Rasijanie łamanulisia na majskija ŭ Biełaruś. Ceny na arendu kvater palacieli ŭ kosmas
Viasnoj rasijanie dvojčy adpačyvajuć pa čatyry dni. Pieršy raz — z 28 krasavika pa 1 maja, a potym — z 9 pa 12 maja. Mnohija ź ich vyrašyli pravieści vychodnyja ŭ Biełarusi.
Brest: volnych kvater amal nie zastałosia
Siarod bujnych haradoŭ najbolšym popytam siarod turystaŭ karystajucca Minsk, Hrodna i Brest.
Pahladzim Brest, kudy rasijanie na 9 maja tradycyjna jeduć naviedvać Bresckuju krepaść. Kali na kaniec maja na sajcie Kufar, jaki zamianiŭ biełarusam Booking, tut znachodzicca bolš za 220 prapanoŭ kvater na sutki, to volnych kvater na majskija śviaty zastałosia ŭsiaho 9.
Šalony popyt adbivajecca na cenach. Tak, naprykład, 1-pakajoŭka z dobrym ramontam blizu centra zdajecca za 755 rubloŭ (kala 230 dalaraŭ) za dźvie nočy z 8 pa 10 maja. Na nastupnyja vychadnyja hetuju kvateru možna arandavać za 400 rubloŭ (kala $125) za 2 nočy.
Jość i bolš darahija prapanovy. Dvuchpakajoŭku ŭ centry Bresta za dźvie nočy z 8 pa 10 maja zdajuć za 900 rubloŭ (kala $280). U kvatery mohuć pražyvać maksimum čatyry darosłyja.
Adnapakajoŭku ŭ centry Bresta, jakuju na majskija zdajuć za 600 rubloŭ (kala $185) za dźvie nočy, u zvyčajnyja vychodnyja možna arandavać za 340 rubloŭ (kala $105), a ŭ budnyja dni — pa 300 rubloŭ (kala $90) za dźvie nočy.
Hrodna: ad 120 dalaraŭ za dźvie nočy
Napłyŭ turystaŭ z Rasii taksama adčuvajecca ŭ Hrodnie. Kali na kaniec maja volnymi da zasialeńnia zastajucca bolš za 230 kvater, raźmieščanych na Kufary, to na 9-je volnyja tolki dva dziasiatki.
Kvateru na dźvie nočy z 8 pa 10 maja ŭ Hrodnie možna arandavać pa cenach ad 380 rubloŭ (kala $120). Z apartamientami ŭ centry horada składaniej. Dvuchpakajovaja kvatera sa ścipłym ramontam u samym centry Hrodna zdajecca za 500 rubloŭ (kala $150) za 2 nočy. U zvyčajny pieryjad spynicca ŭ joj na dvoje vychadnych kaštuje 300 rubloŭ (kala $90).
Niekatoryja hatovyja zdavać žytło tolki minimum na 3—5 načej — tak, z 8 pa 13 maja kvateru z dobrym ramontam niepadalok ad centru zdajuć za 1000 rubloŭ (kala $300). U nieśviatočny pieryjad tuju samu kvateru možna arandavać na 5 načej za 520 rubloŭ (kala $160).
Čałaviek, jaki zajmajecca zdačaj kvater u Hrodnie, kaža, što napłyŭ turystaŭ z Rasii adčuvajecca ź minułych vychodnych, tamu ceny na pasutkavuju arendu žytła ŭžo pajšli ŭhoru. Pa vychadnych u ciopły siezon ceny na arendu kvater u horadzie rastuć štohod, ale mienavita na majskija śviaty možna maksimalna «zadrać» ceny.
«U takija dni dobruju kvateru ŭ centry možna lohka zdavać pa 100 dalaraŭ za sutki», — kaža surazmoŭca.
Minsk: kvatery zdajuć minimum na 3—5 načej
U Minsku bolšaść kvater na 9 maja taksama ŭžo zaniatyja. Kali na kaniec maja možna vybirać z amal tysiačy prapanoŭ na Kufary, to na 8—13 maja volnymi zastajucca kala 150. Mnohija arendadaŭcy hatovyja zdavać ich minimum na 3—5 načej.
Tak, naprykład, trochpakajoŭku na Niamizie zdajuć minimum z 8 pa 12 maja. Kali ŭ kvateru zajeduć tolki dva čałavieki, to daviadziecca vykłaści 2280 rubloŭ (kala $700), a kali haściej budzie šeść, to 2600 rubloŭ (kala $800).
Dvuchpakajoŭku ŭ Vierchnim horadzie na 8—10 maja zdajuć za 1020 rubloŭ (kala $310), u zvyčajnyja vychadnyja ŭ hetaj ža kvatery možna pasialicca za 600 rubloŭ (kala $180) za dźvie nočy.
Adnapakajoŭki sa ścipłym ramontam nie nadta daloka ad centru na śviaty zdajuć pa cenach ad 350—400 rubloŭ (kala $110-125) za dźvie nočy.
Kamientary