Alaksandr Łukašenka hatovy pryniać Kurmanbieka Bakijeva ŭ Biełarusi. Pra heta jon zajaviŭ u niadzielu, adkazvajučy na pytańni žurnalistaŭ.
«Kali Kurmanbiek Bakijeŭ pačuje mianie i pažadaje prylacieć da nas choć siońnia, choć zaŭtra, chavać my jaho ŭ Biełarusi nie budziem, jon budzie tut jak samy darahi na siońniašni dzień hość, jak moj kaleha, jak prezident Kyrhyzstana», – skazaŭ biełaruski lider.
Alaksandr Łukašenka jašče raz paćvierdziŭ, što kali «Prezidentu Kyrhyzstana ŭ hetuju ciažkuju chvilinu dla jaho siamji patrebnyja buduć padtrymka i dapamoha, to jana budzie akazana ŭ Biełarusi».
«My hatovyja pryniać jaho tut. Ja viedaju, što zaraz padymiecca skavytańnie va usich srodkach masavaj infarmacyi», – skazaŭ jon.
Prezident adznačyŭ, što heta jaho asabistaje rašeńnie jak kiraŭnika dziaržavy. «Ja maju prava na heta rašeńnie. Niachaj mianie asudžajuć, nie asudžajuć, ale zdradžvać ludziam – heta samaje haniebnaje, što moža być u hetym śviecie», – padkreśliŭ Alaksandr Łukašenka.
Biełaruski lider taksama dadaŭ, što kali Kurmanbiek Bakijeŭ, prylacieŭšy ŭ Minsk, zachoča pravieści pres-kanfierencyju, «to jon budzie svabodna jaje davać, svabodna havaryć». «I my potym pahladzim, chto ŭ nas bolš svabodnaja kraina: Biełaruś ci jakija-niebudź inšyja dziaržavy. Ja dumaju, jon šmat raskaža», – skazaŭ Łukašenka.