvotna ja nie pisaŭ zajavy. Potym u mianie prablemy sa zdaroŭjem byli: było drenna, kruciłasia hałava, była adbitaja naha».

Termin Prapolskaha nakiravali adbyvać u babrujskuju kałoniju №2. Viadoma, što ad samaha pačatku administracyja kałonii cisnuła na jaho. Pavodle infarmacyi pravaabaroncaŭ, jon pravioŭ nie mienš za 130 sutak u štrafnym izalatary, a taksama na try miesiacy jaho adpraŭlali ŭ pamiaškańnie kamiernaha typu (PKT).

Akramia hetaha, ź inicyjatyvy administracyi kałonii suprać Prapolskaha zaviali kryminalnuju spravu za «złosnaje niepadparadkavańnie patrabavańniam administracyi papraŭčaj ustanovy» (art. 411 KK). Padstavaj dla novaj spravy stali tyja ž «parušeńni» praviłaŭ unutranaha rasparadku (PUR), za jakija Jaŭhien užo adbyŭ pakarańnie ŭ vyhladzie źmiaščeńnia ŭ ŠIZA i PKT.

Pavodle materyjałaŭ spravy, spahnańni byli vypisanyja za toje, što Jaŭhien «lažaŭ na padłozie ŠIZA»; «u kateharyčnaj formie admoviŭsia ad prybirańnia kalidora internata atrada, žyłoj siekcyi, łakalnaj placoŭki»; «admoviŭsia zaniać adviedzienaje jamu spalnaje miesca ŭ žyłoj siekcyi»; «nie pryvitaŭsia pry sustrečy z pradstaŭnikom administracyi ŭstanovy».

Sud nad Jaŭhienam prachodziŭ na vyjaznym pasiedžańni ŭ babrujskaj kałonii. Prapolski na sudzie svajoj viny nie pryznaŭ i paćvierdziŭ, što adnojčy lažaŭ na padłozie kamiery, ale inšych parušeńniaŭ nie dapuskaŭ. Z nakładzienymi na jaho dyscyplinarnymi spahnańniami ŭ vyhladzie «sutak» u štrafnym izalatary jon nie zhodny, ale ich nie abskardziŭ.

3 traŭnia 2023 hoda sudździa Pavieł Karcinin pryznaŭ palitviaźnia vinavatym pavodle art. 411 Kryminalnaha kodeksa i pryznačyŭ jamu ŭ dadatak da vaśmi hadoŭ kałonii jašče paŭtara hoda pazbaŭleńnia voli.

Z ulikam adbytaha terminu i novaha prysudu na pačatak traŭnia Jaŭhienu zastavałasia adbyć u źniavoleńni piać hadoŭ i šeść miesiacaŭ.

Jaŭhien novaha prysudu nie abskardžvaŭ, tamu ŭžo naprykancy traŭnia jaho pieraviali ŭ mazyrskuju kałoniju №20. Pavodle infarmacyi pravaabaroncaŭ, z 14 červienia ad jaho nie było anijakich viestak.

• 0
• 0
• 0
• 0
• 0
• 0
• 13
• 0