Detali pretenzij nie ahučvajucca.
Dziaržaŭny mytny kamitet Biełarusi abvinavačvaje Fiederalnuju mytnuju słužbu Rasii ŭ nievykanańni damoŭlenaściej pa pastaŭkach nafty. Pra heta havorycca ŭ paviedamleńni pres‑słužby DMK.
«U adpaviednaści z pahadnieńniem pa pytańniach uzajemavyhadnych umoŭ pierapracoŭki rasijskaj nafty ŭ Respublicy Biełaruś, Dziaržaŭnym mytnym kamitetam Respubliki Biełaruś praviedzieny pieramovy ź Fiederalnaj mytnaj słužbaj Rasijskaj Fiederacyi i prapanavany kankretnyja varyjanty pa spraščeńni pracedur pieramiaščeńnia nafty i naftapraduktaŭ», — skazana ŭ paviedamleńni, raźmieščanym na sajcie DMK.
«Fiederalnaja mytnaja słužba Rasijskaj Fiederacyi, spasłaŭšysia na adsutnaść pramych ukazańniaŭ i na toje, što adkaznymi za realizacyju pahadnieńnia pamiž uradami Rasijskaj Fiederacyi i Respubliki Biełaruś ab mierach pa ŭrehulavańni handlova‑ekanamičnaha supracoŭnictva ŭ halinie ekspartu nafty i naftapraduktaŭ vyznačany Minenierha i Minekanamraźvićcia, uchiliłasia ad praviadzieńnia pieramoŭ pa hetym pytańni», — zajaŭlaje pres‑słužba DMK.
«Dziaržaŭny mytny kamitet situacyju ŭ dačynieńni da pastavak nafty ŭ Respubliku Biełaruś dla pierapracoŭki bieź źbirańnia mytnaj pošliny ličyć nievykanańniem abaviazacielstvaŭ rasijskim bokam, praduhledžanych pahadnieńniem», — havorycca ŭ pres‑relizie.
Kiraŭnik pres‑słužby DMK Ihar Piaško nie staŭ kamientavać hetaje paviedamleńnie. Jon taksama nie ŭdakładniŭ, jakija kankretna pieramovy majucca na ŭvazie. «Bolš, čym tam napisana, ja skazać nie mahu», — zajaviŭ pradstaŭnik kamiteta.
Nahadajem, 26 lutaha ŭ Maskvie prajšło pasiadžeńnie kamisii Mytnaha sajuza Biełarusi, Kazachstana i Rasii. Jak paviedamiŭ žurnalistam paśla zaviaršeńnia sustrečy vice‑prem`ier Biełarusi Andrej Kabiakoŭ, rasijski bok nastojvaje na zachavańni mytnych pošlin na naftapradukty.
Jon adznačyŭ, što biełaruski bok temu biahučaj situacyi pa pastaŭkach nafty nie zakranaŭ, bo heta pytańnie ŭrehulavana padpisanym u kancy studzienia biełaruska‑rasijskim pahadnieńniem. «Choć heta pahadnieńnie i nie zadavalniaje biełaruski bok», — padkreśliŭ Kabiakoŭ.
Pavodle słoŭ vice‑prem`iera, rasijski bok nie maje zakanadaŭčaj bazy dla źbirańnia vyvaznych pošlin na naftapradukty, jakija Biełaruś zakuplaje ŭ Rasii. Adnak Rasija nastojvaje na pravamiernaści svaich dziejańniaŭ.
Na hetu temu ŭ udzielnikaŭ pasiadžeńnia adbyłasia «emacyjanalnaja razmova», paviedamiŭ Kabiakoŭ. «My zafiksavali pazicyi bakoŭ u vynikovym rašeńni kamisii i raźličvajem, što rasijski bok zrobić zachady, jakija adpaviadajuć jaho mižnarodnym dahavoram. Pakul razumieńnia ŭ hetym pytańni z boku rasijskich partnioraŭ niama», — skazaŭ biełaruski vice‑premjer.
Kamientary