Adrestaŭravany ŭnikalny aŭtamabil Chevrolet GA Master DeLuxe, jaki ŭ pieryjad z 1939 pa 1942-y hady naležaŭ Janku Kupału, z 16 pa 18 krasavika budzie demanstravacca la budynku Dziaržaŭnaha litaraturnaha muzieja imia Janki Kupały ŭ Minsku.
A paśla ŭsie fatahrafavalisia ź ministram Łatuškam.
Zaraz hety aŭtamabil naležyć muzieju. Doŭhi čas jon znachodziŭsia ŭ filijale ŭ «Laŭkach», ale ŭ listapadzie minułaha hoda mašyna była pieraviezienaja ŭ Minsk, dzie jaje adrestaŭravali z dapamohaj kampanii «Minsk-Łada» – aficyjnaha pradstaŭnika Chevrolet u Biełarusi.
Šykoŭny amierykanski limuzin nie byŭ pieršym aŭtamabilem Janki Kupały. U 1935 hodzie kiraŭnictva BSSR padaravała jamu saviecki MK 1. Praz čatyry hady, u 1939-ym, Pancielajmon Panamarenka asabista vypisaŭ Kupału Šeŭrale. Madel Chevrolet GA Master DeLuxe, jakuju padaravali Janku Kupału ułady BSSR, vypuskałasia tolki ŭ 1937 h. Usiaho byŭ vypuščany 2221 ekzemplar. Zaraz košt kupałaŭskaha Chevrolet GA Master DeLuxe pieravyšaje 100 tys. jeŭra. I heta biez uvahi na toje, kamu naležaŭ aŭtamabil.
Mienavita na Šeŭrale Kupała ŭ červieni 1941 h. pakinuŭ Minsk, kudy ŭžo nie było nakanavana viarnucca.
Paśla vajny mašyna trapiła ŭ fond muzieja Janki Kupały. Da 1955-ha hodu kupałaŭski Šeŭrale byŭ jašče na chadu, ale ŭžo ŭ 1957-ym aŭtamabil zakansiervavali i z taho času jon staŭ zvyčajnym muziejnym ekspanatam.
U listapadzie 2009 h. pa daručeńni i pry dapamozie ministra kultury Paŭła Łatuški supracoŭniki Dziaržaŭnaha litaraturnaha muzieja imia Janki Kupały vyrašyli adrestaŭravać aŭtamabil.
Šeŭrale źviedaŭ tolki kaśmietyčny ramont. U biełaruskim pradstaŭnictvie Chevrolet vyjavili žadańnie całkam adnavić aŭtamabil, kab jon moh jeździć. Adnak supracoŭniki muzieja nie pahadzilisia – u hetym vypadku jon pierastaŭ by być aryhinalnym muziejnym ekspanatam.
Supracoŭniki muzieja adznačajuć, što Kupała vielmi lubiŭ svoj aŭtamabil. Navat u Sajuz piśmieńnikaŭ Kupała prychodziŭ z knihami pa aŭtamabilnaj spravie, adnak pa nieviadomych pryčynach tak i nie sieŭ za rul.
