Biełaruskija pravaabaroncy 10 śniežnia pieradali ŭ Administracyju prezidenta zvarot z prośbaj admianić u Biełarusi śmiarotnuju karu.
Jak havorycca ŭ zvarocie, Biełaruś — adzinaja kraina ŭ Jeŭropie i na postsavieckaj prastory, dzie zachoŭvajecca śmiarotnaja kara, vynosiacca i pryvodziacca ŭ vykanańnie śmiarotnyja prysudy.
«Śmiarotnaja kara maje niezvarotny charaktar. Pazbaŭleńnie žyćcia nie tolki nie papravić učynienaha złačyncam dziejańnia i nie adnović spraviadlivaść, ale i nie zmoža pryvieści jaho da raskajańnia, uśviedamleńnia svajoj viny. Akramia taho, nielha vyklučać sudovych pamyłak, što pahražaje śmiarotnaj karaj niavinnych ludziej — i heta ŭžo było ŭ historyi Biełarusi. U vypadku śmiarotnaj kary papravić sudovuju pamyłku i viarnuć žyćcio čałavieku niemahčyma», — adznačajuć aŭtary zvarotu.
Pad dakumientam padpisalisia takija viadomyja ŭ Biełarusi ludzi, jak staršynia Viarchoŭnaha Savieta 12‑ha sklikańnia, hienierał‑lejtenant milicyi Miečysłaŭ Hryb, viadomyja tele‑ i radyjoviadučyja Zinaida Bandarenka, Tamara Lisickaja i Kaciaryna Pytleva, piśmieńniki Uładzimir Arłoŭ, Śviatłana Aleksijevič, Adam Hłobus, Andrej Chadanovič, muzykanty Lavon Volski, Viktar Rudenka, Uładzimir Puhač, Kasia Kamockaja, Źmicier Vajciuškievič, a taksama pradstaŭniki ŭsich pravaabarončych arhanizacyj, jakija dziejničajuć na terytoryi Biełarusi. Usiaho zvarot padpisali 35 čałaviek.
Jak paviedamiła pravaabaronca Iryna Toŭścik, kampanija «Pravaabaroncy suprać śmiarotnaj kary» pačałasia 26 studzienia. Metaj akcyi źjaŭlajecca spynieńnie prymianieńnia śmiarotnaj kary ŭ krainie i dałučeńnie Biełarusi da ahulnajeŭrapiejskich kaštoŭnaściaŭ. «Na praciahu hoda my nie tolki źbirali podpisy viadomych u Biełarusi ludziej, ale i zapisvali videasiužety, u jakich jany abhruntoŭvali nieabchodnaść admieny śmiarotnaj kary. My spadziajemsia, što da nas prysłuchajecca nie tolki Administracyja prezidenta, ale i parłamient Biełarusi, kudy budzie adpraŭlena kopija hetaha zvarotu», — skazała Toŭścik.
«My nie hnalisia za kolkaściu padpisantaŭ — my źviartali ŭvahu na jakaść, na ich vahu ŭ hramadstvie. Ja spadziajusia, kali ludzi daviedajucca, što ich kumiry padpisalisia pad zvarotam, jany źmieniać svajo staŭleńnie da śmiarotnaj kary», — adznačyła Toŭścik.
Pavodle jaje słoŭ, hałoŭnaja meta hetaj kampanii — damahčysia maratoryju na prymianieńnie śmiarotnaj kary ŭ Biełarusi, a paśla admianić jaje naohuł.
Kamientary