Polšča turystyčnyja vizy redka adkryvaje, u Italii zapis praź miesiac. Jak ciapier biełarusam adkryć vizu ŭ Jeŭropu
Kali ŭ vieraśni Polšča adnaviła pryjom dakumientaŭ na turystyčnyja vizy, heta padavała vialikija nadziei, ale ŭsio akazałasia nie tak prosta. Pacikavilisia, jakaja ciapier situacyja z atrymańniem viz roznych krain ES — ci doŭha čakać, kolki biaruć pasiaredniki i na jaki termin adkryvajuć vizy.
Polšča
Atrymać polskuju turystyčnuju vizu možna, ale, jak pakazvaje praktyka, vydajuć ich vielmi drenna. Z ulikam taho, što samastojna zapisacca amal nie realna, a pasiaredniki biaruć pa 600-700 rubloŭ za svaje pasłuhi, heta nie samy lepšy varyjant.
«Pa turyźmie ciapier u bolšaści vypadkaŭ Polšča adkryvaje adnarazovyja vizy, časam byvajuć admovy», — kaža vizavy ahient.
U vypadku z Polščaj lepiej za ŭsio sprabavać adkryć haściavuju vizu. U takim vypadku jość vialiki šaniec atrymać doŭhaterminovuju nacyjanalnuju vizu.
«Dla hetaha spatrebicca zaprašeńnie ad luboha hramadzianina Polščy abo čałavieka z PMŽ. Kali z zaprašajučaha boku ŭsio budzie aformlena naležnym čynam, to vy atrymajecie hadavuju vizu», — tłumačyć śpiecyjalist.
Kali svajakoŭ ci znajomych, hatovych zrabić vam zaprašeńnie, niama, to daviadziecca płacić pasiarednikam.
Tolki košt samoha zaprašeńnia składaje 350-400 dalaraŭ. Kali zapisacca samastojna nie atrymajecca, to treba dadać 250-300 rubloŭ za zapis na padaču.
Aproč hetaha, apłačvajucca vydatki na strachoŭku — kala 170 rubloŭ — i inšyja vizavyja zbory, jakija paciahnuć jašče rubloŭ na 200. U vyniku viza abydziecca bolš jak u 500 dalaraŭ.
Na adkryćcio polskaj nacyjanalnaj vizy sychodzić kala dvuch miesiacaŭ: tolki zaprašeńnie budzie hatova praz dva tydni, plus niekalki tydniaŭ na zapis.
Siarod inšych papularnych varyjantaŭ — polskaja pracoŭnaja viza.
Za 800-950 rubloŭ pasiaredniki hatovyja padrychtavać nieabchodny kamplekt dakumientaŭ «pad kluč». Ad zajaŭnika aproč hrošaj i pašparta patrebna tolki strachoŭka (kala 100 dalaraŭ). Pasiaredniki harantujuć, što viza budzie hadavaja.
Adkryć pracoŭnuju vizu davoli prosta i adnosna tanna, ale treba razumieć, što robicca jana z vykarystańniem lipavaha zaprašeńnia na pracu i takoj samaj pracoŭnaj damovy.
Niekatoryja pasiaredniki adrazu papiaredžvajuć, što heta samy tanny i chutki varyjant atrymać doŭhaterminovuju vizu, ale nie samy biaśpiečny. Asabliva dla tych, chto płanuje časta pierasiakać miažu. Niekatoryja navat rajać jechać praz Polšču nie bolš za adzin raz, a paźniej staracca ŭjazdžać u ES tolki praź Litvu i Łatviju, paźbiahajučy kantaktaŭ z polskimi pahraničnikami.
Asobna lipavaje zaprašeńnie na pracu pradajuć pa 150 dalaraŭ. Pracoŭnaja damova, jakuju mohuć zaprasić pry pierasiačeńni miažy, u hetuju sumu nie ŭvachodzić. Zapis na vizu z vašym zaprašeńniem kaštuje 450-550 rubloŭ.
Italija
Jość jašče varyjant ź Italijaj, za dapamohu ŭ adkryćci vizy pasiaredniki biaruć 1200 rubloŭ. U košt pasłuhi ŭvachodzić u tym liku zapis na padaču, apłačany avijapieralot.
Kažuć, što Italija vydaje vizu minimum na paŭhoda, ale byvajuć i bolš praciahłyja terminy na 1-4 hady. Kali pačynać rychtavać dakumienty ŭ apošnija dni listapada, to padača chutčej za ŭsio adbudziecca ŭ studzieni nastupnaha hoda.
Ispanija
Turystyčnyja vizy ŭ hetuju krainu ŭ asnoŭnym vydajuć terminam na 3-6 miesiacaŭ. Na hadavuju vizu mohuć raźličvać tyja turysty, chto mieŭ ispanskija turystyčnyja vizy raniej. Pasiaredniki za padrychtoŭku dakumientaŭ i zapis na padaču biaruć kala 450 rubloŭ.
Vienhryja
Taksama turystyčnyja vizy biełarusam adkryvaje Vienhryja, ale šaniec atrymać doŭhaterminovuju vizu 50/50. Častcy adkryvajuć karotkaterminovyja vizy na adzin vizit, a inšyja atrymlivajuć šmatrazovyja vizy na 1-3 hady. Pasiaredniki za dapamohu ŭ afarmleńni dakumientaŭ i rehistracyju na padaču biaruć 600-700 rubloŭ.
Hrecyja
Tym, kamu viza treba terminova ci chto prosta pačynaje vizavuju historyju, moža padyści Hrecyja. Za pasiarednickija pasłuhi ahienctvy biaruć tolki 350 rubloŭ. Abiacajuć chutki zapis, ale viza budzie terminam na 2 tydni.
Hiermanija
Siarod krain, jakija dobra adkryvajuć doŭhaterminovyja vizy biełarusam, možna nazvać Hiermaniju. U zaležnaści ad vizavaj historyi, možna raźličvać na vizu terminam na 1-5 hadoŭ. Hałoŭny minus — data padačy. Pa stanie na kaniec listapada, zapisacca na padaču možna nie raniej, čym na červień 2024 hoda.
Čytajcie taksama:
«Zakryvajučysia ad biełarusaŭ, Zachad mižvoli šturchaje ich da Rasii»
«Ja mieŭ adnosna jaho iluzii». Były ministr zamiežnych spraŭ Litvy zhadvaje pra Uładzimira Makieja i pierapisku ź im u 2020-m
Dla KDB pabudujuć asobnuju balnicu na VIP-uzroŭni6
Kamientary