Fota: AP Photo/Markus Schreiber
Jak paviedamlajecca na sajcie Bundestaha Hiermanii, chadajnictva ab praviadzieńni debataŭ pa pytańni «Za demakratyčnuju Biełaruś u jeŭrapiejskaj siamji» padała kiroŭnaja kaalicyja, jakaja składajecca z troch partyj — Sacyjał-demakratyčnaja partyja Hiermanii (SDPH), Sajuz-90/Zialonyja i Svabodnaja demakratyčnaja partyja (SvDP).
U dakumiencie zajaŭlajecca pra nieparušnaść salidarnaści ź biełaruskim demakratyčnym rucham i pavahu i padtrymku «šmatlikich biełaruskich zmaharoŭ za svabodu, jakija asabista płaciać vielmi vysokuju canu za metu dasiahnieńnia demakratyčnaj Biełarusi».
Aŭtary adroźnivajuć «biełaruski režym» Łukašenki, jaki «hvałtoŭna pastaviŭ utrymańnie ŭłasnaj ułady vyšej za volu biełarusaŭ i budučyniu krainy» letam 2020 hoda, a ŭ 2022-m «pieratvaryŭ Biełaruś u bazu i płacdarm rasijskaha vojska ŭ ahresiŭnaj vajnie suprać Ukrainy» i staŭ «saŭdzielnikam adnaho z samych žachlivych vajennych złačynstvaŭ Rasii — departacyi ŭkrainskich dziaciej» ad nasielnictva krainy.
Jany zajaŭlajuć ab tym, što siarod biełaruskaha nasielnictva niama padtrymki rasijskaj ahresiŭnaj vajny. Pry hetym isnuje aktyŭny supraciŭ dziejańniam režymu i mahčymaja alternatyva jamu.
«Niamiecki Bundestah ćviorda staić na baku ŭsiaho biełaruskaha demakratyčnaha ruchu, Śviatłany Cichanoŭskaj i ŭznačalenaha joju «Abjadnanaha pierachodnaha kabinieta». Deputaty Bundestaha ŭdziačnyja za ich mužnaść, siłu, stojkaść i baraćbu za jeŭrapiejskija kaštoŭnaści», — adznačajecca ŭ dakumiencie.
Aŭtary zaklikajuć fiederalny ŭrad na jeŭrapiejskim uzroŭni praciahvać vystupać za žorstkija i metanakiravanyja jak piersanalnyja, tak i ekanamičnyja siektaralnyja sankcyi. Pobač z hetym jany ličać nieabchodnym praciah padtrymki achviaraŭ hvałtu, represij i katavańniaŭ, pašyreńnie padtrymki demakratyčnych sił i biełaruskaj hramadzianskaj supolnaści.
Parłamienckaja frakcyja adznačaje važnaść «dać zrazumieć Rasii, što pastupovaje pahłynańnie Biełarusi, jakoje farsiruje Kreml pry padtrymcy z boku Alaksandra Łukašenki, absalutna nieprymalnaje i budzie adchilena samym rašučym čynam».
Akramia zajaŭki kiraŭničaj kaalicyi ŭ Bundestahu płanujecca abmierkavać zajavu parłamienckaj hrupy CHDS/CHSS «Viartańnie Biełarusi da jeŭrapiejskaj siamji narodaŭ — padtrymka voli ludziej da svabody».
Płanujecca, što hałasavańnie adbudziecca adrazu paśla dyskusii viečaram 8 listapada.
Čytajcie jašče:
