«Ludzi hladzieli na mianie ź niamym žacham». Biełaruski ajcišnik lačyŭsia ŭ Polščy pjaŭkami, a potym u jaho pačaŭsia kryvaciok
Biełaruski ajcišnik Hieorhij Kačanoŭski, zasnavalnik startapa ScootAPI, pahadziŭsia na niestandartnaje lačeńnie — pjaŭkami. Tak jon chacieŭ spravicca z zapaleńniem limfavuzła. Usio prajšło dobra, ale potym pačaŭsia mocny kryvaciok. Svaim dośviedam jon padzialiŭsia ŭ fejsbuku, zaŭvažyŭ Most.
Niezvyčajnyja pracedury i praktykavańni Hieorhij robić u ramkach prajekta Gen150. Heta supolnaść entuzijastaŭ, jakija imknucca padoŭžyć siaredniuju praciahłaść žyćcia da 150 hadoŭ.
Padstavaj dla terapii stała zapaleńnie limfavuzła za vucham. Heta zdaryłasia paśla pieralotu z San-Francyska ŭ Jeŭropu.
Užo ŭ Polščy Hieorhij adpraviŭsia da svajho lekara, śpiecyjalista pa kitajskaj miedycynie i akupunktury — heta forma alternatyŭnaj miedycyny, asnoŭnym kampanientam jakoj źjaŭlajecca ihłaŭkołvańnie. Jon i prapanavaŭ Hieorhiju hirudaterapiju — lačeńnie miedycynskimi pjaŭkami.
«Pryznajusia, ja krychu źbiantežyŭsia. Ale doktar pakazaŭ mnie vyniki daśledavańnia śliny jahonych pjavak z łabaratoryi: akazvajecca, ślina hetych stvareńniaŭ źmiaščaje ŭnikalnyja hajučyja rečyvy, zdolnyja azdaraŭlać arhanizm», — raskazaŭ u sacsietcy biełarus.
«Spačatku kroŭ źlohku pratočvałasia. Potym — kapała»
Spačatku Hieorhij pahadziŭsia na dźviuch pjavak. Ale doktar patłumačyŭ, što «važna apracavać susiednija limfavuzły dla ačystki sistemy», — i ŭ vyniku za vucham apynulisia try.
«Sama pracedura akazałasia… cikavaj. Spačatku — lohki bol, kali pjaŭki ŭpivajucca. Ale praz paru chvilin ich ślina abiazbolvaje, i dalej pracuje jak miascovaja aniestezija», — apisaŭ adčuvańni mužčyna.
Pracedura prajšła paśpiachova. Doktar zakleiŭ ranki płastyrami, i Hieorhij vypraviŭsia pa svaich spravach pa Krakavie. Sustreŭ žonku, uziaŭ u jaje małodšuju dačku ŭ vazku, udvaich z małoj jany zajšli paabiedać u indyjskuju kaviarniu. Tam mužčynu i staŭ turbavać kryvaciok.
«Spačatku kroŭ źlohku pratočvałasia. Potym — kapała. Aficyjant-indyjec z tryvohaj u hołasie pierapytvaŭ niekalki razoŭ: «Ser, vy ŭ paradku?» Ja jaho supakojvaŭ, što ŭsio dobra, i vyciraŭ kroŭ z paviazki survetkami».
Na zvarotnym šlachu situacyja nie palepšyłasia.
«U tramvai ludzi sastupali miesca i hladzieli na mianie ź niamym žacham — mabyć, dumali, što mnie niadoŭha zastałosia i što Dana bieź piaci chvilin sirotka ŭ vazku», — iranizuje Hieorhij.
«Patrebien bolš sučasny sposab kłopatu pra limfasistemu»
U toj dzień da siamji pryjechali hości. Pabačyŭšy haspadara ŭ kryvi, jany asłupianieli. Pakolki kroŭ užo zakapała padłohu i meblu, Hieorhij vyrašyŭ sieści ŭ vannu — kab jana ściakała ŭ vadu. Tak jaje, prynamsi, nie davodziłasia adcirać adusiul. Žonku, jakaja viarnułasia dachaty, takaja karcina napałochała.
«Skryvaŭleny muž siadzić u kryvava-čyrvonaj vadzie, pry hetym kroŭ ciače z šyi. Ania mižvoli ŭskryknuła i ruka aŭtamatyčna zakryła rot. Pry hetym ja ŭśmichaŭsia i zmoh supakoić žonku, što sa mnoj usio ŭ paradku. Praz 3,5 hadziny kroŭ spyniłasia. Žonka zakleiła ranki płastyram».
Hieorhij pryznajecca, što «adčuvaŭ lohkuju słabaść, ale ŭ cełym — pryliŭ enierhii, jak paśla haładańnia».
«Hałoŭnaja vysnova dla mianie ŭ hetaj historyi: patrebien bolš sučasny sposab kłopatu pra limfasistemu i kryvianosnuju sistemu».
Vopyt inšych karystalnikaŭ: «U cełym pracoŭny mietad»
Choć mnohich karystalnikaŭ sacsietki takaja terapija šakavała, niekatoryja dzialilisia svaim vopytam lačeńnia pjaŭkami.
«U ślinie pjavak źmiaščajecca vialikaja kolkaść rečyvaŭ, pačynajučy ad tych, što źnižajuć zhusalnaść kryvi, zakančvajučy tymi, što dziejničajuć jak apijaty. Asabista mianie štyryła paśla takich sieansaŭ. Cudoŭnaje pačućcio ejfaryi. Z vynikaŭ: paśla kavidu byli prablemy sa zhusalnaściu, paśla kursu pjavak heta prajšło. U cełym pracoŭny mietad, kali nie chočacca žerci tabletki. I tak, kroŭ chvošča potym ad 4 da 12 hadzin, kroŭ u takim vypadku — heta narmalna. Mnie paraili nalaplać padhuźniki, jany dobra ŭsmoktvali. Uvohule, prykładna na sutki vypadaješ z aktyŭnaha žyćcia», — napisała adna z padpisčyc.
«Ja b staviła adnu [pjaŭku], potym praź dzień jašče adnu. I tak razoŭ siem. Try štuki pieršy raz — heta vialiki stres. Kroŭ mahła ciačy da 24 hadzin», — vykazała mierkavańnie inšaja, adznačyŭšy, što ŭ Polščy pjaŭki pradajucca svabodna.
Hamieapatyju i inšyja mietady nietradycyjnaj miedycyny dahetul uklučajuć u pieralik płatnych pasłuh u dziaržaŭnych klinikach
Hety maleńki źviarok moža raskryć sakret baraćby sa stareńniem
Čamu padletki-dziaŭčaty čaściej pakutujuć na depresiju: vučonyja znajšli mahčymaje tłumačeńnie ŭ mozhu
Vučonyja znajšli, jak zrabić EKA bolš vynikovym — z dapamohaj cukru
Kamientary