Delehacyja Mahiloŭskaj rehijanalnaj kaalicyi hramadzka-palityčnych siłaŭ vypraviłasia ŭ Miensk pryniać 26 žniŭnia ŭdzieł u pasiedžańni štabu lidara demakratyčnaj apazycyi Alaksandra Milinkieviča. Abmierkavaŭšy skłaŭšujusia za apošnija miesiacy sytuacyju, mahiloucy pryznali pracu abjadnanaha štabu niezdavalniajučaj. Hutarka nie pajšła pra ultymatum, ale mahiloŭskija demakraty chacieli pačuć kankretnyja prapanovy pastupovych dziejańniaŭ u bližejšyja vosieńskija miesiacy. U advarotnym vypadku, pa słovach kaardynatara mahiloŭskaj kaalicyi Alaksandra Siłkova, abjadnanyja rehijanalnyja struktury pačnuć vypracoŭvać svaju stratehiju niezaležna ad centru.
Cikava, što na svaim kuluarnym pasiedžańni adrazu niekalki pradstaŭnikoŭ roznych palityčnych partyjaŭ upeŭniena zajavili, što ciapier adbyvajecca sproba vykinuć Milinkieviča z palityčnaha pola. Adzinahałosna mahileŭskija palityki pryjšli da vysnovy, što hetaha dapuścić nielha, tamu „adzinamu» kandydatu jany vykažuć padtrymku. Ale ŭ toj ža čas mahiloŭcy padkreślili, što pačaŭšy rychtavacca da miascovych vybaraŭ jašče dva miesiacy tamu, jany stvaryli bolš zrazumiełuju i tryvałuju za centralnyja ofisy strukturu.
Tydzień tamu rehijanalnaja kaalicyja zajmieła abłasny status. Z pradstaŭnikami rajonnych supołak padpisvajucca damovy ab supracoŭnictvie. Takim čynam, raźvivajucca „haryzantalnyja» suviazi, a demakratyčnych „viertykalaŭ» mahiloŭcy stvarać bolej nia buduć. Pa mierkavańni Siłkova, u hetym i jość sens demakratyi, da razumieńnia jakoha miascovyja aktyvisty išli 12 hadoŭ. Svajo bačańnie dalejšaha raźvićcia rehijonu padpisanty kaalicyi vykładuć Milinkieviču.
