U Biełaviežskaj puščy ŭpieršyniu vyjavili samuju maleńkuju kvietkavuju raślinu ŭ śviecie
Supracoŭnikami navukovaha adździeła Biełaviežskaj puščy pry praviadzieńni palavych daśledavańniaŭ u Karalova-Mastoŭskim laśnictvie była vyjaŭlenaja samaja maleńkaja kvietkavaja raślina na Ziamli — volfija bieskaraniovaja. Pra heta paviedamlaje sajt Nacyjanalnaha parku, padkreślivajučy, što «heta novy dla fłory Biełaviežskaj puščy vid, jaki raniej tut nie fiksavaŭsia».
Volfija bieskaraniovaja, ci pa-navukovamu Wolffia arrhiza (L.) Horkel ex Wimm., — samaja maleńkaja vodnaja kvietkavaja raślina na našaj płaniecie, «takaja raślina-liliput». Vonkava jana vyhladaje jak drabniutkija sakavita-zialonyja, ledź vyciahnutyja «šaryki», jakija pamieram mienšyja za 1 milimietr.
U volfii jość mikraskapičnyja kvietki, chaj prymityŭnyja i nieprykmietnyja, ale samyja sapraŭdnyja i paŭnavartasnyja. Praŭda, va ŭmovach Biełarusi ćvicieńnia hetaha vidu pakul nie adznačałasia.
Volfija — raślina ŭ Biełarusi davoli redkaja, jana sustrakajecca tolki na samym poŭdni Biełarusi — u Bresckaj i Homielskaj abłaściach. U Čyrvonaj knizie Biełarusi jana ŭniesienaja ŭ śpis raślin, jakija majuć patrebu ŭ prafiłaktyčnaj achovie.
Mižnarodny sajuz achovy pryrody taksama ŭklučyŭ jaje ŭ svoj śpis vidaŭ, jakija znachodziacca pad pahrozaj źniknieńnia (IUCN Red List) u katehoryju LC. Heta značyć vid, jaki vyklikaje najmienšuju aściarohu.
Kamientary