Były palitviazień i błohier Vadzim Jermašuk uładkavaŭsia pracavać u kramu žanočaha adzieńnia na haradzienskim rynku «Karona». Raniej jon sprabavaŭ znajści pracu praz Centr zaniataści — jamu prapanoŭvali ciažkuju fizičnuju pracu, jakoj paśla apieracyj Vadzim nie moža zarablać, piša Hrodna.life.
Hrodna.life zrabiła materyjał na adkrytych krynicach i nie źviazvałasia dla jaho z samim błohieram. Jany zrabili jaho, kab pakazać, z čym sutykajecca były palitviazień, jaki zastajecca ŭ Biełarusi.
Pra źmieny ŭ žyćci Vadzim raskazvaje ŭ siabie ŭ sacsietkach. Jon pracuje ŭ kramie Street Style na rynku «Karona». Jon kliča da siabie pa pakupki žančyn usich uzrostaŭ. «Chaču ŭžo ŭklučyć hetaha stylista. Fashion is my profession. Dziaŭčynki, budu vielmi rady vas bačyć», — skazaŭ jon. Da zatrymańnia jon pracavaŭ na tym ža rynku, ale ŭ inšym paviljonie. Jaho zakryli.
Paśla vyzvaleńnia Vadzim pravioŭ šmat času na balničnych. Jon padaŭ zajavu na dapamohu ŭ suviazi ź ciažkim materyjalnym stanoviščam. Pavodle jaho, jamu pavinny dać 200−250 rubloŭ. Błohier źbiraŭsia vydatkavać ich na lačeńnie zuboŭ paśla kałonii.
U Centry zaniataści ž jamu prapanoŭvali pracu ŭ zaaparku: pa vyrazie Vadzima — «h****no vazić». Uličvajučy, što mužčyna pieranios niekalki apieracyj praz ankałohiju, takaja praca jamu nie pasuje. Taksama Vadzim pavinien adznačacca ŭ miascovym RAUS jak adbyły pakarańnie. Ułady prymusili jaho zdać peŭnuju kolkaść makułatury. Jermašuk zdaŭ, a paśla raspavioŭ u storys, kolki hrošaj za heta atrymaŭ — jamu chapiła na cyharety i niekalki sasisak.
Viartańnie da błohinhu
Pieryjadyčna ŭ błohiera jość zhadki miascovaha biznesu — mahčyma, heta rekłama. Sam jon pryznajecca, što pierastaŭ razumieć Instagram paśla taho, jak nie karystaŭsia im try hady.
«Ja, napeŭna, niejki kałhaśnik staŭ u Instagram abo što. Ja prosta pakazvaju siabie, pakazvaju, jak ja žyvu, čym ja zajmajusia. A ciapier, ja hladžu, niejkija tam modnyja trendy. Modnyja tam usie, takija niejkija vidziuški piłujuć. Ale ja nie baču tam ludziej. Ja baču tam niejkich robataŭ, jakija paŭtarajuć za kimści niešta. A čamu my ŭsie honimsia za niejkimi trendami? Heta typu łajki nabrać ci što? Usio ž taki, mnie zdajecca, Instagram stvorany, kab realizavać čałavieka, pakazać jaho mahčymaści, jakaści i zdolnaści. I hałoŭnaje, kab čałavieka cikava było hladzieć, a nie zadavany trend kimści», — dzialiŭsia błohier u sacsietkach.
Taksama jon skazaŭ, što nie moža viesialicca i skakać, pakul jamu baluča «ad mnohaha, što adbyvajecca». A «biesić» jaho paśpiachovaść na «pakazuchu» — koŭčy, biźniesmieny.
Taksama Vadzim raspavioŭ, što inšyja hrodzienskija błohiery jaho paźbiahajuć. Jon nazvaŭ piać imionaŭ. «Što ja hetym błohieram našym hrodzienskim zrabiŭ? Tak raniej byccam by siabravali, a ciapier prosta biahuć ad mianie. Bajacca mianie».
Ale jość i tyja, chto maje znosiny z Vadzimam i dapamahaje jamu. «Ludzi pakazvajuć siabie z takoha boku. Vy paviercie, kali b z kim-niebudź z našaj tusoŭki — u nas było 10 čałaviek — što-niebudź zdaryłasia, ja b žopu rvaŭ. <…> A tak, bačycie, jany chucieńka pieraabuvajucca. Ale ludzi zaŭsiody ŭmiejuć pieraabuvacca. Pahladzicie, budzie čas, kali ŭsie buduć pieraabuvacca, ja ŭ hetym upeŭnieny».
-
«Ničoha nie zdarycca z maimi dziećmi, kali jany nie pračytajuć Barto, Maršaka, Čukoŭskaha». Hutarka sa stvaralnicaj błohu «Knižnyja razmovy»
-
«Interjery z Pinterest» i «ceny jak u Vieniecyi». U Hrodnie na miescy źniesienaha histaryčnaha budynka adkryli daraženny bucik-hatel
-
«Mianie vielmi mocna niepakoić, čyjo jano». Historyja biełarusa, jakomu ŭ Polščy pierasadzili novaje serca
Ciapier čytajuć
Ad BNF da HRU. Chto takaja Natalla Sudlankova, jakoj čechi zahadali pakinuć krainu25
Kamientary