Adsutnaść nyrki, puchlina ŭ hałavie, rak. Chto ź biełaruskich palitviaźniaŭ maje za kratami vialikija prablemy sa zdaroŭjem

Vasil Bieraśnieŭ

Asudžany ŭ «spravie prafsajuzaŭ». Vyrak — 9 hadoŭ źniavoleńnia. Adbyvaje termin u mahiloŭskaj kałonii № 15, maje 74 hady.

Padčas znachodžańnia ŭ SIZA ŭ Bieraśnieva značna pahoršyŭsia stan zdaroŭja, pavysiŭsia cisk, abvastrylisia chraničnyja zachvorvańni, pačalisia prablemy z nyrkami.

U pačatku kastryčnika 2023 hodu stała viadoma, što Vasila Bieraśnieva nakiravali z kałonii ŭ Mahiloŭski abłasny špital. Jon maje patrebu ŭ pierasadcy nyrki. Viadoma, što prafsajuznaha dziejača viarnuli ŭ mahiloŭskuju kałoniju, nyrki nie pierasadzili. Inšych źviestak pra jaho niama.

Majuć vialikija prablemy sa zdaroŭjem i inšyja prafsajuznyja dziejačy ŭ źniavoleńni. U Hienadzia Fiadyniča, jakoha trymajuć u babrujskaj kałonii № 2, taksama pačalisia prablemy z nyrkami, a jon maje jašče i cukrycu. U Vacłava Areški prablemy sa zrokam, jon nie bačyć na adno voka.

Pavał Kučynski

30-hadovy žychar Maładziečna maje ankałahičnuju chvarobu. Jamu prysudzili 4 hady i 9 miesiacaŭ źniavoleńnia. U Kučynskaha pieršaja hrupa invalidnaści, dyjahnaz — limfoma Chodžkina čaćviortaj stadyi. Zamiest kałonii Paŭła Kučynskaha nakiravali ŭ respublikanskuju lakarniu dla źniavolenych u Kaladzičach, dzie palitviazień prachodzić kurs chimijaterapii. Pavodle źviestak pravaabaroncaŭ, lačeńnie nie dapamahaje, chvaroba prahresuje. Paśla abśledavańniaŭ kurs mianiajuć, ale palitviaźniu nie stanovicca lepš. Kučynskaha prakansultavali nakont pierasadki kaściavoha mozhu, ale ŭ źniavoleńni, u takich umovach utrymańnia zrabić heta niemahčyma.

Ryhor Kastusioŭ

Asudžany ŭ «spravie ab zmovie» na 10 hadoŭ kałonii. Maje šmat chvarobaŭ, u 2023 hodzie pravodziłasia abśledavańnie pa padazreńni na ankałohiju, vyniki jakoha palitviaźniu nie paviedamili. U jaho balać i aciakajuć nohi ad mocnaha varykozu.

U studzieni 2024 hodu ŭ spravie 66-hadovaha Kastusiova prajšoŭ jašče adzin sud. U vyniku palitviaźniu ŭzmacnili pakarańnie i adpravili ŭ krytuju turmu № 1 Horadni.

Natalla Taran

Maje 75 hadoŭ, była asudžanaja za kamientary ŭ sacsietkach na try z pałovaj hady. Maje šerah chraničnych zachvorvańniaŭ.

Iryna Mielchier

Asudžanaja na 17 hadoŭ kałonii pa «spravie Aŭtuchoviča», maje 69 hadoŭ. Pieraniesła hipiertaničny kryz, maje prablemy z sercam, niervami, nyrkami.

Halina Dzierbyš

Jašče adna asudžanaja pa «spravie Aŭtuchoviča», atrymała 20 hadoŭ kałonii. Halinie 62 hady, jana maje ankałahičnuju chvarobu, druhuju hrupu invalidnaści, prablemy z sercam. U źniavoleńni pahoršyŭsia stan zdaroŭja.

Uładzimir Hundar

Hundaru 63. Jamu prysudzili 18 hadoŭ kałonii ŭ «spravie Aŭtuchoviča». Uładzimir maje invalidnaść druhoj hrupy, u jaho adna naha. Viadoma, što ŭ Hundara padvyšany cisk, jon pieranios hipiertaničny kryz u źniavoleńni.

Vasil Dziemidovič

72 hady, asudžany na 7 hadoŭ kałonii. Ułady ŭklučyli Dziemidoviča ŭ «śpis terarystaŭ». Maje prablemy sa zdaroŭjem.

Ała Zujeva

Maje 62 hady. Zujevu asudzili za kamientary na 2 hady i 6 miesiacaŭ kałonii. U jaje lejkoz, prablemy sa śpinaj, paničnyja ataki.

Hienrych Akałatovič

Katalicki śviatar, znachodzicca pad śledstvam. Pieranios infarkt, niadaŭna jamu była zroblena apieracyja na straŭniku ŭ suviazi z ankałahičnym zachvorvańniem. Jon maje patrebu ŭ miedycynskim nazirańni i pastajannym pryjomie lekaŭ. Akałatoviču spoŭniłasia 70.

Andrej Vojnič

Atrymaŭ 7 hadoŭ kałonii. Adbyvaje termin u mahiloŭskaj kałonii № 15. Pavodle svajakoŭ, jon śmiarotna chvory. Maje cyroz piečani, cukrovy dyjabiet, puchlinu nad nadnyračnikami, vydaleny žoŭcievy puzyr, mnostva ŭskładnieńniaŭ. Da aryštu Vojnič štomiesiac naviedvaŭ transpłantołaha, rychtavaŭsia da pierasadki piečani. Za kratami 43-hadovy palitviazień pazbaŭleny pieradač i spatkańniaŭ.

Alaksandr Fiaduta

59 hadoŭ, atrymaŭ 10-hadovy termin. Maje surjoznyja prablemy z sercam — vostruju sardečnuju niedastatkovaść, zdaralisia prystupy stenakardyi i arytmii.

Uładzimir Małachoŭski

Atrymaŭ 3,5 hoda źniavoleńnia. Maje invalidnaść treciaj hrupy, pakutuje na ankałahičnuju chvarobu, da zatrymańnia prajšoŭ čatyry kursy chimijaterapii.

Jaŭhien Burło

Bubnač hurtu Tor Band. Atrymaŭ na sudzie 8 hadoŭ źniavoleńnia. Prysud vysłuchaŭ na mylicach, bo nie moh stajać. U jaho niekroz tazaściehnavych sustavaŭ, nieabchodna apieracyja. U SIZA ŭ Burło było padazreńnie na ankałahičnuju chvarobu.

Ksienija Łuckina

Žurnalistka, atrymała termin 8 hadoŭ kałonii. Maje puchlinu ŭ hałaŭnym mozhu, jakaja raście i pravakuje ciažkija boli, Ksienija pastajanna prymaje abiazbolvalnyja srodki. Pa słovach blizkich, Łuckinoj patrebna kansultacyja profilnych specyjalistaŭ, dostupu da jakich niama.

Rusłan Słucki

Rejkavy partyzan, asudžany na 11 hadoŭ kałonii. Maje puchlinu hałaŭnoha mozhu, mocnyja boli ŭ śpinie. Pierachvareŭ na zapaleńnie lohkich.

Ściapan Łatypaŭ

Asudžany na 8,5 hoda kałonii. Sud Ivacevickaha rajona pieravioŭ Łatypava na turemny režym adbyvańnia pakarańnia na 2 hady. Palitviaźnia etapavali ŭ mahiloŭskuju turmu № 4.

U lutym 2024 hodu stała viadoma, što Ściapan Łatypaŭ zachvareŭ na cynhu. Cynha byvaje ad niastačy vitaminu S. Pry adsutnaści vitaminu jana moža raźvicca za čatyry tydni, pry niedachopie — za čatyry miesiacy. Na fonie źnižeńnia imunitetu charaktaryzujecca łomkaściu sasudaŭ, krovatačyvaściu dziasien, vypadzieńniem zuboŭ, bolem u kancavinach.

Heta zusim nie poŭny śpis chvorych palitviaźniaŭ. Pra mnohich ludziej nie majuć infarmacyi navat blizkija. Šmat chto pazbaŭleny spatkańniaŭ i inšaj suviazi z vonkavym śvietam. Pra mnohich palitźniavolenych svajaki bajacca davać infarmacyju ŭ ŚMI.

• 1
• 0
• 1
• 0
• 2
• 10
• 8
• 0