«Pazvaniŭ ministr: Anžalika, kudy ty lezieš?» Byłaja top «Koka-Koły» raskazvaje, jak stała śpikierkaj Kaardynacyjnaj rady
Jašče da pačatku vybaraŭ śpikiera ŭ Kaardynacyjnuju radu 3 sklikańnia favaryt byŭ vidavočny — Anžalika Mielnikava z kamandy Paŭła Łatuški. Byłaja top u «Koka-Kole», jana rašyła pajści ŭ palityku. U intervju «Našaj Nivie» Anžalika raskazała pra siabie: pra vučobu ŭ biełaruskamoŭnaj škole, zvanok ad ministra ŭ 2020-m, ambicyi i praduziataje staŭleńnie, ź jakim sutykałasia.
CT pa biełaruskaj movie na 96 bałaŭ i Coca-Cola Zero
Anžalika rodam ź Niaśviža. Vučyłasia tam u biełaruskamoŭnaj himnazii.
«Vielmi lubiła biełaruskuju movu i litaraturu, bo naša kłasnaja kiraŭnica była nastaŭnicaj mienavita hetych pradmietaŭ», — dzielicca jana.
Na CT Anžalika, darečy, taksama zdavała biełaruskuju movu — atrymała 96 bałaŭ. Advučyłasia na biaspłatnym u Minskim dziaržaŭnym linhvistyčnym univiersitecie na śpiecyjalista pa suviaziach z hramadskaściu.
Na ich śpiecyjalnaści vypusknikam tady vydali svabodnyja dypłomy, i Anžalika razasłała svajo reziume ŭ viadomyja kampanii. U «Koka-Koła Bieŭrydžyz Biełaruś» akurat byŭ patrebny čałaviek ź jaje śpiecyjalnaściu.
«Ja prajšła niekalki etapaŭ sumoŭja. Było testavańnie na viedańnie hramatyki anhlijskaj movy, paśla aŭdziravańnie — budučaja kiraŭnica pradyktavała mnie biznesovy tekst na ruskaj movie, a mnie treba było pieradać jaho pa-anhielsku. Na finalnym etapie intervju pytalisia pra žyćciovyja pohlady, što ja lublu čytać, kab zrazumieć, ci maju kamunikatyŭnyja navyki».
Praŭda, nie ŭsie pavieryli, što maładaja dziaŭčyna zmahła sama ŭładkavacca ŭ takuju viadomuju kampaniju.
«Adzin sa stałych ludziej, jaki pracavaŭ tam daŭno, pryjšoŭ da mianie, sieŭ nasuprać i kaža: «Nu, čyja ty?» Ja ździviłasia: dumała, što kumaŭstvo moža być tolki na niejkich dziaržaŭnych pradpryjemstvach. Toj supracoŭnik skazaŭ: «Nie viedaju, jak ty mahła tak siudy pryjści, ale navat žonka Sanaki Samarasinchi (byłoha pradstaŭnika PRAAN u Biełarusi — «NN») nie prajšła intervju, na druhim etapie adsiejałasia».
U 2016-2018 hadach Anžalika była namieśnicaj hienieralnaha dyrektara kampanii pa suviaziach z hramadskaściu. Aproč raspracoŭki biznes-płanaŭ, jana ŭdzielničała ŭ roznych mierapryjemstvach ź dziaržaŭnymi čynoŭnikami («Koka-Koła» była ŭ kansultatyŭnaj radzie pa zamiežnych inviestycyjach). Anžalika zhadvaje, jak chadziła ŭ Ministerstva ŽKH ź inicyjatyvaj pa pierapracoŭcy butelek — «Koka-Koła» chacieła ŭvieści depazitnuju sistemu, kab čałaviek dapłačvaŭ za ŭpakoŭku, a paśla zdavaŭ jaje za hrošy na pierapracoŭku.
«Zachodžu — a tam siadziać dziadźki za 60 u šera-zialonych pinžakach. I čytajuć sa svaich natatnikaŭ padrychtavany tekst. A ja pryjšła enierhičnaja, z prapanovami, z pryhožaj prezientacyjaj. Mnie padałosia, u pieršyja chviliny jany nie mahli pavieryć, što ja mahu niešta raskazvać, — takaja błandzinka 26-27 hadoŭ. A potym jany adkryli znoŭ svaje natatniki i stali zapisvać za mnoj».
Anžalika raskazvaje, što i jana, i muž-ajcišnik u Biełarusi dobra zarablali. Pabudavali kvateru, mahli adpačyvać siamjoj niekalki razoŭ na hod. Kampaniju žančyna pakinuła, kali była ciažarnaja druhoj dačkoj — rašyła zaniacca siamjoj.
Uśmichajecca i kaža, što «Koka-Kołu» pje dahetul.
«Pju Coca-Cola Zero, bo saču za svajoj fihuraj. I maje dzieci taksama pjuć. Paviercie, čym bujniejšy brend, čym hučniejšaje imia, tym bolšyja patrabavańni da jakaści pradukcyi, stražejšyja normy na vytvorčaści», — baronić brend Anžalika.
«U 2020-m pazvaniŭ ministr, zaprašaŭ pryjechać, kab mnie ŭsio raskazać»
Da 2020-ha Anžalika, jak i mnohija, palitykaj asabliva nie cikaviłasia i hałasavać na raniejšych vybarach nie chadziła. Kali pačalisia pratesty, jana była ŭ Niaśvižy, kudy pierabrałasia na čas karanavirusa.
Uzrušanaja hvałtam na vulicach, jana vykazvałasia ŭ sacsietkach, zapisvała videazvarot da staršyni Niaśvižskaha harvykankama. Joj tady pazvaniŭ Uładzimir Vaščanka, na toj momant ministr pa nadzvyčajnych situacyjach. Jany byli znajomyja, bo «Koka-Koła» rabiła ź viedamstvam sumiesnyja prajekty.
«Jon mnie kazaŭ: «Anžalika, kudy ty lezieš? Što ty robiš, ty ž ničoha nie viedaješ». A što ja pavinna viedać, u mianie što, vačej niama? Kali ludzi ŭ Niaśvižy, ź jakimi my raśli razam, vysypali z hetaha aŭtazaka i źbili svaich ža susiedziaŭ. Nichto ž tam nie byŭ ź pistaletam i kaktejlem Mołatava. Prosta źbili ludziej, nibyta psam skazali «fas».
Vaščanka zaprašaŭ mianie pajechać u Minsk, abiacaŭ za kavaj usio raskazać. A ŭ mianie taki strach byŭ — pastajanna bobiki jeździać, kahości zatrymlivajuć. Kažu: «Nie, dziakuj. Ja nie chaču adrazu adtul pajechać za kraty».
Žančynu dva razy štrafavali pa administracyjnych spravach (adpravić na sutki nie mahli, bo małyja dzieci). Pieršaja administratyŭka była za vialiki marš 16 žniŭnia ŭ Minsku. Kali paśla jaho natchnionaja Anžalika viarnułasia ŭ Niaśviž, to zaklikała haradžan na nastupny marš pajechać u stalicu razam i prapanoŭvała zavieźci achvotnych na svaim aŭto. Pa darozie na nastupny niadzielny marš jaje i zatrymali.
«Z aŭtamatam spynili mašynu, pravodzili da miascovaha RAUS. I tam spytali: «Vy razumiejecie, što nie było dazvołu Minharvykankama, kab ładzić taki marš?» Pamiataju svoj adkaz: «Ja razumieju, što parušyła vaš zakon, ź jakim ja nie zhodnaja, i kali b mnie daviałosia jašče raz pryniać rašeńnie, ja b jašče raz pajechała na hety marš». Mianie papiaredzili, kab bolš nidzie nie ŭdzielničała».
Druhaja administratyŭka była za viełaprabieh sa ściahami ŭ niaśvižskim parku — rolik ź jaho haradžanki vykłali ŭ telehram.
Paśla taho, jak Anžalika dała intervju pra pratesty ŭ małych haradach, joj zacikavilisia ŭ stalicy. Žančynie pieradali praz znajomych, što ŭ Niaśviž pryjazdžali śledčyja ź Minska i zabrali ŭsie dakumienty aktyvistaŭ — u tym liku jaje. Anžalika tady była jašče i administrataram čata — pryznajecca, što vielmi pierapałochałasia i padumała, što budzie lepš za ŭsio pakinuć krainu na niejki čas.
U vieraśni 2020-ha jany siamjoj vyjechali ŭ Kijeŭ.
«Tady ŭ nas nie było vizy, plus karanavirus — niemahčyma prosta tak pajechać za miažu. I pakolki moj muž — ajcišnik, jamu zrabili džob-ofier praz ukrainskuju kampaniju. Tam my niekalki miesiacaŭ pražyli. Ja dva miesiacy nie raspakoŭvała sumak, bo zdavałasia, što rozum pieramoža i my ŭsie vierniemsia dadomu.
Potym my pajechali ŭ Polšču pa IT-prahramie Poland. Business Harbour. Jašče adna pryčyna, čamu my vybrali Polšču — u mianie polskija karani. Ja adrazu atrymała tut pastajanny dazvoł na žycharstva. Nie mieła karty palaka, zaŭsiody adčuvała siabie biełaruskaj, ale ŭ baćki byli dakumienty, dzie paznačana, što babula źjaŭlajecca polkaj», — tłumačyć žančyna.
«Moža, ty b pafarbavała vałasy ŭ ciomny koler?»
Siamja niejki čas žyła ŭ Biełastoku. Anžalika zajmałasia dziećmi i paralelna vučyłasia — prajektnamu mieniedžmientu ŭ IT, polskaj movie.
«U Biełastoku ja pracavała z fondam «Biełaruś 2020». Ja zhaładałasia pa pracy. My ź siabroŭkaj Marynaj Laščeŭskaj dapamahali ŭciekačam. I kali jašče žyła ŭ Biełastoku, ja dapamahała kamandzie Łatuški — pisała teksty, rabiła pierakłady. Ja płanavała pierajechać u Varšavu.
Jašče sa svajho žyćcia ŭ Biełarusi ja viedała Lenu Žyvahłod, ich kamanda była našym padradčykam, rabiła markietynhavyja mierapryjemstvy dla «Koka-Koły». I kali jana pakinuła Narodnaje antykryzisnaje ŭpraŭleńnie, ja zaniała miesca prajektnaha mieniedžara», — raskazvaje Anžalika, jak u 2022-m dałučyłasia da NAU. Kaža, što jaje zaprasili ŭ kamandu, pakolki jana mahła razmaŭlać na sustrečach z partniorami i pa-polsku, i pa-anhielsku, i pa-biełarusku.
Efiektnaja błandzinka, u palitycy jana paru razoŭ sutykałasia z praduziatym staŭleńniem da siabie praz vyhlad.
«Moža, žartam, ale mnie skazaŭ adzin mužčyna: «Anžalika, moža, ty b pafarbavała vałasy ŭ ciomny koler? U ciabie ž hałava razumnaja, dobra pracuješ. A ź pieršaha pohladu — błandzinka ŭ šakaładzie». Ja adkazała, što Ivanka Tramp i Ursuła fon der Lajen taksama błandzinki i heta im nie pieraškadžaje być u palitycy».
Inšuju zaŭvahu Anžalika pačuła ad žančyny, jakaja šmat hadoŭ u demakratyčnym ruchu: «U ciabie ž dzietki, zajmajsia imi. Čaho ty lezieš u palityku?».
«Ja adkazała joj, što, pa-pieršaje, dzieci dyscyplinujuć, i ŭ mianie niama prablemy z tajm-mieniedžmientam. A pa-druhoje, ja vielmi spadziajusia, što našy ludzi, jakija zmahajucca za demakratyčnuju niezaležnuju dziaržavu, nie buduć naviešvać łejbły i ličyć, što paśla taho, jak žančyna ŭstupiła ŭ šlub i naradziła dziaciej, jana nie moža zmahacca za budučyniu svaich dziaciej i być aktyŭnaj u biznesie i palityčnym žyćci».
«Usie pasiadžeńni budu vieści na biełaruskaj movie»
Čamu jana rašyła pajści ŭ śpikiery Kaardynacyjnaj rady, niahledziačy na mahčymyja pahrozy z boku biełaruskich uładaŭ?
«Hetyja pahrozy byli i raniej. Jak kaža Pavieł Paŭłavič [Łatuška], kali jość užo piać [kryminalnych] spraŭ, to niama sensu ich ličyć. My ŭ baraćbie, i nazad darohi niama. I ja taki čałaviek: kali ŭžo ŭziaŭ mieč, to siačy. Ja pajšła ŭ KR nie tolki tamu, što ja takaja śmiełaja, ale i tamu, što razumieła, što heta budzie nie pryznačany, a abrany orhan.
Kali Pavieł Paŭłavič prapanavaŭ mnie stać čaliniaj śpisu, to ja adrazu pahadziłasia. Tamu što, pa-pieršaje, ja pavažaju Paŭła Paŭłaviča jak čałavieka, dypłamata, metanakiravanaha prafiesijanała. I ja padumała, što jon dapamoža navieści šorachu ŭ Kaardynacyjnaj radzie ŭ pazityŭnym sensie. Jon moža prymusić pracavać hetu strukturu. A pa-druhoje, ja baču pierśpiektyvu raźvićcia Kaardynajcyjnaj rady jak instytuta, alternatyŭnaha parłamientu Łukašenki».
Anžalika ličyć, što tak jana zmoža zmahacca za svabodu palitviaźniaŭ, adnaŭleńnie spraviadlivaści, niezaležnaść našaj krainy.
Ci nie adhavorvaŭ muž iści ŭ palityku?
«Jon vielmi chutka pierastaŭ padtrymlivać maju aktyŭnaść i raździalać pohlady. My raźvialisia. I ciapier navat nie razmaŭlajem pra palityku. Z druhoha boku, my razam kłapocimsia ab dzieciach, i ja z pavahaj staŭlusia da jaho jak da baćki svaich dačok, a jon da mianie — jak da maci. U nas narmalnyja cyvilizavanyja adnosiny. Ščyra, mnie pakul ciažka havaryć ab hetym, choć raźvialisia bolš za hod tamu», — dzielicca Anžalika.
U biełaruskaj apazicyi jana simpatyzuje Paŭłu Łatušku i Uładzimiru Astapienku: «Daśviedčanyja dypłamaty, jakija viedajuć, jak naładzić pracesy efiektyŭna».
A na pytańnie, jakoje chvalavała niekatorych kamientataraŭ «Našaj Nivy» — na jakoj movie buduć pasiedžańni KR, — adkazvaje:
«Ja biełaruska, ja lublu svaju radzimu i svaju movu, i ŭsie pasiadžeńni i zvaroty ad imia KR budu rabić na biełaruskaj movie.
Kamientary
Ale pryhožaja - ja b zadanaciŭ!