Što za amierykanski błohier braŭ intervju ŭ Łukašenki?

U internecie možna adšukać chvalebnyja teksty ab Maryjo Naŭfale, dzie jaho pradstaŭlajuć talenavitym i pracavitym chłopcam. Pišuć, što jon pačynaŭ biznes z 300 dalarami, a ŭ chutkim časie zmoh zarablać miljony. Ciapier, darečy, Naŭfał nazyvaje siabie inviestaram bolš čym 500 startapaŭ.

Ale ž da pryhožaj historyi pośpiechu jość šmat pytańniaŭ. Amierykanski kanał NBC News raniej razmaŭlaŭ ź ludźmi, jakija kazali, što inviestavali ŭ kampanii Naŭfała ci pracavali ź im na roznych etapach jaho karjery. Jany apisvali maładoha mužčynu jak pradprymalnika, jaki traciŭ hrošy hetak ža chutka, jak i zarablaŭ — a jašče nie zaŭsiody płaciŭ tym, z kim byŭ pavinien raźličycca. U dalejšym mužčynu nie adnojčy abvinavačvali ŭ nievykanańni finansavych damoŭlenaściej.

Pavialičyć

U 2020 hodzie dziakujučy aŭdyjačatu Clubhouse i jaho bumu, vyklikanamu pandemijaj, Naŭfał pačaŭ zavajoŭvać papularnaść u internecie. Jon stvaryŭ akaŭnt, jaki chutka sabraŭ bolš za 50 000 padpisčykaŭ. Błohier kamunikavaŭ ź viadomymi asobami, uklučajučy kinarežysiora Majkła Beja.

Taja historyja skončyłasia skandałam: stvaralniki płatformy zabłakiravali, a potym vydalili akaŭnt Maryjo. Padklučyłasia armija jaho fanataŭ, jakija zakidali stvaralnikaŭ Clubhouse listami z patrabavańniem adnavić akaŭnt. U vyniku akaŭnt adnavili, ale pakryŭdžany Naŭfał tudy nie viarnuŭsia.

A 2022 hod staŭ, imavierna, hałoŭnym dla miedyjaraźvićcia Maryjo. U toj čas jon pieraklučyŭsia na aŭdyjadyskusijnuju płatformu Twitter Spaces. Tam da razmovy, u jakoj Naŭfał abmiarkoŭvaŭ krach FTX, dałučyŭsia Iłan Mask. Kamientaryi Maska padčas dyskusii trapili ŭ zahałoŭki suśvietnych miedyja. Nie dziŭna, što paśla takoha papularnaść Maryjo pačała raści z kaśmičnaj chutkaściu.

Ciapier u Naŭfała ŭ tvitary (Ch) bolš za 2 miljony padpisčykaŭ, jon taksama viadzie tam prajekt «Kruhły stoł» (tam dyskutujuć na roznyja temy).

Błohier publikuje i intervju. Učora, naprykład, vypuściŭ hutarku z premjer-ministram Słavakii Robiertam Fica. U padvodcy da videa napisana, što palityk raspaviadaje, jak ES pry padtrymcy sietki Sorasa i elit NATA, padaŭlajuć demakratyju ŭ jaho krainie.

Pra toje, nakolki Naŭfał niekrytyčna stavicca da infarmacyi, mabyć, lepš za ŭsio śviedčyć toj fakt, što jon raspaŭsiudziŭ fejk, jaki potym reposnuŭ navat Iłan Mask.

Letaś Maryjo Naŭfał apublikavaŭ u tvitary dopis, u jakim śćviardžaŭ, što stvaralniku Telegram Paŭłu Duravu pahražaje 20 hadoŭ turemnaha źniavoleńnia. Mask paśpiašaŭsia reposnuć haračuju navinu. Adkul ža sam Maryjo ŭziaŭ takija ličby? Adkaz prosty: jon spasyłaŭsia na rasijskaje dziaržaŭnaje infarmacyjnaje ahienctva «Sputnik» (uvachodzić u skład chołdynhu Russia Today).

Rasśledavalniki rasijskaha miedyja «Ahienctva» vyśvietlili, što fejk pra imaviernaje vializnaje pakarańnie dla Durava stvaryli i raskrucili prakramloŭskija ŚMI. Rabiłasia heta dla taho, kab prasunuć naratyŭ: na Zachadzie sa svabodaj słova jašče horš, čym u Rasii. Praŭładnyja rasijskija ŚMI napisali pra «20 hadoŭ dla Durava», spasyłajučysia na francuzskija ŚMI (u pryvatnaści, telekanał TF1) — adnak tam takoj infarmacyi nie było.

I heta nie adziny prykład taho, jak Maryjo Naŭfał dapamahaje zapuskać u anhłamoŭnuju prastoru fejki — u tym liku i pra Biełaruś. Letaś u studzieni mužčyna zapościŭ čarhovuju chłuśniu ad Russia Today. U tym paviedamleńni śćviardžałasia, byccam Dziaržaŭny departamient ZŠA vydaliŭ z sajta zajavu z krytykaj prezidenckich vybaraŭ u Biełarusi. Nasamreč pazicyja Vašynhtona nie źmianiałasia (što adbyłosia, tłumačyłasia tut).

• 2
• 1
• 5
• 9
• 0
• 0
• 5
• 0