Biełaruś i Italija hatovy vyjści na novy etap supracoŭnictva nie tolki pamiž dziaržavami, ale i pamiž pradpryjemstvami, zajaviŭ prezident Biełarusi Alaksandr Łukašenka 30 listapada ŭ Minsku, adkryvajučy sustreču z premjer‑ministram Italii Silvijo Bierłuskoni ŭ vuzkim kole.
Łukašenka nahadaŭ, što damoŭlenaść ab pryjeździe Bierłuskoni ŭ Minsk była dasiahnuta padčas jaho vizitu ŭ Italiju. «Vielmi dobra, što paśla našaj sustrečy ŭ Rymie prajšło paru miesiacaŭ. Za hety čas nas naviedali niekalki italjanskich palitykaŭ i biźniesmienaŭ. Stan spraŭ u biełaruska‑italjanskich adnosinach dazvalaje kazać pra toje, što zroblena vielmi šmat», — skazaŭ Łukašenka.
Silvijo Bierłuskoni zaznačyŭ, što asabista sadziejničaŭ jak vizitu ministra zamiežnych spraŭ Italii Franka Fracini ŭ Biełaruś, hetak i ŭzrastańniu cikavaści italjanskich pradpryjemstvaŭ da Biełarusi. Pavodle słoŭ Bierłuskoni, jaho ciapierašni vizit moža dać «mocny impuls dla raźvićcia italjanska‑biełaruskich adnosinaŭ va ŭsich śfierach».
Bierłuskoni zaznačyŭ, što na siońniašniaj sustrečy płanujecca abmierkavać arhanizacyju i vizit misii italjanskich pradprymalnikaŭ u Biełaruś.
«Dumaju, što ja zmahu ŭznačalić hetuju misiju. Siońnia my možam abmierkavać kankretnyja temy, jakija mohuć być zakranutyja padčas vizitu našych pradprymalnikaŭ. U našych adnosinach my možam zrabić značna bolš»,— padkreśliŭ Bierłuskoni.
Premjer‑ministr paviedamiŭ, što pa vynikach pieramoŭ płanujecca padpisańnie pahadnieńnia ab handlova‑ekanamičnym supracoŭnictvie, a taksama pahadnieńnie ź italjanskim kancernam «Finmiekanika», jakoje «adkryje vialikija pierśpiektyvy dla supracoŭnictva».
Bierłuskoni taksama zaznačyŭ, što Italija zacikaŭlena ŭ supracoŭnictvie ź Biełaruśsiu ŭ śfiery budaŭnictva. Jon padkreśliŭ, što ŭ Biełarusi budujecca šmat žylla, a ŭ Italii jość «technałohii, jakija dazvalajuć chutka budavać damy».
