«U adnym łožku». Seksualny skandał vakoł favaryta patryjarcha Kiryła
Mitrapalit Iłaryjon mieŭ składanyja adnosiny sa svaim kielejnikam, jaki jaho ŭ vyniku abakraŭ.
Padrabiaznaści žyćcia mitrapalita Budapiešckaha i Vienhierskaha Iłaryjona (Hieorhija Ałfiejeva), jaki ŭ minułym byŭ pravaj rukoj patryjarcha Kiryła i kiravaŭ Adździełam zamiežnych carkoŭnych suviaziaŭ Maskoŭskaha patryjarchatu, raskazała «Novaja hazieta. Jeŭropa».
U červieni 2022 hoda bieź vidavočnych na toje pryčyn Iłaryjon byŭ adpraŭleny ŭ Vienhryju, što vyhladała jak jaŭnaje panižeńnie. U kastryčniku taho ž hoda ŭ Budapiešt pryjechaŭ 18-hadovy Hieorhij Suzuki, jaki pachodzić z ruska-japonskaj siamji. Niejki čas chłopiec byŭ u pierapiscy ź mitrapalitam i prapanavaŭ siabie ŭ jakaści kielejnika. Iłaryjon pryniaŭ hetuju prapanovu.
Pa słovach Suzuki, ź jakim žurnalistam vydańnia atrymałasia parazmaŭlać, spačatku jon žyŭ u svajoj kielli, ale praź niekalki tydniaŭ mitrapalit prapanavaŭ jamu pierajechać u pakoj svajoj kvatery dla dapamohi pa haspadarcy.
Chłopiec raskazvaje svaju viersiju raźvićcia padziej, jakija pryviali da taho, što jon razam ź mitrapalitam apynuŭsia ŭ adnym łožku, praŭda, da seksualnaha kantaktu nie dajšło.
Hieorhij śćviardžaje, što nie moh supraćstajać 57-hadovamu ŭpłyvovamu mitrapalitu, jaki zapeŭnivaŭ jaho, što jany pavinny žyć razam. U vyniku jany stali rehularna spać u adnym łožku. Kali ž chłopiec pasprabavaŭ vykazać niezadavolenaść, to pačuŭ na svoj adras pahrozy.
Pa słovach Suzuki, paśla hetaha vypadku jon pačaŭ rabić zapisy razmovaŭ ź mitrapalitam, kab zabiaśpiečyć svaju biaśpieku.
U studzieni 2024 hoda Hieorhij Suzuki vyrašyŭ źbiehčy ad mitrapalita. Pry hetym chłopiec prychapiŭ z saboju darahi hadzińnik i hrošy na ahulnuju sumu 30 tysiač jeŭra. Ciapier suprać Suzuki ŭ Vienhryi zaviedziena kryminalnaja sprava. Jon znachodzicca ŭ bazie vyšuku vienhierskaj palicyi.
U razmovie z žurnalistami Suzuki raskazaŭ padrabiaznaści žyćcia mitrapalita ŭ Vienhryi. Pa słovach byłoha kielejnika, čas pamiž niadzielnymi słužbami Iłaryjon pravodzić u padarožžach i jacht-turach.
Hieorhij taksama prysłaŭ žurnalistam zdymak damovy na nabyćcio Iłaryjonam pamieścia płoščaj u 2360 kvadratnych mietraŭ za 2 150 000 jeŭra ŭ pryharadzie Budapiešta.
Na adnym z zapisaŭ, jakija zrabiŭ chłopiec, mitrapalit śćviardžaje, što hrošy na asabniak atrymaŭ ad prodažu svajoj kvatery na maskoŭskim Arbacie i achviaravańniaŭ «sponsaraŭ», jakich zapeŭniŭ u tym, što ich hrošy pojduć na budaŭnictva skita dla manachaŭ.
Vydańnie źviartaje ŭvahu na toje, što mitrapalit Iłaryjon nieadnarazova vystupaŭ u padtrymku rasijskaha zakona ab zabaronie «ŁHBT-prapahandy» i zajavami pra toje, što pry žadańni čałavieka možna «viarnuć» da «tradycyjnaj» aryjentacyi.
Paśla ŭciokaŭ svajho kielejnika ŭ Japoniju da siamji mitrapalit adpraviŭ jamu list z vybačeńniami. Paśla pierapiska źviałasia da handlu ź siamjoj Suzuki adnosna sumy, za jakuju taja pahodzicca zabycca pra toje, što adbyłosia.
U razmovie z žurnalistami Iłaryjon kateharyčna abvierh abvinavačańni ŭ damahańniach i paabiacaŭ padać sudovuju pozvu ab paklopie. Paśla razmovy z «Novaj Hazietaj. Jeŭropa» mitrapalit terminova vylecieŭ u Maskvu.
Niezaležny ekśpiert pa RPC na ŭmovach ananimnaści paćvierdziŭ vydańniu, što ŭ asiarodździ Iłaryjona daŭno chodziać čutki pra jahonyja adnosiny z prysłužnikami. Adnak dziejańni Hieorhija Suzuki, pavodle słoŭ ekśpierta, padobnyja da raspaŭsiudžanaj u carkvie praktyki, kali małady čałaviek dabivajecca davieru ijerarcha i navat šukaje intymnych adnosin ź im dla nastupnaha šantažu.
«Situacyja, kali niejki pasłušnik ucirajecca ŭ davier da archireja, atrymlivaje fatahrafii jaho pryvatnaha žyćcia i potym patrabuje za ich vykup, davoli raspaŭsiudžanaja», — cytuje vydańnie słovy ekśpierta.
U materyjale taksama adznačajecca, što mitrapalit Iłaryjon padčas svajho znachodžańnia ŭ Vienhryi vykonvaŭ rolu pasiarednika pamiž RPC i Zachadam i sustrakaŭsia z vyšejšymi čynami Katalickaj carkvy, u tym liku z Papam Rymskim. U červieni 2023 hoda ŚMI navat pisali ab pasiarednictvie Iłaryjona ŭ pieradačy ŭkrainskich pałonnych Vienhryi.
Na sustrečy Snapkova ź biznesam adzin z zaprošanych zaklikaŭ źniać videazvarot «Nado!» Jak adreahavali astatnija?8
Kamientary