U červieni telekanał ANT płanuje pačać zdymki mastackaha kinafilma «Vitaŭt». Ale pakul infarmacyja nakont taho, chto budzie režysioram filma, chto piša scenar i jaki biudžet filma, trymajecca ŭ sakrecie.
Pra heta paviedamiŭ dyrektar zdymačnaj hrupy budučaha filma Pavieł Bondar «Praca viadziecca pa padrychtoŭcy kinafilma takim ža čynam, jak i na ŭsich paŭnamietražnych mastackich filmach. Uvieś kompleks pasłuh akazvajecca, praca viadziecca. Scenar znachodzicca ŭ rabocie. Pakul infarmacyja heta nie razhałošvajecca. Kali kanał bydzie hatovy jaje ahučyć, tady jany aficyjna jaje ahučać i apublikujuć».
Chto ź biełaruskich aktoraŭ budzie brać udzieł u zdymkach filma i ci buduć zaprašacca rasiejskija zorki, taksama pakul nie kažuć. Jak ničoha pakul nie viadoma i nakont daty vychadu filma na ekran. U čym pryčyna takoj sakretnaści, kiraŭnik pres‑słužby ANT Taćciana Kurbat nie patłumačyła.
Scenar prapanoŭvali napisać Alaksandru Kačanu, viadomamu pa pracy nad filmami «Akupacyja. Misteryi» i «Masakra». Zaraz Kačan pracuje nad scenarom pavodle ramana Karatkieviča «Kałasy pad siarpom tvaim», i tamu ad supracoŭnictva z ANT admoviŭsia.
