U 2009 hodzie salda zamiežnaha handlu tavarami i pasłuhami pa mietadałohii płaciežnaha bałansu admoŭnaje i skłała 5 młrd. 550,5 młn. dalaraŭ, paviedamlaje Nacyjanalny statystyčny kamitet.
Abjom zamiežnaha handlu tavarami i pasłuhami skłaŭ 55,2 młrd. dalaraŭ, što na 29,9% mienš, čym u 2008 hodzie. U tym liku ekspart — 24,8 młrd. (na 33% mienš), impart — 30,4 młrd. (na 27,1% mienš).
Zhodna z prahnozam sacyjalna‑ekanamičnaha raźvićcia, pa vynikach 2009 hoda admoŭnaje zamiežnahandlovaje salda
nie pavinna było pieravysić 1,5 młrd. dalaraŭ.
Pavodle mietadałohii handlovaha bałansu, jakaja ŭličvaje źviestki Dziaržaŭnaha mytnaha kamiteta, u 2009 hodzie admoŭnaje salda zamiežnaha handlu tavarami sfarmiravałasia ŭ pamiery 7 młrd. 281,4 młn. dalaraŭ (u 2008 hodzie — minus 6 młrd. 810,5 młn.).
Asnoŭnaj krynicaj farmiravańnia admoŭnaha salda zamiežnaha handlu tavarami Biełstat nazyvaje ekspartna‑impartnyja apieracyi z pramiežkavymi tavarami (enierhanośbity, syravina, materyjały i kamplektujučyja). Za 2009 hod u krainu ŭvieziena pramiežkavych tavaraŭ na 20,8 młrd. dalaraŭ (na 28,1% mienš, čym za 2008 hod). Ekspart pramiežkavych tavaraŭ skłaŭ 15 młrd. dalaraŭ, što ŭ 1,6 razu mienš za ŭzrovień 2008 hoda.
Bolš za 50% koštavaha abjomu ekspartu i impartu pramiežkavych tavaraŭ składajuć enierhietyčnyja tavary. Na zamiežny rynak ich pastaŭlena na 7 młrd. 844,1 młn. dalaraŭ, što na 33,9% mienš, čym u 2008 hodzie. Impart enierhietyčnych tavaraŭ skłaŭ 11 młrd. 222,1 młn. dalaraŭ, skaraciŭšysia na 19,1%. Salda źniešniaha handlu enierhanośbitami skłałasia admoŭnaje ŭ abjomie 3 młrd. 378 młn. dalaraŭ, što na 1 młrd. 378,1 młn. bolš za pakazčyk za 2008 hod.
Vieličynia admoŭnaha salda handlu spažyvieckimi tavarami ŭ 2009 hodzie źmienšyłasia na 825,9 młn. dalaraŭ u paraŭnańni z 2008‑m i skłała minus 529,1 młn. dalaraŭ.
Farmiravańnie admoŭnaha salda zamiežnaha handlu spažyvieckimi tavarami abumoŭlena vynikam ekspartna‑impartnych apieracyj pa niecharčovaj hrupie tavaraŭ. Vieličynia admoŭnaha salda pa hetaj hrupie skłała 1 młrd. 122,9 młn. dalaraŭ, u 2008 hodzie — 1 młrd. 492,3 młn. dalaraŭ.
Zamiežny handal charčovymi tavarami ŭ 2009 hodzie charaktaryzavaŭsia stanoŭčym značeńniem salda, vieličynia jakoha skłała 593,8 młn. dalaraŭ. U paraŭnańni z 2008 hodam jana pavialičyłasia na 456,5 młn. dalaraŭ, abo ŭ 4,3 razu.
