Hienprakuratura Rasii paprasiła prypynić zabaronu afhanskaha ruchu «Taliban» u Rasii. Adpaviedny pazoŭ viedamstva nakiravała ŭ Viarchoŭny sud RF, paviedamlaje «Interfaks».
Pazoŭ hienprakurora «ab prypynieńni zabarony dziejnaści ruchu «Taliban», uklučanaha ŭ adziny fiederalny śpis arhanizacyj, u tym liku zamiežnych i mižnarodnych arhanizacyj», pryznanych u adpaviednaści z zakanadaŭstvam Rasii terarystyčnymi, pastupiŭ i pryniaty da razhladu, paviedamiŭ sud.
Sudovaje pasiedžańnie pryznačanaje na 17 krasavika. Razhlad projdzie ŭ zakrytym režymie.
Kali sud prypynić zabaronu dziejnaści «Talibana», to paśla ŭstupleńnia pastanovy ŭ zakonnuju moc ruch budzie vyklučany sa śpisu terarystyčnych arhanizacyj, adznačaje «Interfaks».
U kancy 2024 hoda Pucin padpisaŭ zakon, jaki daje mahčymaść prypyniać status terarystyčnych arhanizacyj u Rasii. U studzieni 2025-ha MZS Rasii zajaviŭ, što idzie praces «vyklučeńnia Talibana» ź liku terarystyčnych arhanizacyj.
Niahledziačy na farmalnuju prysutnaść isłamisckaha ruchu Taliban, jaki z 2021 hoda paśla 20-hadovaha pierapynku znoŭ kiruje Afhanistanam, u rasijskim śpisie terarystyčnych arhanizacyj, ź jaho pradstaŭnikami ŭ rasijskich uładaŭ isnavali dastatkova ciesnyja kantakty, u tym liku na davoli vysokim uzroŭni.
Kamientary