Ilustracyjny zdymak. Fota: «Naša Niva»
Rumynija
Najbolš papularnaj krainaj ES dla «kupli» hramadzianstva nazyvajuć Rumyniju. Šlach da hramadzianstva hetaj krainy idzie pa schiemie repatryjacyi. Mahčyma heta dziakujučy tamu, što častka terytoryi sučasnaj Ukrainy ŭ pieršaj pałovie 20 stahodździa uvachodziła ŭ skład Rumynii.
Jak paznačana na sajtach šmatlikich ahiencyj, prahrama adnolkava dastupnaja dla hramadzian Ukrainy, Biełarusi, Rasii i Małdovy. Niekatoryja kampanii majuć ofisy adrazu ŭ Biełarusi, Rasii, Ukrainie, Rumynii, Bałharyi.
Fota: skrynšot z sajta international.expert
Pa słovach supracoŭnika adnaho z ahienctvaŭ, u Vienhryi pracuje padobnaja prahrama, ale tam vielmi składanaja mova, a dla atrymańnia pašparta Rumynii na rumynskaj nibyta dastatkova viedać tolki tekst prysiahi.
Atrymać hramadzianstva Rumynii pa sproščanaj pracedury možna pry najaŭnaści dakumientalnaha paćviardžeńnia rumynskich karanioŭ da treciaha kalena ŭklučna. Pachodžańnie pa karaniach praduhledžvaje naradžeńnie abo pražyvańnie prodkaŭ zajaŭnika na histaryčnaj terytoryi Rumynii da 1940 hoda.
Kali takija karani jość, praces atrymańnia rumynskaha pašparta zajmaje 1,5-2 hoda. U vypadku adsutnaści dakumientaŭ prabaćkoŭ zajaŭnik moža adnavić ich pa zapisach u dziaržaŭnym archivie abo ZAHSie.
Kab pošuki patrebnych prodkaŭ uviančalisia pośpiecham, i isnuje šerah mihracyjnych ahiencyj, jakija za 4-5 tysiač jeŭra dapamohuć znajści prodkaŭ, jakija niekali žyli na terytoryi Rumynii, i aformić usie nieabchodnyja dakumienty dla padačy na hramadzianstva.
Ilustracyjny zdymak. Fota: «Naša Niva»
Sama schiema vyhladaje nastupnym čynam: ahiencyi znachodziać u vas prodkaŭ, jakija ŭ patrebny pieryjad času žyli na adpaviednaj terytoryi. Pasiaredniki robiać vypisku z ZAHSa i stavać na hetyja daviedki apastyl. Usie hetyja dziejańni robiać va Ukrainie.
Lehalnaść padobnaha padychodu dla atrymańnia hramadzianstva roznyja ahiencyi tłumačać pa-roznamu. Adny supakojvajuć patencyjnych klijentaŭ tym, što heta buduć nie padroblenyja dakumienty, a aryhinały, vydadzienyja ŭkrainskaj dziaržavaj, jakija majuć apastyl.
Inšyja prosta pryznajucca, što ŭ Rumynii spraŭdzić infarmacyju pra realnaje pachodžańnie prodkaŭ zajaŭnika nie mohuć, tamu pierajmacca niama pra što. Maŭlaŭ, ahulnych baz danych niama, a takoj krainy, jak SSSR, naohuł nie isnuje.
Aproč vydatkaŭ na ŭznaharodu pasiarednikam, vam pryjdziecca dvojčy źjeździć u Bucharest, a taksama zrabić apastyl na biełaruskija dakumienty. Tamu vynikovy košt pašparta budzie bolšy za ahučanyja 4-5 tysiač jeŭra.
Raspaviadajučy pra pieravahi atrymańnia rumynskaha hramadzianstva pa vyšejapisanaj schiemie, pasredniki čamuści zabyvajucca papiaredzić, što, zhodna ź dziejnym zakanadaŭstvam, Rumynija maje prava pazbaŭlać hramadzianstva tych, chto atrymaŭ jaho nie pa naradžeńni. Siarod padstaŭ, pa jakich jaho možna zhubić, jość punkt «atrymańnie hramadzianstva machlarskich šlacham».
Vienhryja i Bałharyja
Ź Vienhryjaj schiema vyhladaje padobnaj, aryjentavana jana na tych, chto žyŭ abo naradziŭsia ŭ Paŭdniovaj Słavakii, Transilvanii, Vajavodzinie abo ciapierašniaj Zakarpackaj vobłaści Ukrainy da 1920 hoda abo z 1938 pa 1945 hady, i na ich naščadkaŭ.
U śpisie jeŭrapiejskich krain, hramadzianstva ŭ jakich atrymać nibyta prosta i chutka, taksama znachodzicca Bałharyja. Schiemy va ŭsich vypadkach — repatryjacyja pa karaniach.
Karta palaka jak pieršy krok da polskaha hramadzianstva
Aproč dapamohi ŭ nabyćci hramadzianstva, niekatoryja pasiaredniki hatovyja dapamahčy z padrychtoŭkaj dakumientaŭ dla atrymańnia karty palaka. Sama karta nie vydajecca ŭ kamplekcie z polskim pašpartam abo VNŽ, ale jaje najaŭnaść značna palahčaje i paskaraje praces atrymańnia polskaha pašparta.
Pasiaredniki abiacajuć znajści polskija karani i padrychtavać usie nieabchodnyja dakumienty da zdačy ispytu za 1500-2000 jeŭra. Na heta im spatrebicca 1-2 miesiacy.
Nie tolki krainy ES
Cikava, što apošnim časam znachodzicca niamała prapanoŭ pa dapamozie atrymańnia hramadzianstva Armienii i Kyrhyzstana.
Fota: skrynšot z historyi ŭ Instagram
Źjaŭleńnie padobnych prapanoŭ možna rastłumačyć tym, što praz vajnu Rasii suprać Ukrainy biełaruskija i asabliva rasijskija pašparty stali nadta taksičnymi. Tamu najaŭnaść u čałavieka hramadzianstva Armienii abo Kyrhyzstana daje šerah pieravah. Dadatkovyja dakumienty mohuć być karysnyja jak pradstaŭnikam biznesu, tak i šerahovym ludziam, jakija chočuć bolš volna padarožničać pa śviecie.
Ceny na pašparty roznyja. Naprykład, z hramadzianstvam Kyrhyzstana raźbiežka składaje ad 5000 da 15 000 dalaraŭ.
Pašpart krainy, nazvu jakoj vy mahli nikoli nie čuć
Adnak Armienija i Kyrhyzstan daloka nie samyja ekzatyčnyja krainy, atrymać hramadzianstva jakich prapanujuć dapamahčy działki.
Tak, naprykład, davoli časta možna sustreć rekłamu pra nabyćcio hramadzianstva Respubliki Vanuatu — Cichaakijanskaj dziaržavy ŭ Miełaniezii. Ale ŭ adroźnieńni ad vyšej apisanych schiem šukać vanuackija karani vam nichto nie budzie. Pasiaredniki dapamohuć atrymać pašpart hetaj krainy praź inviestycyi.
Fota: skrynšot z sajta citizenshipinvest.com
Minimalny ček — 130 tysiač dalaraŭ, što daje padstavy mierkavać, što ŭ paraŭnańni z atrymańniem hramadzianstva na padstavie sfabrykavanych źviestak hety šlach budzie lehalny.
Dzie jašče dajuć pašpart za inviestycyi?
Prapanovy atrymać hramadzianstva małaviadomaj Cichaakijanskaj krainy za inviestycyi, vierahodna, pačali karystacca papularnaściu praz toje, što krainy ES pierastali vydavać «załatyja pašparty». Raniej takaja pracedura była davoli raspaŭsiudžanaja na Kipry.
Paśla skasavańnia prahramy, inviestavaŭšy ŭ Respubliku Kipr nie mienš za 300 tysiač jeŭra, možna raźličvać tolki na atrymańnie PMŽ. Aproč Kipra, DNŽ abo PMŽ za inviestycyi vydajuć u Ispanii, Partuhalii, Hrecyi.
Atrymać «załaty pašpart» za inviestycyi pa-raniejšamu možna ŭ Čarnahoryi i Turcyi. Hetyja krainy nie ŭvachodziać u ES, ale prynamsi Čarnahoryju niekatoryja ličać dobrym varyjantam, bo kraina imkniecca stać členam Jeŭrasajuza.
Jurydyčnyja pytańni
Aproč taho, što sami pa sabie schiemy atrymańnia hramadzianstva, DNŽ abo karty palaka z vykarystańniem padłožnych źviestak mohuć pryvieści da kryminalnaj adkaznaści, isnujuć i inšyja ryzyki. Razam z kampanijami, jakija akazvajuć «jurydyčnuju dapamohu», sustrakajucca i machlary.
Uličvajučy rost popytu na padobnyja pasłuhi, u internecie i sacyjalnych sietkach źjaŭlajecca ŭsio bolš abjaŭ ad machlaroŭ, jakija abiacajuć dapamahčy, ale nie vykonvajuć svaje abaviazki. Hałoŭnaje, što ich vydaje — bolš vysokaja chutkaść i bolš nizkaja cana na ich «jurydyčnyja pasłuhi».
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
Litoŭski sud kančatkova admoviŭ Volzie Karač u palityčnym prytułku
Volha Karač nie płanuje zjazdžać ź Litvy
«Pradajecca tolki na RF». Jak u Biełarusi źjaŭlajucca aŭtamabili ź Jeŭropy, jakija nielha nabyć miascovym
Jak nabyŭ hramadzianstva Biełarusi cham z Tunisa, jaki pracavaŭ na Puškinskaj?