Abviaścili naminantaŭ na sioletniaha «Oskara». U filma «Hrešniki» 16 naminacyj

Na premiju «Oskar» za «Najlepšy film» pretendujuć: «Buhonija», F1, «Frankienštejn», «Hamniet», «Marci Cudoŭny», «Bitva za bitvaj», «Sakretny ahient», «Sientymientalnaja kaštoŭnaść», «Hrešniki» i «Sny ciahnikoŭ».

U naminacyi «Najlepšy režysior» uvajšli Chłoja Čžaa («Hamniet»), Džoš Sefdzi («Marci Cudoŭny»), Poł Tomas Andersan («Bitva za bitvaj»), Jaakim Tryjer («Sientymientalnaja kaštoŭnaść»), Rajan Kuhler («Hrešniki»).

Režysior «Bitvy za bitvaj» Poł Tomas Andersan naminavany na premiju «Oskar» užo 12‑y raz, ale raniej jamu nie ŭdałosia atrymać zapavietnuju statuetku.

«Oskar» za najlepšuju mužčynskuju rolu pieršaha płana mohuć atrymać: Cimaci Šałamie («Marci Cudoŭny»), Leanarda Dy Kaprya («Bitva za bitvaj»), Itan Choŭk («Błakitny Miesiac»), Majkł B. Džordan («Hrešniki»), Vahnier Moŭra («Sakretny ahient»).

U naminacyi «Najlepšaja aktrysa» buduć zmahacca: Džesi Bekli («Hamniet»), Roŭz Birn («Ja b ciabie šturchnuła b, kali b mahła»), Kiejt Chadsan («Miełodyja ich mary»), Renate Reinśvie («Sientymientalnaja kaštoŭnaść»), Ema Stoŭn («Buhonija»).

Siarod pretendentaŭ na zvańnie «Najlepšaha aktora druhoha płana» — Benisia Del Tora («Bitva za bitvaj»), Džejkab Ełardzi («Frankienštejn»), Dełroj Linda («Hrešniki»), Šon Pen («Bitva za bitvaj»), Stełan Skarshard («Sientymientalnaja kaštoŭnaść»).

Poł Mieskał nie trapiŭ u naminacyju «Najlepšy aktor druhoha płana», niahledziačy na toje, što ličyŭsia adnym z hałoŭnych pretendentaŭ za rolu ŭ filmie «Hamniet».

U naminacyi «Najlepšaja aktrysa druhoha płana» ŭ šort-list uvajšli: El Faninh («Sientymientalnaja kaštoŭnaść»), Inha Ibsdoter Lileas («Sientymientalnaja kaštoŭnaść»), Emi Medyhan («Zbroja»), Vunmi Masaku («Hrešniki»), Tyjana Tejłor («Bitva za bitvaj»).

U hetym hodzie Akademija ŭpieršyniu pradstaviła novuju naminacyju — «Najlepšy kastynh». U joj naminavanyja filmy: «Hamniet», «Marci Cudoŭny», «Bitva za bitvaj», «Sakretny ahient» i «Hrešniki». Z 2028 hoda ŭ «Oskara» źjavicca jašče adna naminacyja za najlepšuju pastanoŭku trukaŭ.

Cyrymonija ŭručeńnia premii «Oskar» adbudziecca 15 sakavika, vieści jaje znoŭ budzie amierykanski komik Konan O'Brajen.

U hetym hodzie Amierykanskaja kinaakademija ŭviała novyja praviły hałasavańnia. Členy žury, jakija hałasujuć u toj ci inšaj naminacyi, pavinny byli abaviazkova pahladzieć usie pradstaŭlenyja ŭ joj filmy na stryminhavym servisie arhanizacyi albo zapoŭnić formu z padrabiaznaściami pra naviedany kinaprahlad.

U minułym tych, chto hałasuje, zaŭsiody prasili nie rabić hetaha, kali jany nie pahladzieli ŭsie raboty naminantaŭ, ale hety praces hruntavaŭsia vyklučna na sumlennaści.

Pavodle zadumy arhanizataraŭ, takija miery pavinny źmienšyć kolkaść vypadkaŭ, kali čalcy žury hałasujuć, aryjentujučysia nie na sami raboty, a na ahulny šum vakoł ich.

• 1
• 0
• 0
• 0
• 0
• 0
• 0
• 0