Dziaržsakratar ZŠA Chiłary Klintan zajaviła ab padtrymcy palityki ES, u pryvatnaści Jeŭraparłamienta, u dačynieńni da Biełarusi. Pra heta paśla sustrečy z Klintan staršynia Jeŭraparłamienta Ježy Buziek raskazaŭ žurnalistam 27 krasavika ŭ Vašynhtonie, paviedamlaje pres‑słužba kiraŭnika parłamienta Jeŭrasajuza.
Buziek adznačyŭ, što Klintan padtrymała ideju stvareńnia Jeŭraniesta — parłamienckaj asamblei Uschodniaha partniorstva, jakaja hruntujecca «na pavažańni ahulnych kaštoŭnaściaŭ».
Amierykanskija ŚMI paviedamlajuć, što kiraŭnik Jeŭraparłamienta byŭ «ździŭleny daśviedčanaściu Klintan ab situacyi ŭ Biełarusi».
Buziek zaklikaŭ da ŭmacavańnia suviaziaŭ pamiž kanhresam ZŠA i Jeŭraparłamientam, funkcyi jakoha pašyrylisia paśla nabyćcia mocy Lisabonskim pahadnieńniem.
Kiraŭnik Jeŭraparłamienta ŭkazaŭ na stanoŭčy vopyt pašyreńnia i stabilizacyi rehijonu, jaki prylahaje da ES. «Lepš nazalać, čym zabivać», — skazaŭ Buziek, kamientujučy pryjarytet dla ES pieramoŭ nad vykarystańniem siły.
Jak raniej paviedamlałasia, pasiadžeńnie Jeŭraniesta było adkładziena ŭ sakaviku na niapeŭny termin z‑za roznahałośsiaŭ adnosna składu biełaruskaj delehacyi.
Jeŭraparłamient nie padtrymlivaje adnosin z Nacyjanalnym schodam Biełarusi z 1996 hoda, kali nie byli pryznany demakratyčnymi vybary ŭ parłamient. Tamu Minsku było prapanavana sfarmiravać delehacyju ŭ Jeŭranieście ź piaci pradstaŭnikoŭ parłamienta i piaci pradstaŭnikoŭ apazicyi i hramadzianskaj supolnaści. Adnak biełaruskija ŭłady admovilisia.
Zaraz pytańniem składu biełaruskaj delehacyi Jeŭraparłamient zajmajecca sumiesna ź viarchoŭnym pradstaŭnikom ES Ketryn Eštan i jeŭrakamisaram pa pytańniach Jeŭrapiejskaj palityki dobrasusiedstva Štefanam Fiule.