Pierapynak budzie tryvać ciaham razhladu skarhi Julii Cimašenki. Na razhlad pazovu praduhledžana dva dni.
Vyšejšy administracyjny sud Ukrainy (VASU) pryniaŭ da razhladu skarhu Julii Cimašenki na vyznačeńnie vynikaŭ prezidenckich vybaraŭ. Sud častkova zadavoliŭ chadajnictva Cimašenka, prypyniŭšy dziejańnie rašeńni CVK pa vyznačeńni vynikaŭ dla zabieśpiačeńnia pazovu, heta značyć, da zakančeńnia razhladu skarhi pa sutnaści.
U vyznačeńni VASU, vyniesienym sudździoj-dakładčykam pa spravie Alaksandram Niečytajłam, adznačajecca, što razhledzieŭšy chadajnictva Cimašenka ab mierach pa zabieśpiačeńni pazovu, sud vyznačyŭ: «Prypynić dziejańnie rašeńnia Centralnaj vybarčaj kamisii pa vyznačeńni vynikaŭ paŭtornaha hałasavańnia na vybarach prezidenta Ukrainy i abrańnia Janukoviča V.F . prezidentam Ukrainy, jakoje aformlena pratakołam CVK ad 14.02.2010h., da zaviaršeńnia razhladu dadzienaj administracyjnaj spravy».
U zadavalnieńni astatnich patrabavańniaŭ chadajnictva Cimašenka sud admoviŭ, bo Janukovič «nie źjaŭlajecca adkazčykam pa spravie, u suviazi z čym u sudu niama pravavych padstaŭ dla zabarony na ździajśnieńnie im peŭnych dziejańniaŭ».
Na razhlad pazovu praduhledžana 2 dnia. Chutčej za ŭsio, pasiadžeńnie budzie prachodzić u adkrytym režymie, z udziełam presy.
Nahadajem, što Centralnaja vybarčaja kamisija Ukrainy aficyjna abviaściła lidera Partyi rehijonaŭ Viktara Janukoviča pieramožcam prezidenckich vybaraŭ. Inaŭhuracyja novaabranaha prezidenta krainy maje adbycca 25 lutaha 2010 h.
