Sejmflix and chill. Anłajn-tranślacyi pasiadžeńniaŭ parłamienta Polščy siensacyjna bjuć rekordy
Suśvietnyja ŚMI pišuć pra imklivy rost papularnaści prahladaŭ pasiadžeńniaŭ parłamienta Polščy. Kolkaść padpisčykaŭ kanała Siejma na YouTube nabliziłasia da 700 tysiač. U čym pryčyna?
Jak piša Financial Times, novy śpikier Siejma Šyman Hałoŭnia pieraŭtvaryŭ parłamienckija debaty ŭ siensacyju.
Uradženiec Biełastoka Hałoŭnia — lidar partyi «Polšča 2050», jakaja ŭvachodzić u novuju kiroŭnuju kaalicyju. Uznačaliŭšy ŭ listapadzie Siejm, 47-hadovy śpikier, jaki raniej vioŭ polskuju viersiju telešou Got Talent, paraiŭ hramadzianam «zapasacca papkornam» i hladzieć parłamienckija debaty, jakija, jak jon paabiacaŭ, stanuć bolš zachaplalnymi i natchnialnymi.
Vydańnie adznačaje, što daścipnaść i niepasrednaść śpikiera pieraŭtvaryli jaho ŭ hałoŭnuju siensacyju ŭ sacyjalnych sietkach. Sam Hałoŭnia raskazaŭ vydańniu, što polski Siejm ciapier staŭ «samym papularnym parłamientam u śviecie».
Tyja ž vybarščyki, jakija ŭ kastryčniku stajali ŭ čerhach pierad vybarčymi ŭčastkami, kab pieramahčy kiroŭnuju tady partyju «Zakon i spraviadlivaść», ciapier «chočuć ubačyć, jak adbyvajucca źmieny».
Siesija parłamienta, na jakoj adbyvałasia hałasavańnie za kandydaturu Donalda Tuska na pasadu premjer-ministra, nabrała ŭ YouTube 4,2 miljona prahladaŭ.
Ciapier kožnaja tranślacyja pasiadžeńniaŭ Siejma nabiraje pa niekalki sotniaŭ tysiač prahladaŭ. A kanał parłamienta maje 690 tysiač padpisčykaŭ (heta bolš čym u piać razoŭ pieravyšaje kolkaść padpisčykaŭ niamieckaha Bundestaha) i siarebranuju knopku. Pasiadžeńni stali nastolki papularnymi, što ich pačali tranślavać u kinazałach.
Jak adznačaje Financial Times, šmat chto z palakaŭ hladzić za palityčnymi źmienami jak za najlepšym sieryjałam. Vydańnie padkreślivaje, što mienavita cikavaść moładzi farmiruje pastajanny rost papularnaści polskaha Siejma. Papularny siarod maładych ludziej słohan «Netflix and chill» zamienieny na «Sejmflix and chill».
«Ja b chacieŭ, kab u ludziej uvajšło ŭ zvyčku hladzieć pasiadžeńni Siejma, choć ja razumieju, što ciapierašnija ličby prahladaŭ budzie vielmi ciažka padtrymlivać. Hramadzianin, jaki sočyć za ŭładaju, — asnova demakratyi», — cytuje vydańnie Šymana Hałoŭniu.
Akramia hetaha, śpikier zajaŭlaje, što Siejm budzie bolš adkrytym i kanstruktyŭnym:
«Ad parłamienta, u jakim da apazicyi stavilisia z pahardaj, u jakim adklučali mikrafon i dzie hałasavańnie paŭtarałasia, kali vynik nie zadavalniaŭ vykanaŭčuju ŭładu, my viarnulisia da vytokaŭ parłamientaryzmu».
Vydańnie źviartaje ŭvahu, što adpaviedna z apytańniami hramadskaha mierkavańnia Ibris, vyniki jakoha byli apublikavanyja ŭ śniežni, Hałoŭnia zjaŭlajecca palitykam, jaki karystajecca najbolšym davieram nasielnictva, apieradžajučy premjer-ministra Donalda Tuska i prezidenta Andžeja Dudu.
Čytajcie jašče:
U polskim Siejmie razhareŭsia skandał na antysiemickim hruncie
Novy polski premjer Donald Tusk pradstaviŭ svoj budučy ŭrad
U Polščy pieramahła apazicyja. Jak heta adabjecca na Biełarusi
Čamu kiraŭnikom svajoj Administracyi Łukašenka pastaviŭ Dźmitryja Krutoha? Jon moža stać pierajemnikam?3
Kamientary