Da katalickich Kaladaŭ u Minsku, Breście i Baranavičach buduć sudzić pa palityčnych kryminalnych spravach minimum 81 čałavieka.
Pa stanie na kaniec 2024 hoda ŭ Biełarusi nie zastałosia vonkavych prajavaŭ pratestu. Apošnija masavyja manifiestacyi adbyvalisia niekalki hadoŭ tamu. Zdavałasia b, ničoha nie pahražaje režymu Alaksandra Łukašenki — adnak represiŭny cisk zastajecca takim samym žorstkim. Na hety momant u źniavoleńni znachodzicca minimum 1283 palitviaźni (minus pryblizna 70-80 čałaviek, jakija vyjšli pa pamiłavańni ŭ apošnija chvali), adnak režym praciahvaje nabirać novych achviar.
«Naša Niva» padličyła, kolki čałaviek źbirajucca sudzić pa kryminalnych palityčnych artykułach bližejšym časam — z 11 da 25 śniežnia 2024 hoda. My abirajem taki haryzont, bo biełaruskija sudy jakraz zvyčajna pryznačajuć pasiedžańni za tydzień-paŭtara. Tamu raskład sudoŭ na samyja apošnija dni hoda jašče niavyznačany. Adnak niama sumnievu, što ruchavik represij budzie krucicca i da 31 śniežnia — kab pierajści i na nastupny hod.
Bolšaść z hetych ludziej, kaho źbirajucca sudzić, utrymlivajucca ŭ SIZA, ale pakul nie ŭklučanyja ŭ aficyjny śpis palitviaźniaŭ — pra niekatorych ź ich pravaabaroncy pakul ničoha nie viedajuć i źbirajuć infarmacyju.
Kali hetym ludziam pašancuje i jany buduć vyzvalenyja ŭ zale suda, atrymaŭšy chatniuju chimiju, to jany mohuć i nie patrapić u śpis palitviaźniaŭ — chiba što paśla atrymać paznaku «były palitviazień» za čas znachodžańnia ŭ SIZA.
My padličyli kolkaść fihurantaŭ palityčnych pracesaŭ pa troch haradach — Minsk, Brest i Baranavičy. Mienavita tut adbyvajecca najbolšaja kolkaść sudoŭ nad palitviaźniami. U astatnich rehijonach taksama praciahvajecca pieraśled ludziej, ale jaho abjomy ŭ razy mienšyja.
Minsk
Za bližejšyja dziesiać pracoŭnych dzion, z 11 da 24 śniežnia ŭ rajonnych sudach stalicy buduć sudzić 24 čałavieki. 92% ź ich — pa «narodnym» artykule 342 KK Biełarusi za ŭdzieł u pratestach. Miarkujučy pa ciapierašniaj praktycy, bolšaść ź ich atrymaje chatniuju chimiju ci chimiju z nakiravańniem.
U Minskim haradskim sudzie płanujuć sudzić 15 čałaviek. Vystaŭlenaje im abvinavačvańnie bolš ciažkaje. Šancaŭ vyjści na svabodu ŭ ciapierašnich realijach u ich vielmi mała.
Jašče 7 čałaviek buduć sudzicca ŭ Minskim haradskim sudzie ŭ apielacyjnym paradku. Heta značyć, što ich užo asudzili (amal usie atrymali terminy ŭ kałonii), ale jany sprabavali abskardzić rašeńnie papiaredniaha suda.
Takim čynam, u Minsku źbirajucca sudzić 46 čałaviek.
Udakładnim, što my nie ŭličvajem u śpisie tych, nad kim viadziecca zavočny praces. Komik Słava Kamisaranka, ekanamist Pavieł Danejka, były amapaviec Pavieł Kułažanka taksama siarod abvinavačanych. Ź imi ličba była b jašče bolšaj, adnak pakolki ich svabodzie ničoha nie pahražaje, było b niekarektna abjadnoŭvać ich z tymi, chto čakaje suda ŭ SIZA.
Brest
U sudzie Leninskaha rajona Bresta płanujuć sudzić 12 čałaviek. Pieravažna heta fihuranty «narodnaha» artykuła 342. Miarkujučy pa sudovaj praktycy, bolšaść ź ich atrymajuć realnyja terminy ŭ kałonii. Šaniec na pakarańnie z adterminoŭkaj budzie chiba što tolki ŭ maładych maci.
Jašče 4 čałaviek buduć sudzić u Bresckim abłasnym sudzie. U ich bolš surjoznyja artykuły.
8 palitviaźniaŭ pasprabujuć abskardzić u Bresckim abłasnym sudzie raniejšy vyniesieny prysud.
Ahułam u Breście — 24 čałavieki.
Baranavičy
U hetym horadzie buduć sudzić 11 palitviaźniaŭ. Amal usich ź ich —pa «narodnym» artykule 342. Sudovaja praktyka tut takaja ž žorstkaja, jak u Breście — realny termin chłopcam, a taksama dziaŭčynam bieź dziaciej.
***
Masavyja palityčnyja represii ŭ Biełarusi praciahvajucca z 2020 hoda. Tady Alaksandr Łukašenka prajhraŭ Śviatłanie Cichanoŭskaj, ale nie addaŭ uładu.
Pa słovach namieśnika načalnika Hałoŭnaha ŭpraŭleńnia pracesualnaha kantrolu Śledčaha kamiteta Alaksandra Žukava, było zafiksavana bolš za 22 500 «złačynstvaŭ ekstremisckaj skiravanaści», heta značyć, palityčnaha charaktaru. Pa mnohich z hetych kryminalnych spravaŭ prachodziać šmatlikija fihuranty.
Zhodna ź infarmacyjaj Paŭła Łatuški, pradstaŭnika Abjadnanaha pierachodnaha kabinieta, z 2020 hoda represii zakranuli 136 tysiač čałaviek. Niekalki socień tysiač biełarusaŭ vymušanyja byli pakinuć krainu.
Kamientary