U Kramli ličać, što Biełaruś štučna zaciahvaje rašeńnie pytańnia pra ceny na rasiejski haz.
«Biełaruś ciešyć siabie iluzijami, što zmoža niešta źmianić u pazycyi Hazpromu što da cany na haz, jaki pastaŭlajecca ŭ hetuju krainu», - raskazała RIA NOVOSTI vysokapastaŭlenaja krynica ŭ Kramli.
Jana adznačyła, što prapanovy pa canie rasiejskim bokam, u tym liku premjer-ministram Michaiłam Fradkovym, kiraŭnikom Hazpromu Alaksiejem Mileram, byli ahučanyja daŭno, ale adkazu z boku Biełarusi tak i niama.
«Palityčnymi metadami prablemu hazu ni ŭ hetym, ni ŭ inšym vypadku vyrašyć nia ŭdasca», - skazała krynica.
Rasieja planuje pastaŭlać Biełarusi haz u 2007 hodzie pa canie prykładna 180-200 dalaraŭ za tysiaču kubametraŭ. Takija źviestki padadzienyja ŭ liście namieśnika kiraŭnika Minpramenerha Rasiei Andreja Dziamiencieva, nakiravanym u Dziarždumu ŭ adkaz na zapyt adnosna abhruntavanaści zaplanavanaha pavyšeńnia cany na rasiejski haz, jaki pastaŭlajecca ŭ Biełaruś.
U adkazie Minpramenerha adznačajecca, što «pavodle infarmacyi AAT Hazprom bazavuju canu hazu, jaki pastaŭlajecca ŭ Biełaruś u 2007 hodzie, planujecca vyličvać pa formule cany, analahičnaj dla pastaŭki rasiejskaha hazu va Ŭkrainu (bazavaja cana pamnožanaja na indeks źmianieńnia cenaŭ na enerharesursy ŭ zachodnieeŭrapiejskich krainach) z ulikam nulavoj myty dla Biełarusi (prykładna 180-200 dalaraŭ za tysiaču kubametraŭ)».
U 2002-2004 hadach haz u Biełaruś pastaŭlaŭsia pa ŭnutryrasiejskich cenach. U 2004 hodzie cana za tysiaču kubametraŭ hazu, jaki pastaŭlaŭsia ŭ Biełaruś, składała 46,68 dalaraŭ. U 2005-2006 hadach ceny na haz nie źmianialisia, niahledziačy na toje što dla zachodnieeŭrapiejskich krainaŭ haz padaražeŭ z 131 dalara za tysiaču kubametraŭ da 181 dalara ŭ 2005 hodzie.
U dakumencie padkreślivajecca, što siońnia cana, jakaja dziejničaje dla Biełarusi, tolki častkova kampensuje ŭdzielnyja vydatki na jahonuju zdabyču, padrychtoŭku i transpartavańnie. «U hetych umovach zachavańnie isnaj cany na haz aznačaje nia tolki naŭprostavaje datavańnie pastavak hazu ŭ Biełaruś, ale i adsutnaść u canie hazu krynicy investycyjaŭ u raźvićcio hazavaj haliny i skaračeńnie adličeńniaŭ u dachodnuju častku biudžetu Rasiei», - tłumačycca ŭ tekście.
