Biełaruskaj reptylii ščemiać chvost z roznych bakoŭ

Minsk atrymaŭ tryvožnyja zvanočki jak z zachadu, tak i z uschodu. 17 śniežnia Jeŭraparłamient pryniaŭ žorstkuju rezalucyju pa Biełarusi. A nazaŭtra rasijski vice-premjer Ihar Siečyn daŭ zrazumieć, što ŭ enierhietyčnym supracoŭnictvie idylijaj i nie pachnie. Jaho zajavy možna rascanić jak miahka ŭpakavany ŭltymatum.

Paśla 10 śniežnia, kali biełaruskaja delehacyja šmathadzinnaj asadaj brała Kreml na zmor, niekatoryja analityki zahavaryli pra reniesans adnosin pamiž Minskam i Maskvoj.

Dziažurny aptymist «sajuznaha budaŭnictva» Pavieł Baradzin puściŭ pahałosku pra tanny haz: maŭlaŭ, naleta biełarusam daduć jaho pa starym ceńniku. A biełaruski vice-premjer Uładzimir Siamaška anansavaŭ atrymańnie ŭ 2010-m 8–9 miljonaŭ ton biaspošlinnaj rasijskaj nafty dy inšyja padarunki ad Kramla. Kštałtu addaleńnia da 2014–2015 hoda roŭnadachodnych (čytaj: sapraŭdy rynkavych) cen na błakitnaje paliva.

Uvohule, taho-siahopad vybary Kreml, zdajecca, paabiacaŭ padkinuć. Ale dośvied nieprazrystych dačynieńniaŭ pamiž zaklatymi chaŭruśnikami vučyć nie śpiašacca z vysnovami, pakul damoŭlenaści nie zafiksavany na papiery. Dy i paśla padpisańnia papier usialakaje zdarałasia: miehatony sajuznaj makułatury nie pracujuć.

I voś vam zvanočak. 18 śniežnia ŭ Sankt-Pieciarburhu rasijski vice-premjer Ihar Siečyn faktyčna dezavujavaŭ kalehu Siamašku.

Stary paplečnik Pucina, čałaviek z surovaj reputacyjaj «kramloŭskaha naftavika», jakomu ciapier daručana vyrašać enierhietyčnyja pytańni ź Minskam, zajaviŭ žurnalistam, što jaho kraina prapanavała Biełarusi biaspošlinna tolki 5–6 miljonaŭ ton nafty dla ŭnutranaha spažyvańnia. I basta!

Heta navat mienš, čym praduhledžvali raniejšyja damoŭlenaści, dasiahnutyja paśla naftahazavaj vajny na pačatku 2007-ha. Zvyš taho, pavodle Siečyna,

z 1 studzienia anulujecca lhotnaje (z panižalnym kaeficyjentam) myta na astatniuju naftu dla Biełarusi (kapiec afšoru!). Dyj haz chacia i nienašmat, ale padaražeje.

Voś tabie, babula, i Jurje!

Vožyku zrazumieła, što Maskva kali i abiacała prymalnyja ceny na enierharesursy, to zusim nie za pryhožyja vočki. Niezdarma Łukašenka paśla vizitu ŭ biełakamiennuju maŭčyć jak ryba. Pra tryŭmf, budźcie ŭpeŭnieny, my b užo viedali. A tak vyhladaje na toje, što padkinuta zadačka bolš składanaja za japonski skanvord.

U pryvatnaści, nie sakret, što rasijcy chočuć uleźci ŭ biełaruskuju naftanku. Tutejšaje ž kiraŭnictva, zdavałasia b, i nie suprać zbyć chvatkim uschodnim partnioram častku familnaha srebra (kštałtu akcyj kompleksu «Naftan-Palimir»). Ale zvykła zahinaje palcy, vystaŭlajučy viejer krutych umoŭ. Maskva ž, naturalna, źbivaje canu. Akramia taho, jana nie suprać zavałodać kantrolnym pakietam «Biełtranshaza».

Takim čynam, biełaruskamu boku vykručvajuć ruki. A prefierencyi, ab jakich rastrubili viestuny-aptymisty, jašče viłami pa vadzie napisanyja.

Ź inšaha boku, u Jeŭraźviazie, padvodziačy vyniki hoda novaj, hnutkaj palityki ŭ biełaruskim pytańni, krychu źbiantežana čuchajuć repu. Bo žadany demakratyčny prahres u tutejšym byćci mohuć razhledzieć chiba što cieraz nu vielmi mocnuju łupu. Karaciej,

na fonie raniejšaha ptušynaha ščabiatańnia jeŭračynoŭnikaŭ Jeŭraparłamient uziaŭ dyj vydaŭ na-hara dastatkova niepryjemnuju dla biełaruskich uład rezalucyju.

Na finišy hoda ŭ dyjałohu Minska z Brusielem paviejała ledzianym choładam. Pryčym, jak vykazaŭsia jeŭraparłamientar Jacek Pratasievič, «marazy ŭ Jeŭropu pryjšli z uschodu».

Palitołah Valer Karbalevič schilajecca da vysnovy, što

navat butaforskaj libieralizacyi ŭ krainie nastupaje kaniec. Hod vybaraŭ: tut užo nie da revieransaŭ pierad zachodnikami.

Sapraŭdy, jość simptomy. Z rezkaj zajavaj — maŭlaŭ, niama čaho toj Jeŭropie sprabavać nas nachilać, nakidajučy svaju traktoŭku demakratyi — vystupiŭ niadaŭna kiraŭnik prezidenckaj administracyi Uładzimir Makiej. Toj, kaho ES ličyŭ jakraz architektaram dyjałohu z hetaha boku.

I voś śviežaja zajava deputata Siarhieja Maskieviča: Pałata pradstaŭnikoŭ ličyć dyskryminacyjnym prapanavany Jeŭraparłamientam paradak farmavańnia biełaruskaj delehacyi ŭ Jeŭraneście (chto nie viedaje: tak paetyčna nazvali zadumanuju parłamienckuju asambleju «Uschodniaha partniorstva»). Kasa na kamień?

«Dla Minska vielmi niepažadana ŭ hod vybaraŭ apynucca pamiž rasijskim mołatam i zachodnim kavadłam, — havoryć biełaruski palityčny analityk Andrej Fiodaraŭ. — Składvać jajki ŭ adzin tolki kramloŭski košyk kiraŭnictva Biełarusi nie stanie».

Pavodle jaho prahnozaŭ, masty ŭ dačynieńniach ź Jeŭraźviazam spalvacca nie buduć. I peŭnyja drobnyja ŭstupki zachodnikam u 2010 hodzie ŭsio ž mahčymyja. Nu, skažam, prapuściać 10–20 apazicyjanieraŭ u pieryfieryjnyja miascovyja saviety. U toj ža čas, mahčyma,

daviadziecca «praź nie chaču» achviaravać štości i Maskvie, ličyć ekśpiert.

Kaniečnie, rasprodaž familnaha srebra niebiaśpiečny. Rasija cichaj sapaj ukaraniajecca ŭ biełaruskuju ekanomiku ŭsio hłybiej. Zvyš taho, pryvatyzacyja, rastavańnie ajśbierha dziaržaŭnaj ułasnaści — heta samo pa sabie jość strataj zvykłaha bazisu dla biełaruskaj administracyjnaj sistemy. Ale

daviadziecca achviaravać častkami dziela cełaha. Tak jaščarka adkidvaje chvost, kab acaleć u pryncypie. Zvyšzadača ž biełaruskaha režymu — samazachavańnie ŭ piersanalnym abliččy.

Zrešty, i tut čas niaŭmolny. Piersanalii nie viečnyja, kolki ni pierarablaj pad siabie Asnoŭny dy inšyja zakony. Jak adznačaje Vital Silicki, dyrektar Biełaruskaha instytuta stratehičnych daśledavańniaŭ, užo sama prablema pieradačy ŭłady pa miery aktualizacyi budzie padšturchoŭvać da drejfu ŭ bok bolš tonkich unutrypalityčnych miechanizmaŭ. Da niejkaha varyjantu kiravanaj demakratyi.

Hałoŭny ž vorah mifałahizavanaj «biełaruskaj madeli» — ekanomika ź jaje niaŭmolnymi zakonami.

Śviežyja zajavy Siečyna — lišniaja prykmieta taho, što Rasija maje namier patrabavać mnostva kankretnych pasłuh, vialikich i małych, za kožny skormleny vitamin. Durnicy nie budzie adnaznačna.

Rasijskija tuzy pamiatajuć, jak im tut šmat čaho abiacali jašče pierad pazaminułymi vybarami, a potym rabili prastadušny tvar: dy nie, vy nas nie tak zrazumieli! Ciapier buduć presinhavać biez papiaredniaj apłaty.

Možna, kaniečnie, na radaść elektaratu nadrukavać niekalki lišnich vahonaŭ hrošaj-fancikaŭ pad vybary. Ale potym heta vylezie bokam.

Kredyty? Dyk užo nabiehła 20 miljardaŭ dołaraŭ sukupnaj zamiežnaj zapazyčanaści, i zaraz rakavaj puchlinaj papruć vypłaty pa pracentach.

Nijaki mytny źviaz nie dapamoža zbyvać u raniejšych abjomach na ŭschodnija rynki pradukcyju našych monstraŭ sacyjalistyčnaj industryi. Kajf na rasijskaj enierhaihołcy taksama vyłazić bokam: my ŭsio bolš adstajom ad śvietu technałahična.

Uvohule, chacia na siońnia ŭ krainie ŭsio schoplena, novaja kadencyja abiacaje vialikija hałaŭnyja boli aficyjnamu lideru Biełarusi. Zrešty, jak i jaho ciarplivamu narodu.

Va ŭsiakim razie,

naviersie nutrom čujuć, što składvać palityčnyja jajki ŭ adzin košyk nadta nieabačliva. Daviadziecca, chalera, vyličvać praporcyi.

Alaksandr Kłaskoŭski.

• 0
• 0
• 0
• 0
• 0
• 0
• 0
• 0