Pasoł Dźmitryj Kruty prapanuje karać pradpryjemstvy, jakija niedastatkova ekspartujuć u Rasiju
Pasoł Biełarusi ŭ RF Dźmitryj Kruty zapatrabavaŭ dać prapanovy pa pakarańni pradpryjemstvaŭ, jakija adstajuć ad płanavych tempaŭ rostu ekspartu biełaruskich tavaraŭ u Rasiju. Jon ličyć vinavatymi markietynhavyja słužby hetych kampanij.
Pra heta pasoł zajaviŭ padčas praviedzienaj 28 sakavika videakanfierencyi ŭdzielnikaŭ rabočaj hrupy, jakuju jon uznačalvaje, piša «Kamiersant». U pres-relizie ambasady skazana, što
razmova «atrymałasia žorstkaj, asabliva dla dziaržaŭnych orhanaŭ i arhanizacyj, jakija dapuścili źnižeńnie tempaŭ rostu ekspartu ŭ studzieni-lutym 2024 hoda».
U dyppradstaŭnictvie ŭdakładnili, što na źnižeńnie tempaŭ ekspartnych pastavak upłyvaje pasłableńnie kursu rasijskaha rubla.
«Tłumačcie pa kankretnych pradpryjemstvach, jakija dapuścili takoje nievykanańnie [prahnoznych pakazčykaŭ pa eksparcie]. I adrazu prapanujcie miery, jakija budziem vynosić potym, napeŭna, na ŭzrovień urada pa vynikach pieršaha kvartała… Ja budu ŭnosić prapanovy pa pakarańni členaŭ pracoŭnaj hrupy našaj [pa manitorynhu pastavak u RF], a vy, u svaju čarhu, da hetaha budziecie ŭnosić mnie prapanovy pa pakarańni, u pieršuju čarhu markietynhavych słužbaŭ, namieśnikaŭ pa markietynhu kankretnych pradpryjemstvaŭ», — skazaŭ Kruty.
U kastryčniku 2023 hoda Alaksandr Łukašenka daručyŭ stvaryć kamisiju pa kantroli za ekspartam u Rasiju, jaje ŭznačaliŭ Dźmitryj Kruty. Łukašenka taksama rasparadziŭsia vyznačyć asnoŭnyja pazicyi biełaruskaha ekspartu ŭ Rasiju i manitoryć ich. U studzieni 2024-ha pa vynikach telefonnaj razmovy ź im Uładzimir Pucin paviedamiŭ, što tavaraabarot pamiž dźviuma krainami sa studzienia pa kastryčnik 2023 hoda skłaŭ $42,5 młrd. U lutym biełaruski pasoł paviedamiŭ, što pa vynikach minułaha hoda ekspart u Rasiju vyras na 9,1%, da rekordnych $25 młrd.
Hanna Kanapackaja patłumačyła, čamu nie vydalaje zdymki z BČB-simvolikaj z sacsietak. Vy budziecie śmiajacca4
Kamientary
Tak zvany ambasadar pavodzić siabie jak viertuchaj na zonie