Lidzija Jarmošyna praviała pres-kanfierencyju, pryśviečanuju vynikam farmiravańnia vybarčych kamisij na miascovyja vybary.
Staršynia Centrvybarkama adznačyła, što siarod pradstaŭnikoŭ palityčnych partyj najbolš asobaŭ u skład vybarčych kamisij trapiła ad Kamunistyčnaj partyi Biełarusi – 75 čałaviek. Dalej iduć: «Spraviadlivy śviet» – 9 (z 21 pretendenta), ŁDPB – 7(z 9), AHP – 4(z 14), Ahrarnaja partyja – 2 čałavieki. Siarod hramadskich arhanizacyj pieršaje miesca pa kolkaści siabroŭ vybarčych kamisij atrymali BRSM – 527 čałaviek, i «Biełaja Ruś» – 517 čałaviek.
Kamientujučy nievialikuju kolkaść pradstaŭnikoŭ apazicyjnych partyj, jakija prajšli ŭ skład vybarčych kamisij, Ł.Jarmošyna nazvała pryčynaj hetaha jurydyčnuju niedaśviedčanaść palityčnych partyj. Jany, nibyta,praz svaje abłasnyja struktury prasoŭvali pradstaŭnikoŭ u vybarčyja kamisii nižejšaha ŭzroŭniu.
«Byŭ parušany pryncyp adpaviednaści. U mahiloŭskaj vobłaści «Spraviadlivy śviet» prapanavaŭ svajho pradstaŭnika. Abłasnaja arhanizacyja ŭ haradskuju kamisiju. Inšyja prykłady takija byli» -- adznačyła kiraŭnik Centrvybarkama. Lidzija Jarmošyna taksama zapeŭniła prysutnych, što
«Mianie nie cikavić palityka. Vyklučna vykanańnie zakonaŭ – Vybarčaha kodeksa. U mianie nijakich pretenzij da orhanaŭ, jakija farmiravali vybarčyja kamisii, niama».
Pradstaŭnik AHP, Ihar Šynkaryk, prakamientavaŭ «NN» vykazvańni staršyni Centrvybarkama: «U našaj partyi nie było vypadkaŭ parušeńnia pryncypa adpaviednaści. Usie viedajuć, što haradskija adździaleńni mahli prapanoŭvać svajho pradstaŭnika tolki ŭ haradskija vybarčyja kamisii.
Ja miarkuju, što ŭsio jak było, tak i budzie. Heta ŭsio tolki kaśmietyčnyja źmieny. Pieršy etap jaskrava ŭsio pakazaŭ. My ŭpeŭnienyja, što ŭ šarahovyja kamisii amal nikoha z apazicyi nie ŭklučać».
