Supracoŭniki Łuŭra na ahulnym schodzie prahałasavali za praciah biesterminovaj zabastoŭki, jakaja pačałasia 15 śniežnia. Kiraŭnictva muzieja abviaściła pra častkovaje adnaŭleńnie pracy Łuŭra, jaki zastavaŭsia začynienym z paniadziełka, piša Bi-bi-si.
Ranicaj u sieradu sotni turystaŭ vystrailisia ŭ čarhu kala ŭvachodu ŭ Łuŭr. Adnak muziej, jaki z paniadziełka byŭ začynieny z-za zabastoŭki supracoŭnikaŭ, nie adčyniŭsia pavodle raskładu. Paźniej pres-sakratar muzieja paviedamiła, što Łuŭr častkova adnaŭlaje pracu 17 śniežnia.
«Muziej adkryty, ale niekatoryja adździeły niedastupnyja dla naviedvańnia z-za ramontu», — adznačyła pres-sakratar.
Na sajcie muzieja pradajucca bilety na dzionnaje i viačerniaje naviedvańnie Łuŭra 17 śniežnia. Značnaja častka załaŭ, jak vynikaje ź infarmacyi na sajcie muzieja, zastajecca začynienaj. Samy naviedvalny muziej u śviecie začyniŭ svaje dźviery dla naviedvalnikaŭ u paniadziełak paśla taho, jak supracoŭniki abviaścili zabastoŭku i pačali akcyju pratestu kala ŭvachodu ŭ muziej.
U paniadziełak pradstaŭniki Ministerstva kultury Francyi praviali pieramovy z prafsajuzami i prapanavali admianić zapłanavanaje skaračeńnie finansavańnia muzieja (raniej havorka išła pra skaračeńnie na 6,7 miljona dalaraŭ) u 2026 hodzie, pavialičyć kolkaść supracoŭnikaŭ achovy muzieja i nahladčykaŭ, a taksama pavysić zarobki piersanału.
Adnak pradstaŭniki prafsajuzaŭ zajavili, što prapanavanyja miery niedastatkovyja. U aŭtorak muziej byŭ začynieny, bo ŭ hety dzień u Łuŭry vychodny. U sieradu muziej nie adčyniŭsia pavodle raskładu. Sotni turystaŭ sabralisia ranicaj kala ŭvachodu ŭ Łuŭr u čakańni pačatku pracy muzieja.
«My pakul nie viedajem, ci adkryjemsia my. Prychodźcie paźniej», — kazali achoŭniki naviedvalnikam, jakija žadali trapić u muziej.
Turyst ź Ispanii raspavioŭ ahienctvu Reuters, što čakaje ŭžo hadzinu, adnak stavicca z razumieńniem da rašeńnia prafsajuzaŭ. «U mianie try dni ŭ Paryžy, ja vielmi chacieŭ by naviedać Łuŭr, ale kali heta niemahčyma, ja razumieju ich patrabavańni», — skazaŭ jon.
Try francuzskija prafsajuzy ŭ pačatku śniežnia abviaścili pra biesterminovuju zabastoŭku supracoŭnikaŭ Łuŭra z 15 śniežnia. Supracoŭniki muzieja pratestujuć suprać praktyki pierapracovak i patrabujuć palapšeńnia ŭmoŭ pracy.
Raniej prafsajuzy nakiravali ŭ Ministerstva kultury list, u jakim havaryłasia, što roznyja adździeły Łuŭra rehularna začyniajucca z-za «niedachopu piersanału, a taksama techničnych zbojaŭ i znošanaści budynka».
Akramia taho, u prafsajuzie adznačyli, što nahruzka na piersanał pastajanna raście, što niehatyŭna adbivajecca na psichałahičnym stanie supracoŭnikaŭ. U Łuŭry pracuje kala 2500 čałaviek. Pavodle infarmacyi, atrymanaj Le Monde, kali ŭ 2022 hodzie pa kansultacyju da psichołaha z pytańniaŭ, źviazanych z pracaj, źviartalisia ŭsiaho 37 razoŭ, to ŭ 2024 hodzie kolkaść supracoŭnikaŭ, jakija źviarnulisia pa psichałahičnuju dapamohu praz rost nahruzki, skłała 146 čałaviek.
Vinakurniu Lubanskaha ŭ Minsku zakryŭ sakretny hmach, dzie zaprajektavanyja kabiniety dla dopytaŭ i pamiaškańnie dla spalvańnia dakumientaŭ9
Vinakurniu Lubanskaha ŭ Minsku zakryŭ sakretny hmach, dzie zaprajektavanyja kabiniety dla dopytaŭ i pamiaškańnie dla spalvańnia dakumientaŭ
Biełarus-vachtavik na Jamale stvaraje pieśni na biełaruskaj movie z dapamohaj ŠI. «Raniej muzyka była zakrytym kłubam. Niejrasietki adčynili hetyja dźviery z nahi»1919
Kamientary