Chronika

Dyjana Čarkasava i Ŭładzimier Mialeška, maci i ajčym zabitaj žurnalistki Vieraniki Čarkasavaj, začytvajuć list ad unuka Antona Filimonava, jaki znachodzicca ŭ SIZA pa padazreńni ŭ padrobcy hrošaj. Raniej Antona sprabavali źvinavacić u zabojstvie maci.

«Narodnuju volu» biaruć na zmor

3 studzienia milicyjanty Dubrovienskaha rajadździełu zatrymali na rasiejskaj miažy ŭvieś nakład hazety «Narodnaja Vola». Vydańnie vyzvalili praz sutki.

9 studzienia ŭ Rudni na biełaruska-rasiejskaj miažy znoŭ zatrymali nakład čarhovaha numaru «NV». Jaho los na momant zdačy numaru nia byŭ vyrašany. Redaktar «NV» Jazep Siaredzič źviarnuŭsia ź listom da Alaksandra Łukašenki z prośbaj źlitavacca nad hazetaj.

Represii suprać kamunistyčnych aktyvistaŭ

Aktyvista PKB Anatola Iljinčyka zatrymali ŭ Homieli 31 śniežnia, kali jon raskładaŭ pa paštovych skryniach hazetu «Tovariŝ» i ŭlotki pra Milinkieviča.

Kala Žłobina 5 studzienia DAI zatrymała aŭtamabil aktyvista PKB Valera Rybčanki j kanfiskavała 10 800 kalandarykaŭ z vyjavaj A.Milinkieviča. 6 studzienia DAI zatrymała ŭ Homieli mašynu Andreja Kary j kanfiskavała 20 tys. analahičnych kalandarykaŭ.

Nia vyrvu, dyk patorhaju

Alaksandra Aŭsiajenku, pradstaŭnika inicyjatyŭnaj hrupy A.Milinkieviča ŭ Pinsku, zatrymali 3 studzienia dvojčy: śpiarša źvinavacili ŭ falšyvym paśviedčańni, a potym zapatrabavali na pravierku papiery . 4 studzienia jaho zatrymali, źvinavaciŭšy ŭ «antysanitaryi»: padstavaj milicyjanty paličyli stoł, kresła j papiery źbiralnika podpisaŭ.

U Baranavičach 6 studzienia milicyja praviała pieratrus na kvatery Ŭładzimiera Hundara, źbiralnika podpisaŭ za A.Milinkieviča, pry adsutnaści haspadara: u jaho zabrali na ekspertyzu arhtechniku pavodle kryminalnaj spravy, raspačataj u 2000 h. Hundara padazrajuć u kradziažy.

4 studzienia ŭ Słucku Ału Piatrovu vyklikali ŭ milicyju: načalnika HRUUS cikaviła rabota inicyjatyŭnaj hrupy A.Kazulina.

Studentaŭ Dziaržaŭnaha instytutu kiravańnia j sacyjalnych technalohij BDU Volhu Štućko j Antona Paharcava, aktyvistaŭ hrupy A.Kazulina, 4 studzienia papiaredziŭ namieśnik dekana pa vychavaŭčaj rabocie, kab nie źbirali podpisy ŭ studenckich internatach.

Inicyjatyŭnaj hrupie Z.Paźniaka 5 studzienia nie dali źbirać podpisy ŭ pierachodach kala metro.

9 studzienia ŭ Kalinkavičach Alaksiej Manievič i Dzianis Rabianok, źbiralniki podpisaŭ z hrupy A.Milinkieviča, padali skarhu rajonnamu prakuroru na milicyjantaŭ: napiaredadni ŭzbrojenyja aŭtamatami milicyjanty zatrymali ich, nie zvažajučy na paśviedčańni Centravybarkamu.

U Žodzinie

Žodzinskija ŭłady 26 studzienia pastanavili pazbavić rehistracyi haradzkuju filiju TBM. Aficyjnaja padstava — adsutnaść juradrasu.

U Śvietłahorsku

Śvietłahorski rajsud 30 śniežnia prysudziŭ Telmanu Maślukovu štraf u 15 bazavych adzinak (435 tys. rub.) za parušeńnie paradku raspaŭsiudu drukavanych vydańniaŭ. 6 studzienia milicyjanty zatrymali sp.Maślukova na vulicy j kanfiskavali ŭ jaho 297 asobnikaŭ hazety «Rehijanalnyja naviny» i 1289 navahodnich paštovak ź vinšavańniem ad A.Milinkieviča.

4 studzienia ŭ sudzie Śvietłahorsku Mikałaju Michalkieviču prysudzili štraf u 170 tys. rub. za ŭdzieł 16 śniežnia ŭ Dni salidarnaści.

Palakam pa šapcy

Hałoŭnaha redaktara časopisu «Głos znad Niemna na uchodzstwie» Andžeja Pisalnika j hałoŭnaha redaktara časopisa «Magazyn Polski» Andreja Pačobuta aštrafavali 5 studzienia na 10 b.v. kožnaha (290 tys.) — za parušeńnie paradku pierabyvańnia ŭ pamiežnaj zonie: 26 śniežnia ich zatrymali kala Sapockina, što ŭ Haradzienskim rajonie.

Narodny kantrol vočy kole

Aktyvistcy apazycyi Maryi Bahdanovič 5 studzienia prakuror Čyhunačnaha rajonu Homielu Ramaniuk vynies aficyjnaje papiaredžańnie za abrazu sudździ: jaje vinavaciać u vyrabie ŭlotak «Narodny kantrol» z krytykaj sudździ Kazačka, jaki aštrafavaŭ žančynu za raspaŭsiud ulotak suprać rostu płaciažoŭ.

Prafsajuz na «Azocie» zapałochvajuć

Aktyvisty Biełaruskaha niezaležnaha prafsajuzu z AAT «Horadnia-Azot» 5 studzienia paviedamili, što dyrektar pradpryjemstva daŭ zahad u 3-dzionny termin «vyrašyć pytańnie» z BNP. Načalniki cechaŭ vyklikajuć čalcoŭ prafsajuzu j prymušajuć pisać zajavy pra vychad z arhanizacyi: u pieršy dzień zajavy padali 40 čałaviek. Supołka BNP na «Horadni-Azocie» naličvała 800 čalcoŭ, a jaje lider Siarhiej Antusievič karystajecca takim aŭtarytetam, što jaho abrali deputatam harsavietu.

I paśla hetaha ŭłady buduć dakazvać, što nie ŭciskajuć pravoŭ prafsajuzaŭ.

Levanieŭski haładaje

Valer Levanieŭski 7 studzienia abviaściŭ haładoŭku pratestu: jon patrabuje admianić niespraviadlivyja spahnańni z boku administracyi Ivacevickaj kalonii — zabaronu na sustreču ź siamjoj, na pieradačy j kuplu praduktaŭ u turemnaj kramie.

Fota photo.bymedia.net

• 0
• 0
• 0
• 0
• 0
• 0
• 0
• 0