Biełaruś dapuskaje mahčymy ŭdzieł francuzskaj kampanii Areva ŭ budaŭnictvie biełaruskaj AES. Pra heta paviedamiŭ pieršy namieśnik premjer-ministra Biełarusi Uładzimir Siamaška 2 krasavika ŭ Minsku na sustrečy ź dziaržaŭnym sakratarom pa jeŭrapiejskich spravach MZS Francyi Pjeram Lełušam.
«Viedajučy vopyt francuzskich kampanij u halinie jadziernaha budaŭnictva, atamnych stancyj, my dapuskajem mahčymy ŭdzieł, naprykład, takoj kampanii, jak Areva, u realizacyi hetaha prajekta ŭ Biełarusi. Dźviery adčynieny», — pryvodzić słovy Uładzimira Siamaški pres-słužba ŭrada.
Pieršy namieśnik premjer-ministra adznačyŭ, što Biełaruś moža prapanavać francuzskamu boku ŭdzieł u lubych prajektach u śfiery mašynabudavańnia. U tym liku havorka idzie pra pošuki partniora dla MAZa.
«Čamu b nie francuzskaja firma «Reno»?» — skazaŭ Siamaška.
***
Jak paviedamlałasia raniej, u Biełarusi płanujecca pabudavać AES mahutnaściu prykładna 2,4 tys. MVt. Uvod pieršaha enierhabłoka čakajecca ŭ 2016 hodzie, druhoha — u 2018 hodzie. Stancyja budzie budavacca pavodle prajekta sankt-pieciarburhskaha instytuta «Atamenierhaprajekt». Hienieralnym padradčykam budaŭnictva vystupić rasijskaje dziaržaŭnaje ZAT «Atamstrojekspart», padkantrolnaje «Rasatamu», jakoje realizuje mižuradavyja pahadnieńni ab budaŭnictvie abjektaŭ jadziernaj enierhietyki za miažoj.
Na ŭźviadzieńnie ŭ Biełarusi AES i infrastruktury stancyi, pavodle raźlikaŭ śpiecyjalistaŭ, nieabchodna 9 młrd. dołaraŭ ZŠA.
24 sakavika na sustrečy z namieśnikam staršyni KNR Si Czińpinam u Minsku Alaksandr Łukašenka zajaviŭ, što Biełaruś hatova supracoŭničać z Kitajem va ŭsich śfierach, u tym liku ŭ budaŭnictvie AES.
Viadoma, što raniej kitajskija karparacyi prajaŭlali cikavaść da budaŭnictva biełaruskaj AES.
Tym časam rasijski pasoł u Biełarusi Alaksandr Surykaŭ 31 sakavika na pres-kanfierencyi ŭ Minsku zajaviŭ, što Rasija moža admovicca ad udziełu ŭ budaŭnictvie biełaruskaj AES, kali prajekt budzie finansavać Kitaj.
«Kali budaŭnictva biełaruskaj AES buduć finansavać kitajcy, ja sumniavajusia, što Rasija budzie ŭdzielničać», — skazaŭ jon.
«My nie chočam dzialicca z maładymi kitajskimi firmami. Niejkija novyja technałohii treba kuplać, a kitajcy, u mianie takoje adčuvańnie, chacieli b padhledzieć. Kali jany buduć udzielničać, to rasijski bok prapanuje pierahledzieć niekatoryja momanty», — dadaŭ Surykaŭ.
Pavodle jaho słoŭ, adnym z varyjantaŭ moža stać budaŭnictva Rasijaj samoj AES, a inšym bokam — budaŭnictva infrastruktury.
Surykaŭ nahadaŭ, što zaraz Biełaruś i Rasija rychtujucca da padpisańnia kantrakta na budaŭnictva AES. «Pakul abmiarkoŭvajecca pytańnie cany budaŭnictva», — skazaŭ dypłamat.
