Staršynia Jeŭrapiejskaha parłamienta Ježy Buzek u zajavie ad 19 maja zaklikaŭ biełaruskija ŭłady «nieadkładna spynić represii i pieraśled struktur hramadzianskaj supolnaści i viarnucca na šlach demakratyzacyi». Jak paviedamlaje
Buzek vykazaŭ «surjoznuju zaniepakojenaść paharšeńniem situacyi z pravami čałavieka ŭ Biełarusi» ŭ suviazi z «apošnimi paviedamleńniami pra represii i pieraśled struktur hramadzianskaj supolnaści».
«My nie bačym palapšeńniaŭ [u śfiery pravoŭ čałavieka], ale vyrazny rehres, i heta vielmi niepakoić mianie», — havorycca ŭ zajavie Buzka.
Kiraŭnik Jeŭraparłamienta vykazaŭ rasčaravańnie chodam kampanii pa vybarach u miascovyja saviety, jakaja «nie pakazała bačnych palapšeńniaŭ u halinie prazrystaści i vykanańnia demakratyčnych standartaŭ». Jon taksama adznačyŭ uzmacnieńnie nacisku na niezaležnyja ŚMI i dva vyniesienyja niadaŭna śmiarotnyja prysudy.
Buzek padkreśliŭ, što ŭ asnovie dyjałohu ES i Biełarusi lažyć šerah umoŭ, siarod jakich — «realny prahres u halinie demakratyi i vyraznyja sihnały pra pavažańnie pravoŭ čałavieka». Palityk nahadaŭ, što prypynieńnie sankcyj u dačynieńni da biełaruskich čynoŭnikaŭ budzie pierahledžana vosieńniu 2010 hoda.
Raniej u intervju BiełaPAN Rozmary Tomas, pasoł Vialikabrytanii, jakaja ŭ Biełarusi pradstaŭlaje staršyniu ES Ispaniju, vykazała zaniepakojenaść masavymi vobyskami, praviedzienymi 18 maja ŭ aktyvistaŭ kampanii «Havary praŭdu!».
Tomas nie vyklučyła, što vobyski źjaŭlajucca «sprobaj zadušyć niezaležnaje mierkavańnie i dziejnaść» i mohuć być źviazany z budučaj kampanijaj pa vybarach prezidenta.
Pavodle słoŭ Tomas, dypmisija ŭvažliva sočyć za raźvićciom situacyi. «U ES vyvučajuć abstaviny i padtekst vobyskaŭ, kab razhledzieć mahčymaść na ich adreahavać», — skazała brytanski pasoł.
18 maja prajšli vobyski ŭ minskim ofisie hramadzianskaj kampanii «Havary praŭdu!», u kvaterach jaje aktyvistaŭ, a taksama ŭ pradstaŭnikoŭ demakratyčnych sił u Homieli, Breście, Hrodnie, Mahilovie, Babrujsku, Słonimie, Barysavie, Vaŭkavysku i inšych haradach Biełarusi.
Lider kampanii «Havary praŭdu!» Uładzimir Niaklajeŭ i dva jaje aktyvisty Siarhiej Vaźniak i Andrej Dźmitryjeŭ źmieščany pad vartu i znachodziacca ŭ staličnym Centry izalacyi pravaparušalnikaŭ. Pavodle nieaficyjnaj infarmacyi, jany prachodziać padazronymi pa spravie, raspačataj na padstavie artykuła 250 Kryminalnaha kodeksa (raspaŭsiudžvańnie zaviedama niepraŭdzivaj infarmacyi ab tavarach i pasłuhach).
Pry praviadzieńni vobyskaŭ pradstaŭniki pravaachoŭnych orhanaŭ paviedamlali hramadzianskim aktyvistam roznyja viersii: adny śćviardžali, što sprava raspačata pa fakcie paklopu, inšyja — u suviazi ź niezakonnym nabyćciom techniki. Nazyvałasia taksama č. 1 art. 250 KK (raspaŭsiudžvańnie niepraŭdzivaj infarmacyi ab tavarach i pasłuhach).
U MUS i KDB kamientavać situacyju admaŭlajucca.
