Były kiraŭnik MZS Litvy pra Makieja: Ja kazaŭ jamu, zrabicie narmalnyja vybary. Što vy ŭvieś čas niejkija represii?
«Lusterka» zrabiła intervju z byłym ministram zamiežnych spraŭ Litvy Linasam Linkiavičusam, u jakim pahavaryli pra Biełaruś, Łukašenku, padziei 2020-ha, a taksama pra jahonaha kalehu Uładzimira Makieja.
— Ja nie ličyŭ jaho blizkim siabram, ale jon byŭ partnioram, ź jakim možna razmaŭlać i pra niešta damaŭlacca. I heta było nie raz.
Darečy, padčas majho apošniaha vizitu ŭ Biełaruś, pierad hetymi słavutymi vybarami 2020 hoda,
ja bačyŭ niejkaje śviatło ŭ kancy tunela. Byŭ pryjom u honar hadaviny Tadevuša Kaściuški [u lutym 2020 hoda], haspadarami byli ZŠA, Polšča, Litva i Biełaruś. Makiej vystupaŭ na biełaruskaj movie. Ja bačyŭ razhublenaść siarod haściej, jany nie razumieli, što tut adbyvajecca: hadavina Kaściuški, ničoha ahulnaha z savieckim minułym, plus vystup na biełaruskaj movie.
Kali my raźvitvalisia, ja skazaŭ Uładzimiru: «Zrabicie narmalnyja vybary. Što vy ŭvieś čas niejkija represii…» Jon adkazaŭ, što ŭsio budzie narmalna. Ja źjechaŭ. Narmalna nie zdaryłasia.
I kali pačalisia represii, my ź im pierapisvalisia. Ja napisaŭ: «Moža, ja pryjedu? I my zmožam niejak damovicca z apazicyjaj, kab pačaŭsia niejki dyjałoh?» Jon, darečy, nie adkazaŭ adrazu. Na nastupny dzień napisaŭ, što heta kiepskaja ideja: «Nie pryjazdžaj».
Potym ja jamu emacyjna napisaŭ: «Źbivajuć ludziej na vulicy. Niejkija źvierstvy adbyvajucca». Jon adkazaŭ: «Kali mnie pačali telefanavać dadomu i pahražać majoj siamji, ja zrazumieŭ, što tak taksama nielha». Ty paraŭnoŭvaješ: tabie patelefanavali i chtości tam niešta skazaŭ, a tut ludziam kostki łamajuć, bačyš roźnicu? Choć ja ŭžo razumieŭ, što jon, vidać, zrabiŭ taki vybar.
— Jon niešta adkazaŭ jašče?
— Nie. Paśla hetaha zaviaršyłasia pierapiska, pra što tut razmaŭlać?! Pamiataju jašče takoje [ź inšaha pieryjadu pracy]. Tady było šeść palitviaźniaŭ. Ja kažu: «Šeść čałaviek, vy što, nie možacie ich vyzvalić? Heta adkryje dyjałoh ź ES. Heta ž nieskładana». Jon kaža: «Ja heta razumieju, ale hramadskaja dumka nie razumieje». I pakazvaje palcam uvierch (mabyć, kažučy pra Alaksandra Łukašenku. — Zaŭv. red.). Ja, moža, naiŭny, ale ja spadziavaŭsia, što Makiej moža pasłužyć ryčahom pieramienaŭ. Ale, vidać, ź niejkich pryčyn, a moža, praz šantaž, ja nie viedaju, jon zrabiŭ vybar i zastaŭsia z Łukašenkam.
— Usio ž taki: kim dla vas byŭ Uładzimir Makiej?
— Partnioram i, viadoma, słužkam toj ułady. Jon byŭ adnym ź niamnohich, chto mieŭ padychod da Łukašenki. Jon moh niešta jamu kazać, u niečym pierakonvać. Mnie tak zdavałasia. Ja dumaju, što jon moh upłyvać na Łukašenku, nakolki mocna — inšaja reč.
Niezvyčajny pryjom u Minsku. Jaho dali ŭ honar Kaściuški amierykancy i palaki, a naviedali biełaruski i litoŭski ministry
Makiej na pryjomie ŭ honar Kaściuški cytavaŭ Bžezinskaha. A Marzaluk zładziŭ jamu avacyju
«Vychadam z tupika mohuć stać tolki novyja vybary». Kiraŭnik MZS Litvy adkazaŭ Makieju
«Ja mieŭ adnosna jaho iluzii». Były ministr zamiežnych spraŭ Litvy zhadvaje pra Uładzimira Makieja i pierapisku ź im u 2020-m
Kamientary
Paśla žniŭnia 2020 Makiej adrazu ž pryniaŭsia za staroje - adbielvać imidž uzurpatara i kanalizavać abureńnie zachadu ŭ biaskoncuju čarhu zakłopočannaściaŭ. I varta zaŭvažyć, što nie biez pośpiechaŭ. Pieršyja try pakieta sankcyj prymalisia ź vialičeznym rypańniem i ŭsio roŭna zastavalisia simvaličnymi. K viaśnie 2021 masavyja pratesty zbolšaha byli zdušanyja. Ale režym nia moh ničoha zrabić z centrami supracivu i ŚMI za miažoj, jakija praciahvali advakatavańnie biełaruskaj tematyki i danosili praŭdu ab stanie rečaŭ unutry krainy, z-za čaho Makieja dy inšych emisaraŭ Łukašenki mo słuchali, ale surjezna bolš nie usprymali. Z-za čaho daviałosia sadžać samalot z Pratasievičam.
A kropku ŭ namahańniach Makieja pastaviŭ saŭdzieł Łukašenki ŭ ahresii. Paśla hetaha ŭsim stała zrazumieła, što Makieju ź jahonymi chitrykami bolš ničoha nia śviecić. Aproč całkam užo adarvanaha ad rečaisnaści uzurpatara. Taja adarvanaść i stała dla Makieja rakavoj.