Pra ŭdzieł niezaležnych vydańniaŭ u vystavie «ŚMI ŭ Biełarusi» raskazała dyrektarka Asacyjacyi vydaŭcoŭ rehijanalnaj presy «Abjadnanyja maśmiedyi» Alena Šostak.
Placoŭka niezaležnych ŚMI z rehijonaŭ. Fota «Salidarnaść».
Z 4 pa 7 maja ŭ Minsku ŭ prajšła štohadovaja vystava «ŚMI ŭ Biełarusi». Sioleta jana adbyvałasia čatyrnaccaty raz. I ci nie ŭpieršyniu na hetym forumie prysutničała pradstaŭničaja delehacyja niezaležnaj rehijanalnaj presy — Asacyjacyja vydaŭcoŭ rehijanalnaj presy «Abjadnanyja maśmiedyi» prezientavała na vystavie bolš za 20 vydańniaŭ. Pra «pieršy blin» raskazała vykanaŭčy dyrektar asacyjacyi Alena Šostak.
Mnohija z haściej vystavy, jaje ŭdzielnikaŭ, najpierš pradstaŭnikoŭ dziaržaŭnych vydańniaŭ, sioleta ŭpieršyniu daviedalisia pra fakt isnavańnia ŭ rehijonach takoj kolkaści niezaležnych haziet. «Mnohija navat nie viedali, što jość takija vydańni, jak «Hazieta Słonimskaja», ci «Intex-press» z Baranavičaŭ. I što hetyja haziety vychodziać dvaccacitysiačnymi nakładami, ale pry hetym samastojna vyrašajuć prablemy raspaŭsiudu», — kaža spadarynia Alena. Pa jaje słovach, svaje vydańni — bolš za dva dziesiatki — na vystavu prapanavali 14 rehijanalnych vydaŭcoŭ. Niezaležnyja haziety raźbirali, jak haračyja piražki. Tym nie mienš, kaža kiraŭnica asacyjacyi, naŭrad ci ŭdzieł u vystavie dapamoža niezaležnym vydańniam padvysić prodažy i znajści novych padpisčykaŭ. «Kali da nas i padychodzili z kankretnymi pytańniami i prapanovami, to, jak praviła, havorka išła pra rekłamu».
Raskazała Alena Šostak i pra ŭmovy ŭdziełu ŭ vystavie. Zajaŭku asacyjacyi arhanizatary «ŚMI ŭ Biełarusi» zadavolili ŭ dzień jaje padačy. Nijakich umoŭ nie vystaŭlałasia, nie spatrebiłasia i ŭzhadniać asartymient vydańniaŭ, što mierkavałasia prezientavać na vystavie.
Kvadratny mietr vystavačnaj płoščy abyšoŭsia ŭ 80 jeŭra, 85 jeŭra daviałosia zapłacić u jakaści ŭniosku, jaki ŭklučaŭ u siabie akredytacyju, uklučeńnie prezientacyjnych vydańniaŭ u ahulny katałoh vystavy i h.d. Jašče niekalki dziesiatkaŭ jeŭra kaštavała afarmleńnie paviljona.
Na nastupny hod Asacyjacyja płanuje taksama ŭdzielničać u forumie.
Asacyjacyja vydaŭcoŭ rehijanalnaj presy «Abjadnanyja maśmiedyi» była zarehistravanaja ŭ lipieni 2009 hodu. Uznačaliŭ arhanizacyju kiraŭnik vydavieckaha doma «Inteks-pres» Uładzimir Janukievič. U asacyjacyju «Abjadnanyja maśmiedyi» ŭvajšli vydaŭcy takich haziet, jak «Intex-Press» (Baranavičy), «Borisovskije novosti», «Hazieta Słonimskaja», «Hazieta dla vas» (Ivacevičy), «Infa-kurjer» (Słuck), «Inform-prohułka» (Łuniniec), «Volnaje Hłybokaje», «Briestskij kuŕjer», «Briestskaja hazieta», «Viečiernij Bobrujsk», «Bobrujskij kuŕjer», «Rehijanalnaja hazieta» (Maładziečna), «Hancavicki čas», «Niaśvižski čas». Bolšaść z hetych vydańniaŭ ad 2006 h. nie majuć dostupu da dziaržaŭnaj sistemy raspaŭsiudu.
