Fota: Myron Standret / vecteezy.com
Volha (29 hadoŭ): «Jon chacieŭ adnosin, ale ja nie była da ich hatovaja»
Adnosiny ŭ farmacie friends with benefits u Volhi pačalisia kala hoda tamu, kali jana žyła ŭ inšaj krainie (spojler: užo skončylisia).
Pačałosia ŭsio z taho, što dziaŭčyna paznajomiłasia sa svaim budučym partnioram praz ahulnaha znajomaha ŭ bary. Akazałasia, što maładyja ludzi žyvuć pobač. U kancy viečara chłopiec uziaŭ u Volhi numar telefona — na tym i razyšlisia. Praź niejki čas chłopiec napisaŭ i prapanavaŭ sustrecca.
— Na treciaj ci čaćviortaj sustrečy my prosta siadzieli ŭ jaho, razmaŭlali, słuchali muzyku, hulali ŭ karty — i ničoha nie adbyvałasia. Dla mianie heta było dziŭna, tamu što adčuvałasia, što ciaha jość u abodvuch, — raskazvaje Volha. — U niejki momant ja stała źbiracca dadomu, ale jon mianie zatrymaŭ: tak my ŭpieršyniu pacałavalisia i zanialisia seksam — abodvum spadabałasia.
Paśla treciaha seksu ja vyrašyła ź im pahavaryć i adrazu paznačyła, što nijakich adnosin u nas być nie moža. Ja ŭ toj momant pieražyvała razryŭ ź inšym chłopcam, i nie było emacyjanalnych sił na niešta novaje — ale zadavalniać svaje fizičnyja patreby ja była nie suprać. Tamu, kali jamu taki farmat padychodzić, my možam praciahvać, a kali nie, to lepš usio skončyć. Akazałasia, što jon chacieŭ sa mnoj adnosin, tamu paśla maich słoŭ nastroj u jaho sapsavaŭsia. Ale ž pahadziŭsia praciahvać.
My vyznačyli peŭnyja praviły. Naprykład, naša kamunikacyja prachodziła vyklučna ŭ WhatsApp, nijakija inšyja sacsietki nie vykarystoŭvalisia. Na spatkańni my taksama nie chadzili —sustrakalisia tolki ŭ jaho (nu i, moža, paru razoŭ u mianie). Plus nijakich sumiesnych fota i videa.
Niejkaj peŭnaj pieryjadyčnaści ŭ našych sustreč nie było: časam my bačylisia ledź nie praź dzień, a časam i raz na dva-try tydni. Nam padabałasia bavić čas razam, zaŭsiody było pra što pahavaryć. To-bok našy sustrečy nie abmiažoŭvalisia tolki seksam. My mahli viačerać razam, hladzieć kino, hulać u nastołki i h. d.
Miesiacaŭ praź piać jon pryznaŭsia mnie ŭ kachańni. Ja da taho momantu svajo mierkavańnie nie źmianiła i ŭstupać u adnosiny nie płanavała. Tamu my praciahnuli bačycca ŭ raniejšym farmacie. A skončyłasia ŭsio miesiacy praz try i davoli banalna — ja prosta źjechała z krainy.
Časam my ŭsio jašče pierapisvajemsia, ale vielmi redka — ja sama nie inicyjuju, tamu što ŭ hetaj kamunikacyi niama sensu.
U cełym ja b skazała, što našy sustrečy byli pryjemnymi i biaśpiečnymi dla nas abodvuch. Mahčyma, jaho čakańni nie syšlisia z realnaściu, ale ja z samaha pačatku była ź im sumlennaj. Tamu zastacca ŭ takich adnosinach, jakija, mahčyma, jamu nie nadta padychodziać, było jaho ŭłasnym vybaram.
Andrej (32 hady): «Pieršapačatkova navat sprabavali stvarać zvyčajnyja adnosiny»
U Andreja seks pa siabroŭstvie zdaryŭsia letaś. Sa svajoj partniorkaj jon paznajomiŭsia ŭ kłubie. Maładyja ludzi pačali kamunikavać i pieršapačatkova navat sprabavali stvarać zvyčajnyja adnosiny.
— Ale ŭ mianie z hetym prablemy, — kaža chłopiec. — Tamu my ź joj pahavaryli, i ja rastłumačyŭ, što ŭ mianie, chutčej za ŭsio, u narmalnyja adnosiny nie atrymajecca. Tak my dajšli da taho, što pasprabujem niešta nakštałt friends with benefits.
Sustrakalisia adzin-dva razy na tydzień, časta niekudy vybiralisia razam, jeździli za horad na vychadnyja i h.d. — i padčas hetych pajezdak pavodzili siabie chutčej jak para, čym jak siabry. Dy i ŭ cełym u nas byli davoli ščyryja adnosiny. My padtrymlivali adzin adnaho, dzialilisia svaimi chvalavańniami.
U paŭnavartasnyja adnosiny našy sustrečy nie pieraraśli čysta z-za mianie: pa-pieršaje, z-za maich prablem z adnosinami (nad jakimi ja ciapier pracuju, ale jašče ŭ pačatku šlachu), a pa-druhoje, ja nie adčuvaŭ našaha supadzieńnia na ŭsie 100%. Choć dziaŭčyna potym pryznavałasia, što ŭsio ž spadziavałasia, što heta kamunikacyja pieraraście ŭ niešta bolšaje.
Ahułam našy sustrečy doŭžylisia kala 6 miesiacaŭ. Ale razryŭ, pa sutnaści, byŭ zapłanavany pieršapačatkova — ja źbiraŭsia źjazdžać na praciahły termin. Ułasna, na hetym usio i skončyłasia, choć pieryjadyčna pierapisvajemsia da hetaha času.
Mikałaj (25 hadoŭ): «Było krychu nijakavata, ale i zadniuju ŭ takoj situacyi davać nie chaciełasia»
U Mikałaja seks pa siabroŭstvie zdaryŭsia zusim niadaŭna — 1 studzienia. Chłopiec raskazvaje, što ŭ jaho jość daŭniaja siabroŭka, ź jakoj jon znajomy ŭžo hadoŭ z 10. Zvyčajna maładyja ludzi prosta pierapisvajucca: dzielacca svaim žyćciom, prablemami i radaściami. Bačacca redka, tamu što Mikałaj pracuje dalnabojščykam i doma byvaje tolki 3-4 razy na hod.
— Adnojčy naša razmova zajšła pra seks biez abaviazkaŭ, i jana dała zrazumieć, što była b nie suprać pravieści sa mnoj noč — ale nie bolš za toje. I kali 1 studzienia ja padvioz jaje dadomu, jana zaprasiła zajści. Ščyra skazać, mnie było krychu nijakavata, ale i davać zadniuju ŭ takoj situacyi nie chaciełasia. Tym bolš što jana adrazu padkreśliła, što načavać mnie lepiej jechać dadomu. Tamu my padnialisia, usio zdaryłasia, my dalikatna raźvitalisia, i ja syšoŭ. Na nastupny dzień my praciahnuli razmaŭlać nibyta ničoha nie było.
Varyjant, što našy sustrečy pierarastuć u adnosiny, ja nie razhladaju. Jana starejšaja za mianie na 5 hadoŭ, jość dzieci. Chacia na toje, što sustrečy dla seksu buduć praciahvacca, ja raźličvaju.
Viktoryja (38 hadoŭ): «Jon zrazumieŭ, što ciahnik sychodzić, i zrabiŭ pieršy krok — tak zdaryŭsia naš pieršy seks»
U Viktoryi seks ź siabram, ź jakim pieryjadyčna pierasiakalisia ŭ ahulnaj kampanii, zdaryŭsia 5 hadoŭ tamu.
— Niejkaha adkrytaha flirtu ŭ nas nikoli nie było, ale mnie zaŭsiody zdavałasia, što my adzin adnamu simpatyzujem. Zvyčajna my razmaŭlali vyklučna ŭ ramkach ahulnych tusovak, ale časam mahli adreahavać na storys abo prakamientavać post u sacsietkach.
I voś adnojčy jon u čarhovy raz adreahavaŭ na majo fota, u nas zaviazałasia pierapiska, i jon prapanavaŭ papić kavu ŭ jaho doma. Ja nie maleńkaja dziaŭčynka i cudoŭna razumieju, da čaho heta ŭsio idzie. Ale padumała, što my abodva volnyja, adzin adnamu padabajemsia — čamu b nie pasprabavać. Tym bolš što da hetaha adnosin u farmacie siabroŭstva z pryvilejami ŭ mianie nie było.
Na nastupny dzień ja pryjechała da jaho, my pili vino, bałbatali, hladzieli niejki film. Tak ci inakš prysutničała niejkaja saramlivaść, niajomkaść. Kali znachodzišsia ŭ pryjacielskich adnosinach, heta hrań pamiž vami ściortaja — i ty jak byccam nie možaš raptam uziać i pačać rabić niejkija dziejańni seksualnaha charaktaru, choć abodva cudoŭna razumieli, dla čaho apynulisia ŭ hetaj kvatery.
Hadziny praz try, kali ni jon, ni ja nie rabili niejkich namieraŭ, ja padumała, što, značyć, zastaniomsia prosta pryjacielami, — i stała źbiracca dadomu. Tut užo čałaviek, mabyć, zrazumieŭ, što ciahnik sychodzić, i zrabiŭ pieršy krok — tak zdaryŭsia naš pieršy seks. Paśla hetaha my raźjechalisia pa damach i praciahnuli kamunikavać jak raniej.
Praź niejki čas jon spytaŭ, ci nie chaču ja paŭtaryć, — i ja była nie suprać. Tak my pačali pieryjadyčna sustrakacca, ale dastatkova redka. I tolki praz peŭny čas ja zrazumieła, što bolš častyja sustrečy dla jaho značyli b, što heta moža pieraraści ŭ adnosiny. A jon ich nie chacieŭ — nie toje što sa mnoj, a ŭ pryncypie. Jon zaŭsiody ličyŭ, što kali sustrenie svaju budučuju žonku, dyk adrazu zrazumieje.
Akramia seksu, my mahli razmaŭlać pra što zaŭhodna: abmiarkoŭvali ahulnych siabroŭ, jaho pracu, maju pracu, niejkija naviny palityki, kultury — u cełym u nas byŭ davoli padobny pohlad na śviet. Praź niejki čas my stali mocna bližejšymi, i ja zrazumieła, što ŭ mianie pačynaje źjaŭlacca da jaho niejkaje pačućcio. Ja b nie nazvała heta zakachanaściu, ale, musić, niešta kala taho. Mnie chaciełasia, kab našy sustrečy stali vychodzić za ramki kvatery. Kab my, mahčyma, pačali chadzić na spatkańni i nie bajacca prajaŭlać našu ŭzajemnuju simpatyju na ludziach. A kali ŭ mianie byŭ dzień naradžeńnia, mnie prosta važna było, kab jon patelefanavaŭ i pavinšavaŭ, — ja čakała.
I kali ja zrazumieła, što mianie zaciahvaje, ja vyrašyła ŭsio heta spynić. Tamu što čakać, što inšy čałaviek zrazumieje, što heta nie strašna, ja nie chacieła. Dadumvać i nakručvać, čamu mianie nie žadajuć pieravodzić u inšy status, — taksama. Tamu ja pryjšła i skazała, što chaču surjoznych adnosin, jon mnie hetaha dać nie moža, ja jaho rašeńnie pavažaju, ale lepš nam hety sustrečy spynić i zastacca pryjacielami, jak heta było raniej. Jon pahadziŭsia.
Paźniej my jašče niekalki razoŭ pierapisvalisia, i ź jaho boku było niejkaje škadavańnie, što ŭ nas tak rezka ŭsio abarvałasia. Nakolki ja viedaju, za hetyja piać hadoŭ, što prajšli z taho času, jon ni ŭ jakija inšyja adnosiny tak i nie ŭstupiŭ.
U mianie ž adrazu paśla taho, jak my spynili sustrečy, zdarylisia surjoznyja adnosiny. I ja jašče raz dla siabie zrazumieła, što seks biez abaviazacielstvaŭ nie dla mianie, ja takoha bolš nie chaču. Mnie važna iści na zbližeńnie, važna, kab adnosiny raźvivalisia i pierachodzili na novy ŭzrovień. A pry siabroŭstvie z pryvilejami heta jak byccam niemahčyma.
Čytajcie taksama:
