Ilustracyjnaje fota: materiki.ru
Pa słovach Laeniemietsa, dziaržava prymaje miery suprać terarystyčnaha režymu Maskvy, a nie suprać pravasłaŭnych viernikaŭ u Estonii. Raniej ministr prapanavaŭ pryznać RPC terarystyčnaj arhanizacyjaj z-za padtrymki vajny va Ukrainie.
«Dziaržava abaviazanaja abaraniać nasielnictva Estonii ad nastupstvaŭ terarystyčnaha režymu. Pamiž Maskoŭskim Patryjarchatam i Estonskaj pravasłaŭnaj carkvoj Maskoŭskaha patryjarchatu isnuje kananičnaja suviaź — jany źjaŭlajucca častkaj adnaho cełaha i znachodziacca ŭ strohim padnačaleńni. Meta dziaržavy — razarvać usie adnosiny, kananičnyja i jurydyčnyja, tutejšych relihijnych supołak z Maskvoj. Heta toje, što my siońnia abmiarkoŭvali z kiraŭnikom manastyra».
Pa słovach Laeniemietsa, pryjom u manastyry byŭ ciopłym i adkrytym: ministr patłumačyŭ, čamu estonskaja dziaržava ličyć pazicyju Maskoŭskaha patryjarchatu nieprymalnaj, a ihumieńnia raspaviała pra pazicyju manastyra i jaho adnosiny z Maskoŭskim Patryjarchatam.
«Ihumieńnia zapeŭniła mianie, što dla ich zajavy patryjarcha Kiryła ni da čaho nie abaviazvajuć, ale ja ŭpeŭnieny, što abodva baki razumiejuć usiu składanaść situacyi. Pavodle śvieckaha zakanadaŭstva, adździaleńnie manastyra ad Maskoŭskaha patryjarchatu nie ŭjaŭlaje składanaści, ale z punktu hledžańnia carkoŭnaha prava situacyja značna składaniej», — skazaŭ Laeniemiets.
Pa słovach ministra, dziaržava ŭ supracoŭnictvie z carkvoj šukaje jurydyčna i kananična piśmiennyja rašeńni, jakija b nazaŭždy vyklučyli mahčymaść asacyjavać manašak Piuchcickaha manastyra z raspaŭsiudžanymi Maskoŭskim patryjarchatam zajavami, apraŭdvajuć vajnu i hvałt.
«Pakul nie buduć znojdzienyja novyja rašeńni, manastyr budzie praciahvać svaju zvyčajnuju dziejnaść», — padkreśliŭ ministr unutranych spraŭ.
Manastyr znachodzicca ŭ pramym padnačaleńni patryjarcha Kiryła i kirujecca ihumieńniaj Fiłaretaj.
***
Estonskija pravasłaŭnyja padzielenyja na dźvie častki. Ruskich pa pachodžańni i abjadnoŭvaje samakiravanaja Estonskaja pravasłaŭnaja carkva ŭ jurysdykcyi Maskoŭskaha patryjarchata. Paviedamlałasia raniej, što jana abjadnoŭvaje 37 prychodaŭ (kala 150 tysiač čałaviek), 43 śviataroŭ i 17 dyjakanaŭ.
U 1996 hodzie adnaviłasia Estonskaja apostalskaja pravasłaŭnaja carkva ŭ jurysdykcyi Kanstancinopalskaha patryjarchata. Jana naličvaje kala 27 tysiač čałaviek (pieravažna etničnych estoncaŭ) i 64 duchoŭnych asobaŭ.
Čytajcie taksama:
Kiraŭnik MUS Estonii prapanavaŭ pryznać RPC terarystyčnaj arhanizacyjaj
