Staršynia Hramadskaj rady pa maralnaści Mikałaj Čarhiniec patrabuje zładzić papiaredni prahlad prahramy, jakuju hurt choča pradstavić biełaruskaj publicy.
Mikałaj Čarhiniec, photo.bymedia.net/
«Ja razumieju, što ŭžo pradadzieny bilety na kancert u Minsku. Tamu treba zrabić papiaredni prahon prahramy, uzhadnić jaje, kab nie było prapahandy amaralnaści i hvałtu na minskaj scenie», — cytuje słovy Čarhinca «Interfaks».
19 lutaha Hramadskaja rada pa maralnaści razhledzieła pytańnie ab praviadzieńni 7 sakavika ŭ Minsku kancerta hurtu Rammstein. Z hetaj nahody była raspaŭsiudžana zajava, u jakoj niamieckija muzyki abvinavačvajucca ŭ prapahandzie nacyzmu i raspusty.
«Što hety hurt budzie rabić u Biełarusi?», — stavicca pytańnie ŭ zajavie. I dajecca adkaz:
«Jany buduć kryšyć i źniščać jašče vielmi kvołuju biełaruskuju samaśviadomaść, taptać pamiać pra Pieramohu i jaje hierojaŭ i, narešcie, razburać biełaruskuju dziaržaŭnaść.
Mienavita tak: biełaruskuju identyčnaść i jadro biełaruskaj dziaržaŭnaść 7 sakavika źbirajucca ŭzłamać pry dapamozie taranu... Rašeńnie vieźci ŭ Minsk «Ramštajn» — heta pamyłka, jakaja moža nam doraha kaštavać».
Hramadskaja rada pa maralnaści była stvoranaja ŭ 2009 hodzie na prapanovu Biełaruskaj pravasłaŭnaj carkvy i Sajuza piśmieńnikaŭ Biełarusi. Uznačaliŭ jaje Mikałaj Čarhiniec. U radu ŭvajšli pradstaŭniki vialikich kanfiesij, jakija dziejničajuć u Biełarusi. U jaje šerahach mitrapalit Fiłaret, arcybiskup Tadevuš Kandrusievič, kampazitar Ihar Łučanok i inšyja.
