Biełarusaŭ viarbujuć na vajnu pad vyhladam pošuku supracoŭnikaŭ «na vachtu»
«Sadova-parkavaje pradpryjemstva zaprašaje mužčyn na vachtu ŭ Rasiju. Adnarazovaja vypłata — 46 700 rubloŭ, zarobak — 7550 rubloŭ na miesiac», — rekłamnyja ŭlotki z takim tekstam trapili ŭ paštovyja skryni niekatorych minčukoŭ. Niezvyčajna vialiki zarobak i adnarazovaja vypłata zdalisia dla Biełarusi nadta dziŭnymi. Žurnalist «Lusterka» pasprabavaŭ uładkavacca pa abjavie, i voś što z hetaha vyjšła.
«Hałoŭnaje — havaryć, što skarhaŭ niama»
Va ŭlotcy, fota jakoj dasłaŭ «Lusterku» čytač, havorycca, što na pracu zaprašajuć mužčyn z 18 da 65 hadoŭ. Pracavać prapanujuć na vachcie ŭ Rasii na niejkim «sadova-parkavym pradpryjemstvie», nie ŭdakładniajučy, na jakim mienavita. Da vysokaha zarobku i adnarazovaj vypłaty abiacajuć biaspłatny tranśfier na miesca pracy.
Na zadnim fonie abjavy — mužčyna ŭ kamuflažy i sa zbrojaj u rukach. Siarod kantaktaŭ paznačany ŭ tym liku i biełaruski numar. Žurnalist Lusterka» napisaŭ pa im.
«Kantrakt ź Ministerstvam abarony Rasii, — havaryłasia ŭ adkazie. — Ja pieradam vaš kantakt zakazčyku, jon źviažacca z vami ŭ najbližejšy čas, usio padrabiazna raskaža», — havaryłasia ŭ adkazie.
«Zakazčyk» adkazvaŭ nie chutka. Prajšło bolš za sutki — i narešcie jon vyjšaŭ na suviaź. Dla pačatku ŭdakładniŭ, ci sapraŭdy jość cikavaść da słužby pa kantrakcie ŭ rasijskaj armii, i paabiacaŭ adkazać na ŭsie pytańni.
U pieršuju čarhu zapytalisia pra finansavyja ŭmovy. Toje, što paviedamiŭ viarboŭščyk, praktyčna całkam supała z abiacanym u abjavie.
«Rehijanalnaja vypłata adnačasova — 700 tys. rubloŭ [krychu bolš za 25 tys. biełaruskich, tut i dalej suma paznačanaja ŭ pieraliku pa kursie Nacbanka na 25 lipienia. — Zaŭv. «Lusterka»], fiederalnaja — 195 tys. [7 tys. rub.]. Pry najaŭnaści strachoŭki možam pracaŭładkavać (heta farmalnaść, paśla atrymańnia vypłaty vy zvolniciesia), i tady ad pracy — jašče 400 tysiač [14,4 tys.]. Hrašovaje zabieśpiačeńnie ŭ zonie SVA — ad 210 tysiač [7,5 tys.] u miesiac, — paviedamiŭ surazmoŭca i pierajšoŭ da pieraličeńnia vypłat pry ranieńni abo śmierci. — U vypadku ranieńnia, u zaležnaści ad ciažkaści, — da troch miljonaŭ [107 tys.], a ŭ vypadku hibieli svajaki atrymajuć 12 miljonaŭ [467 tys.].
Paśla rekrucior pierajšoŭ da pieraličeńnia farmalnaściaŭ, nieabchodnych biełarusu dla zaklučeńnia kantraktu z rasijskaj armijaj.
«Vam budzie patrebien ŚNIŁS (rasijski numar sacyjalnaha strachavańnia), identyfikacyjny numar padatkapłacielščyka i bankaŭskaja karta «Mir». Usio heta my dapamožam zrabić, kali pryjedziecie. Rehistracyju na terytoryi Rasii my aformim, raźmieścim vas u žyllo na čas afarmleńnia», — paabiacaŭ surazmoŭca.
Što tyčycca patrabavańniaŭ da stanu zdaroŭja kandydata, to jany akazalisia nie vielmi strohimi.
— Hałoŭnaje — adsutnaść VIČ, hiepatytu B abo C, a taksama sifilisu, — skazaŭ viarboŭščyk.
— Ja ŭžo niemałady, niejkija prablemy tak ci inakš jość. Dumajecie, ja prajdu miedahlad? — udakładniŭ žurnalist «Lusterka».
— Hałoŭnaje — kazać, što skarhaŭ niama, — upeŭniena adkazaŭ rekrucior. — Budzie tolki ahlad terapieŭta ŭ vajenkamacie, tam ža voźmuć kroŭ na analiz i ŭsio.
«Słužyć budziecie, pakul nie skončycca SVA»
Taksama jon paviedamiŭ, što «pracavać» treba budzie nie na terytoryi Rasii, jak było paznačana ŭ abjavie, a va Ukrainie.
— Usio zaležyć ad vašych navykaŭ, ale, jak praviła, heta motastrałki, — udakładniŭ «kadravik» rasijskaha vojska. — Kantrakt zaklučajecca na termin ad adnaho hoda, ale ŭ lubym vypadku słužyć budziecie, pakul nie skončycca SVA. Paśla zaklučeńnia kantrakta možacie atrymać u sproščanym paradku hramadzianstva Rasii, kab u Biełarusi nie pryciahnuli da kryminalnaj adkaznaści.
— Chiba byli vypadki, što kahości pryciahvali?
— Nu, zakony to jość, — adkazaŭ surazmoŭca, dadaŭšy paśla paviedamleńnia ŭśmiešlivy smajlik.
— Mnie zdajecca, biełaruskija siłaviki nie čapajuć tych, chto vajuje za rasijan.
— Zhodzien, precedentaŭ nie było, — kanstatavaŭ rekrucior.
— Ci jość mahčymaść trapić da svaich biełarusaŭ u čaść? Šmat tam našych naohuł u vas?
— Dastatkova, ale asobnaj biełaruskaj čaści ci padraździaleńnia niama. Kali jość znajomyja, možacie ŭziać «otnošienije» i adpravicca da ich.
Na ŭdakładniajučaje pytańnie ab tym, što takoje «otnošienije», surazmoŭca patłumačyŭ, što «heta papiera na kankretnuju pasadu ŭ kankretnuju čaść».
Adsutnaść u žurnalista «Lusterka» vajskovaj śpiecyjalnaści i dośviedu słužby ŭ vojsku rekruciora rasijskaha Ministerstva abarony nie źbiantežyła. Jon paabiacaŭ, što ŭ vypadku zaklučeńnia kantraktu možna budzie prajści navučańnie «ad dvuch tydniaŭ da dvuch miesiacaŭ nie ŭ zonie SVA».
Čały: Čym daŭžej Łukašenka marudzić z vybarami, tym bolš arhumientaŭ, kab jamu nie iści3
Kamientary