Na dumku kiraŭnika Administracyi prezidenta Polščy Uładzisłava Stasiaka, list Alaksandra Łukašenki polskamu kalehu Lechu Kačyńskamu paćviardžaje, što «demakratyzacyja Biełarusi — heta fikcyja». Pra heta jon zajaviŭ žurnalistam, pieradaje infarmahienctva RAR.
23 lutaha pasolstva Biełarusi ŭ Varšavie abjaviła, što biełaruski prezident nakiravaŭ list u adkaz na zvarot Kačyńskaha ad 16 lutaha, u jakim toj vykazaŭ «zakłapočanaść i rašučy pratest u suviazi z rostam represij suprać Sajuza palakaŭ na Biełarusi». Pavodle infarmacyi biełaruskaj dypmisii, kiraŭnik Biełarusi «adkazaŭ na ŭsie pytańni polskaha prezidenta i vykazaŭ nadzieju na zbałansavany i ŭzajemapavažlivy dyjałoh Biełarusi i Polščy dla dalejšaha raźvićcia družalubnych i dobrasusiedskich adnosin pamiž krainami».
Pavodle słoŭ Stasiaka, situacyja vyrašycca, «tolki kali Biełaruś zachoča dakazać Polščy i ES, što moža stać na šlach pavažańnia hramadzianskich pravoŭ, u pryvatnaści pravoŭ nacyjanalnych mienšaściaŭ».
U administracyi polskaha prezidenta nie vydajuć źmiest lista Łukašenki. Jak zajaviŭ dziaržsakratar kancylaryi prezidenta Pavieł Vypych, zvarot biełaruskaha prezidenta źmiaščaje «ahulnyja farmuloŭki i nie abiacaje pieramien». «Padobna, što prezident Biełarusi ličyć, što ŭsie dziejańni, raspačatyja apošnimi tydniami ŭ Biełarusi, byli najbolš metazhodnymi i adpaviadajuć standartam demakratyčnaj dziaržavy», — zajaviŭ Vypych.
Pradstaŭnik administracyi ŭkazaŭ, što Kačyński maje namier napisać viarchoŭnym pradstaŭnikam ES Chiermanu van Rampioju i Ketryn Eštan ab situacyi z polskaj mienšaściu ŭ Biełarusi i pracytavać pasłańnie biełaruskaha prezidenta.
