Prymać testasteron tak kajfova. Ale mužčyny paśla horka raspłačvajucca
Preparat, jaki byŭ raspracavany dla lačeńnia harmanalnaj dysfunkcyi, ciapier usio čaściej vykarystoŭvajecca mužčynami, kab skinuć vahu, palepšyć muskuły, być na pazityvie i palepšyć vyniki ŭ spalni. Ale nastupstvy žachlivyja.
Testasteron — heta asnoŭny mužčynski harmon, jaki adyhryvaje klučavuju rolu ŭ farmiravańni mužčynskich charaktarystyk, adkazvaje za raźvićcio druhasnych pałavych prykmiet, takich, jak rost vałasoŭ na ciele, tembr hołasu i pavieličeńnie myšačnaj masy, a taksama ŭpłyvaje na libida.
Najbolšaja kolkaść testasteronu vypracoŭvajecca ŭ padletkavym uzroście, kali adbyvajecca pałavoje paśpiavańnie i farmujecca ciełaskład. Z uzrostam uzrovień hetaha harmonu ŭ kryvi mužčyn pastupova źnižajecca, dasiahajučy minimalnych značeńniaŭ prykładna da 50 hadoŭ.
Dla lačeńnia jak hipahanadyzmu (niedastatkovaj vypracoŭkaj ułasnaha pałavoha harmonu), tak i źviazanych ź im izalavanych simptomaŭ va ŭsim śviecie šyroka vykarystoŭvajecca zamiaščalnaja terapija, pry jakoj testasteron uvodzicca ŭ arhanizm.
Tryvožnym aśpiektam hetaj tendencyi, jak adznačajuć navukoŭcy, źjaŭlajecca toje, što heta adbyłosia amal bieź jakich-niebudź surjoznych navukovych dokazaŭ ab pieravahach i ryzykach dadzienaj terapii.
Druhaja hrupa aktyŭnych spažyŭcoŭ štučnaha testasteronu i sintetyčnych anabaličnych steroidaŭ — zdarovyja mužčyny, mnohim ź jakich ad 30 da 40 hadoŭ, jakija imknucca źmianić svoj vyhlad.
Ahresiŭny markietynh preparataŭ testasteronu, jaki padahravajecca vobrazami supierhierojaŭ ź filmaŭ i ŭpłyvovych asob sacyjalnych sietak, akazaŭsia vielmi efiektyŭnym, asabliva ŭ Złučanych Štatach, dzie z 2010 hoda kolkaść receptaŭ na testasteronu cypijanat (injekcyjnaja forma harmona) uzros u vosiem razoŭ.
U šmatlikaj rekłamie preparatu havorycca ab tym, što narmalny ŭzrovień testasteronu dazvalaje naroščvać myšačnuju masu, pavialičyć ciahavitaść i zdolnaść arhanizma pieranosić vysokija fizičnyja nahruzki, bolš efiektyŭna pazbaŭlacca ad tłušču, padtrymlivać na vysokim uzroŭni libida i zabiaśpiečyć aptymalnuju ščylnaść kaścianoj tkaniny, pazbavicca depresii i zachoŭvać pazityŭny nastroj i aptymizm.
Jakija ryzyki pryjomu testasteronu
Pa ironii losu, štučna vyklikanaja hetym steroidam mužnaść moža źvieści kolkaść śpiermatazoidaŭ u mužčyny da nula. Bolš za toje, navukoŭcy razhladajuć varyjant pryznačeńnia ekzahiennaha testasteronu ŭ jakaści srodku mužčynskaj kantracepcyi.
Śpiecyjalisty zapeŭnivajuć, što ŭ mnohich mužčyn paśla spynieńnia prymianieńnia preparataŭ testasteronu śpiermatahieniez čaściej za ŭsio viartajecca da zychodnaha ŭzroŭniu na praciahu 6—18 miesiacaŭ paśla spynieńnia terapii.
Ličycca, što vierahodnaść raźvićcia biaspłodździa i stupień parušeńniaŭ zaležać ad doz i praciahłaści terapii, formy preparatu (naprykład, hieli dla naniasieńnia na skuru ŭ hetym płanie bolš biaśpiečnyja, čym injekcyi). U niekatorych vypadkach parušeńnie fiertylnaści stanovicca niezvarotnym.
Miedyki-repraduktołahi paviedamlajuć ab rezkim roście kolkaści par, jakija nie mohuć zaciažaryć, tamu što mužčyna prymaje harmon, jaki źnižaje kolkaść naturalnaha testasteronu, što vypracoŭvajecca arhanizmam.
Siarod niehatyŭnych nastupstvaŭ terapii testasteronam śpiecyjalisty nazyvajuć pavyšanuju ryzyku ŭskładnieńniaŭ zachvorvańniaŭ sardečna-sasudzistaj sistemy i rańnich infarktaŭ, rost adenomy prastaty, policytemiju (rost kolkaści čyrvonych kletak kryvi), jakaja pavyšanaje ryzyku ŭtvareńnia trobmaŭ.
Akramia taho, niekatoryja mužčyny, jakija prymajuć hety steroid, skardziacca na pabočnyja efiekty: biassońnica, tryvožnaść, pryščy, pavyšeńnie arteryjalnaha cisku, a taksama poŭnuju stratu adčuvańniaŭ padčas seksu.
Navukoŭcy zaścierahajuć — testasteronavuju terapiju nielha pravodzić, kali ŭ čałavieka jość rak prastaty abo rak małočnaj załozy. Taksama jość niekalki stanaŭ, pry jakich treba być aściarožnym z hetaj terapijaj. Naprykład, kali ŭzrovień PSA vyšejšy za 4 nh / mł (abo 3 nh / mł u mužčyn z vysokaj ryzykaj raku prastaty), hiematakryt vyšejšy za 50%, jość surjoznyja prablemy z mačavypuskańniem z-za pavialičanaj prastaty ci kali ŭ čałavieka drenna kantralavanaja sardečnaja niedastatkovaść ci apnoe snu.
Adnak nie ŭsie, chto ŭžyvaje preparaty testasteronu, hatovy ad jaho admovicca, bo spynieńnie pryjomu moža pryvieści da tydniaŭ stomlenaści i depresii, pakul arhanizm zmoža adnavić ułasnuju jaho vytvorčaść.
Jak naturalnym čynam pavysić uzrovień testasteronu
Kab naturalnym čynam pavysić uzrovień testasteronu, važna prytrymlivacca niekalkich klučavych rekamiendacyj. Rehularnyja fizičnyja praktykavańni, asabliva siłavyja treniroŭki, mohuć značna pavysić uzrovień hetaha harmonu.
Važnuju rolu taksama adyhryvaje pravilnaje charčavańnie, jakoje praduhledžvaje ŭklučeńnie ŭ racyjon dastatkovaj kolkaści białkoŭ, tłuščaŭ i vuhlavodaŭ, paźbiahajučy strohich dyjet i haładańnia.
Padtrymańniu zdarovaha ŭzroŭniu testasteronu sadziejničaje źnižeńnie stresu. Tamu pieradusim rekamiendujecca dobry son, a taksama mietady rełaksacyi, takija, jak miedytacyja i joha.
Važnuju rolu ŭ vytvorčaści testasteronu adyhryvaje vitamin D, tamu treba staracca bolš času pravodzić na soncy ci prymać dabaŭki. Vitaminy i minierały, takija, jak cynk i mahnij, taksama mohuć sadziejničać pavyšeńniu ŭzroŭniu hetaha harmonu.
Padtrymlivać uzrovień testasteronu na aptymalnym uzroŭni dapamoža zdarovy ład žyćcia, jaki ŭklučaje admovu ad ałkaholu i kureńnia, a taksama kantrol vahi.
U Minsku zatrymali partnioraŭ Maziepina pa «Urałkalii», adnych z samych bahatych biełarusaŭ Rasii5
Kamientary
Nie toje što nie moža ŭžo kinuć pałku, a i ledźvie chodzić.