Rasijskija deputaty prapanujuć pierajmienavać siało Šałava, bo z-za nazvy jano vymiraje. Miascovyja žychary kažuć, što pryčyna inšaja
Vice-śpikier rasijskaj Dziarždumy Uładzisłaŭ Davankoŭ i deputat ad partyi «Novyja ludzi» Anton Tkačoŭ unieśli zakonaprajekt, jaki zabaraniaje vykarystoŭvać «abraźlivyja» nazvy nasielenych punktaŭ, jakija «prynižajuć hodnaść žycharoŭ». Jany ŭpeŭnienyja, što hetym samym jany zaachvociać ludziej z hetych miascovaściaŭ nie źjazdžać, piša «Mieduza».
«Niadaŭna da nas pryjšoŭ list ź vioski Šałava. Jość takaja ŭ Jarasłaŭskaj vobłaści. Ludzi skardziacca, što nijak nie mohuć źmianić nazvu nasielenaha punkta. Žychary susiednich haradoŭ ź ich śmiajucca. Moładź źjazdžaje, imknučysia chutčej źmianić prapisku. Nichto nie choča, kab u pašparcie ŭ ich dziaciej krasavałasia kryŭdnaje słova. U takich nasielenych punktach žyvuć tysiačy ludziej», — zajaviŭ Davankoŭ.
U dakumiencie, vystaŭlenym na razhlad, prapanujecca dazvolić pradstaŭničym orhanam municypalnych utvareńniaŭ prymać rašeńni pa pierajmienavańni nasielenych punktaŭ biez uzhadnieńnia ź inšymi orhanami vykanaŭčaj ułady.
U jakaści prykładaŭ «abraźlivych» nazvaŭ deputaty pryvodziać vioski i sioły Łoch (Sarataŭskaja vobłaść), Antyłochava (Ivanaŭskaja vobłaść), Šałava (Jarasłaŭskaja vobłaść), Musorka (Samarskaja vobłaść), Pukava (Ćviarskaja vobłaść), Popki (Pskoŭskaja vobłaść) i Buchałava (vioski z takoj nazvaj jość u roznych rehijonach).
Praŭda, u samich nasielenych punktach z takimi nazvami ideju deputataŭ nie padtrymali. Kiraŭnik administracyi Vielikasielskaha pasielišča Jarasłaŭskaj vobłaści (tam znachodzicca Šałava) Vital Vadapjanaŭ zajaviŭ, što «nie čuŭ «ni skarhaŭ na nazvu ad žycharoŭ vioski, ni «niejkich kpin z susiednich viosak». A što nasielnictva źmianšajecca, to heta sapraŭdy tak, ale pryčyna hetamu zusim inšaja, jakuju tak prosta nie vyrašyš.
«Deputatam treba spuścicca na ziamlu… Adna z pryčyn, čamu ludzi nie vybirajuć dla žyćcia takija nasielenyja punkty, — heta jakraz adsutnaść infrastruktury, daroh, miedpunktaŭ, aptek. Heta ŭ pieršuju čarhu kamfort.
Ja b paraiŭ lubym deputatam lubych frakcyj i abjadnańniaŭ usio-taki źviartać uvahu na jakaść žyćcia takich nasielenych punktaŭ, na ich finansavańnie, tamu što ŭ nas u asnoŭnym iduć prablemy z-za štohadovaha niedafinansavańnia, a nie ad nazvaŭ».
Inšyja kiraŭniki miascovych administracyj sa svaim kaleham salidarnyja. U Popkach «nie bačać ničoha strašnaha ŭ naźvie», tolki «časam pra heta žartujuć», a žychary Łocha «hanaracca hetaj nazvaj». I ličać, što deputatam Dziarždumy prosta niama čym bolš zaniacca.
Kamientary