Zatrymany Ihar Bryło, eks-kiraŭnik Minsielhascharča i pamočnik Łukašenki pa Viciebskaj vobłaści 

Niekalki nie źviazanych pamiž saboj krynic paviedamili «Našaj Nivie», što Ihar Bryło, pamočnik Alaksandra Łukašenki pa Viciebskaj vobłaści, źnik z pracoŭnaha miesca ŭ kampanii spartyŭnaha vyhladu mužčyn niekalki dzion tamu. I z taho času na pracoŭnym miescy nie źjaŭlaŭsia. 

Z ulikam inšych viadomych nam abstavin možna śćviardžać, što Ihar Bryło zatrymany Kamitetam dziaržaŭnaj biaśpieki pa «Małočnaj spravie». Jaje centralnym fihurantam, nahadajem, staŭ hienieralny dyrektar mahiloŭskaha AAT «Babuškina krynka» Hienadź Skitaŭ. 

Čytajcie taksama: Byŭ Elkind, staŭ Skitaŭ. Historyja dyrektara «Babuškinaj krynki» i zakuliśsie impieryi kiraŭnictva spraŭ Łukašenki

51-hadovy Ihar Bryło naradziŭsia ŭ Barysavie, jak i Elkind. Jaho karjera pačynałasia tam. U stalicu jaho zabrali z pazicyi namieśnika staršyni Barysaŭskaha rajvykankama pa sielskaj haspadarcy. Barysaŭski rajon značny jak pa kolkaści bujnych sielhaspradpryjemstvaŭ, tak i svaimi pierapracoŭčymi vytvorčaściami.

Surazmoŭcy «Našaj Nivy» ŭ Barysavie ŭspaminajuć: kali Skitaŭ kiravaŭ Barysaŭskim miasakambinatam, Bryło byŭ jahonym padnačalenym. Ën pracavaŭ tam vieterynaram paśla zakančeńnia Viciebskaj vieterynarnaj akademii. Hetaja infarmacyja paćviardžajecca vypiskami z baz «Biełpoła». 

Z hetaj pazicyi Bryło atrymaŭ pavyšeńnie ŭ hałoŭnyja vieterynary rajona (2004—2006), potym — u rajvykankam (2011—2013), potym — u Ministerstva sielskaj haspadarki pieršym namieśnikam (2013—2021). U lutym 2022-ha jon staŭ ministram sielskaj haspadarki. 

Uvieś hety čas Bryło zachoŭvaŭ siabroŭskija adnosiny sa svaim byłym načalnikam. 

Padčas publičnaha raznosu pa «Małočnaj spravie» Alaksandr Łukašenka kinuŭ, aproč inšaha, i takuju frazu pra Skitava: «Zvanili ŭ Ministerstva sielskaj haspadarki i prasili: «Vy tam indykatyŭ nie pryznačajcie. Dajcie, my voś tut raźbiaromsia. Raspradamo pa bolš nizkich cenach, a potym vyznačycie hetyja indykatyŭnyja ceny, nižej za jakija nielha pradavać». Tak ja razumieju?»

Suadnosiačy zajavy i časavyja ramki — a ŭ KDB zajavili, što apieratyŭnaja raspracoŭka Skitava viałasia z 2020 hoda, kali Bryło ŭžo zajmaŭ kiraŭničyja pazicyi ŭ Minsielhascharčy, — možna zrazumieć, u čym mohuć abvinavačvać byłoha ministra sielskaj haspadarki: u padyhryvańni karupcyjnym schiemam praz rehulavańnie ci nierehulavańnie indykatyŭnych cenaŭ.

Indykatyŭnyja ceny ŭ Biełarusi — heta minimalnyja ceny, pa jakich miasnaja i małočnaja pradukcyja mohuć pradavacca na ekspart, za miažu. Vyznačaje ich ministerstva svaimi pastanovami, jakija publikujucca ŭ aficyjnym paradku.

Na pasadzie ministra sielskaj haspadarki i charčavańnia Ihar Bryło prabyŭ pa biełaruskich mierkach niadoŭha: trochi bolš za hod. Za hety čas Bryło paśpieŭ adnojčy navat niaśmieła zapiarečyć Łukašenku publična: redki vypadak dla čynoŭnika. U lipieni 2023 hoda jaho pryznačyli pamočnikam prezidenta pa Viciebskaj vobłaści.

Ministr Bryło zapomniŭsia svaimi čaściakom jarkimi halštukami i niecharakternaj dla biełaruskich čynoŭnikaŭ barodkaj — bolšaść aparatčykaŭ i siłavikoŭ stryžecca i nosić raślinnaść na tvary pa armiejskich standartach savieckaha pieryjadu, amal identyčna. 

Pavialičyć

Zatrymańnie čynoŭnika takoha kalibra — redki vypadak dla Biełarusi, dzie słovy pra «žastačajšaje pakarańnie» amal nikoli nie raspaŭsiudžvajucca na najvyšejšuju namienkłaturu. Pravaachoŭnyja orhany redka daciahvajucca da top-čynoŭnikaŭ, tamu što aryštoŭvać čynoŭnika z łukašenkaŭskaha kadravaha rejestra možna tolki z asabistaha dazvołu kiraŭnika režymu. 

Siarod hučnych spraŭ apošnich dziesiaci hadoŭ pryhadvajucca aryšty pamočnika Alaksandra Łukašenki pa Hrodzienskaj vobłaści Siarhieja Raŭniejki (2018), kolišniaha načalnika asabistaj achovy prezidenta, a paśla Słužby biaśpieki prezidenta Andreja Uciuryna (2019) i ministra lasnoj haspadarki Vitala Drožžy (2022). 

Pieršaja infarmacyja pra aryšty pryjšła 1 listapada. 14 listapada namieśnik načalnika śledčaha ŭpraŭleńnia Kamiteta dziaržaŭnaj biaśpieki Kanstancin Byčak zajaviŭ, što fihurantami spravy stali 26 čałaviek, ź ich 15 utrymlivajucca pad vartaj.

Dziaržaŭnyja ŚMI nazvali kiraŭnika mahiloŭskaha małočnaha hihanta hałoŭnym padazravanym u spravie. A śledstva apublikavała fota zołata i najaŭnych hrošaj, jakija zachoŭvalisia ŭ Hienadzia Skitava. 

Pavialičyć

Alaksandr Łukašenka asabista abvinavaciŭ Hienadzia Skitava ŭ karupcyi i stvareńni klijenteły šlacham pryznačeńnia na kiraŭničyja pasady svaich svajakoŭ, siabroŭ maładości i navat kiroŭcy. 

Va ŭźniknieńni karupcyjnaj schiemy takoha maštabu na vialikich dziaržaŭnych pradpryjemstvach Łukašenka abvinavaciŭ kiraŭnikoŭ abłasnych vykanaŭčych kamitetaŭ. Kiravać małočnym hihantam pastavili bandyta, napisali dziaržaŭnyja ŚMI. 

Adnak infarmacyja, jakuju sabrała «Naša Niva», pakazvaje, što i sam Alaksandr Łukašenka, i jaho najbližejšaje atačeńnie vielmi dobra viedali, chto taki Skitaŭ i čym jon zajmaŭsia. Jak śviedčać krynicy, pieršyja kantakty Skitava (tady jašče Elkinda) i jaho rodnych ź blizkim kołam Łukašenki adnosiacca, mahčyma, jašče da 1994 hoda.

Pavialičyć

Pryznačeńnie Hienadzia Skitava na «Babuškinu krynku» źviazvajuć ź inšym byłym ministram sielskaj haspadarki — Leanidam Zajcam, ciapierašnim vice-premjeram, jaki z 2019 da 2021 hoda ŭznačalvaŭ Mahiloŭski abłvykankam.

«Babuškina krynka» paŭstała z savieckaha małočnaha kambinata, uźviedzienaha ŭ 1979 hodzie. Heta adno z samych vialikich małakapierapracoŭčych pradpryjemstvaŭ nie tolki Biełarusi, ale i Uschodniaj Jeŭropy. Ahulnaja kolkaść rabotnikaŭ hetaha chołdynhu siahaje 4 tysiač čałaviek. Pavodle nacyjanalnaha ahienctva Biełarusi, jana zajmaje 9 miesca ŭ top-100 adkrytych akcyjaniernych tavarystvaŭ krainy. 98% akcyj naležyć dziaržavie.

U 2020 hodzie dachod «Babuškinaj krynki» skłaŭ 613 miljonaŭ rubloŭ, što dazvoliła kampanii zaniać treci radok u top-15 małočnych pradpryjemstvaŭ pa abjomie vyručki. Ale pa čystym prybytku «Babuškina krynka» mieła tolki 14-je miesca. Dachodnaść kampanii składała 3,6 miljona rubloŭ. Dla paraŭnańnia: lidar na toj momant, pryvatny «Savuškaŭ pradukt», mieŭ 51,3 miljona.

Pavodle viersii KDB, pieršasnyja apieratyŭnyja danyja ab najaŭnaści karupcyjnaj schiemy nabyćcia staličnaj TAA «TPK PradInviest» likvidnaj pradukcyi małakapierapracoŭčych pradpryjemstvaŭ pa zanižanych cenach, orhany dziaržbiaśpieki atrymali ŭ studzieni 2020 hoda. Tak u pole zroku trapili «sumnieŭnyja schiemy realizacyi pradukcyi AAT «Babuškina krynka».

Pa śćviardžeńni KDB, «złačynnyja dachody ad nieabhruntavanaj pasiarednickaj dziejnaści ŭsich udzielnikaŭ supraćpraŭnaj dziejnaści ŭ małočnaj halinie z ulikam roźnicy cen u Biełarusi i Rasii [składali] nie mienš jak 10 młn dalaraŭ za hod».

Čytajcie taksama: 

26 čałaviek zatrymanyja. Łukašenka raspavioŭ pra «małočnuju spravu»

Zatrymanyja kiraŭniki adrazu niekalkich małakazavodaŭ

• 13
• 0
• 29
• 8
• 7
• 5
• 28
• 0