Fota: sacsietki śpiavački Anastasii Kraŭčanka
Dziaŭčyna prymała ŭdzieł u pieršym siezonie biełaruskaha šou «Faktar.by» i apynułasia ŭ kamandzie Siarohi. Ale papularnaj stała paśla taho, jak śpieła pieśniu «Ramonki» na rasijskim šou «Zalataj u trendy», a potym vykłała ŭ tyktoku niekalki ŭryŭkaŭ vystupu. Prypieŭ zavirusiŭsia, šmat chto pačaŭ zdymać videa pad hetu muzyku — a roliki Anastasii nabrali 5,5 i 5,9 miljona prahladaŭ. Darečy, na jutubie ŭ pieśni «Ramonki» 2,2 miljona prahladaŭ.
Zaraz dziaŭčynie 19 hadoŭ, i jana studentka treciaha kursa Instytuta teałohii BDU, a taksama pracuje ŭ Biełteleradyjokampanii (u ciapierašni momant jak viadučaja zdymajecca ŭ trecim siezonie «Faktar.by», viadzie instahram i tyktok prajekta, a ŭ jaje pracoŭnaj knižcy paznačana, što Anastasija — redaktar prahram) i rehularna ŭdzielničaje ŭ praŭładnych kancertach.
Jak pryznałasia sama śpiavačka ŭ intervju adyjoznaj «Minskaj praŭdzie», sumiaščać aktyŭnaje žyćcio z vučobaj u VNU składana:
«U hetym navučalnym hodzie ja va ŭniviersitecie była na dźviuch parach. U hetym płanie mnie pajšli na sastupki, dazvolili svabodnaje naviedvańnie. Ja nie chaču, kab da mianie stavilisia jak da zorki.
U lubym vypadku, nieabchodny minimum dla zdačy siesii ja vykonvaju. Treba padrychtavać refierat ci prezientacyju da ekzamiena — ja heta zaŭsiody rablu. Nie dazvalaju sabie takoha: «Ja pryjšła — staŭcie zalik».
Ale čamu dziaŭčyna vyrašyła pastupać na teołaha?
«Šmat kancertaŭ prachodzić u Pałacy Respubliki, a budynak majho ŭniviersiteta jakraz nasuprać, — raspaviała Anastasija. — Mnie telefanujuć: «Praź dziesiać chvilin tvoj vychad» — i ja spakojna idu. Nasamreč, heta nie pieršaradna».
Kali Anastasija vučyłasia ŭ dziasiatym kłasie, pačałasia pandemija karanavirusu. Nastaŭniki źnizili patrabavańni i dziaŭčynu, jakaja ličyła sabie vielmi starannaj vučanicaj (bo mama nastaŭnica), heta rassłabiła. U adzinaccatym kłasie dziaŭčyna zrazumieła, što nie choča rychtavacca da ŭstupnaj kampanii. Tamu stała šukać, kudy moža pastupić, zdaŭšy toje, što dobra viedaje — ruskuju movu i hramadaznaŭstva. Abituryjentam Instytuta teałohii BDU patrebna było zdać i historyju Biełarusi — z hetym pradmietam u Anastasii, pa jaje słovach, byli składanaści, ale jana ŭsio ž zmahła stać studentkaj (prachadny bał na śpiecyjalnaść «teałohija» ŭ 2021 hodzie byŭ 244 z 400).
«Hramadaznaŭstva ja zdała, zdajecca, na 78 bałaŭ, a ruskuju movu — na 82. Liču, što dla čałavieka, jaki nie rabiŭ ničoha ŭvohule, heta vielmi dobra».
Anastasija chvalujecca nakont budučaha raźmierkavańnia i spadziavajecca, što joj dazvolać adpracavać u Biełteleradyjokampanii.
«Ja razumieju, što nikoli nie budu pracavać pa śpiecyjalnaści. Mnie zaraz praciahnuli kantrakt — na toj momant, kali ja skonču VNU, aficyjna budu supracoŭnicaj Biełteleradyjokampanii. I kudy mianie raźmiarkoŭvać? Nikudy. Ja ž pracuju ŭ dziaržaŭnaj struktury. I ŭvohule — teałahičny fakultet daje vyšejšuju humanitarnuju adukacyju. Mnie zdajecca, heta dobra pasuje dla telebačańnia. Usio jak treba. Spadziavajusia, što ŭsio vyrašycca pryhoža».
Čytajcie taksama:
Buzava paśliznułasia i zvaliłasia na «Minsk-arenie». Ani Ejsmant, ani Pryhožyn nie padchapili jaje
U muzyčnym šou «Faktar.baj» na BT pieramoh udzielnik z Rasii
Buzava, Siaroha i Alachno: na BT nazvali imiony viadučych biełaruskaha Ch-faktara
