Na Alimpijadzie ŭ Miłanie vystupajuć maci i syn — upieršyniu ŭ historyi! Dla jaje heta ŭžo siomyja hulni

Tolki ŭdumajciesia — Sara Šlepier haniała jašče ŭ Nahana-1998! Na pieršyja čatyry Alimpijady (da Vankuviera-2010 uklučna) Šlepier jeździła ŭ składzie zbornaj ZŠA, piša sports.ru.

Biez asablivych pośpiechaŭ — najlepšym vynikam było 10‑ie miesca ŭ słałamie Turyna-2006. Na Kubku śvietu ŭ jaje čatyry podyumy, ale ŭsim užo daloka za 20 hadoŭ. Hałoŭny pośpiech — pieramoha ŭ słałamie na etapie Kubka śvietu ŭ Lencerchajdzie ŭ 2005-m.

Pavialičyć

U 2011‑m Sara zaviaršyła karjeru — padčas finalnaha Kubka śvietu skaciłasia pa schile ŭ sukiency, dy jašče i pryciskajučy da siabie trochhadovaha Łase. Na finišy jaje z abdymkami sustreła Lindsi Von, a arhanizatary etapu padaryli vielizarny bukiet ruž.

Ale ŭžo praz try hady Šlepier vyrašyła viarnucca. Tolki ŭžo pad inšym ściaham — jana vyjšła zamuž za mieksikanca i źmianiła hramadzianstva. Z-za hetaha pierapynku harnałyžnica prapuściła Sočy — 2014‑inakš u jaje prafajle ŭžo było b 8 alimpijad.

Na Hulniach-2026 Sara praniesła ściah Mieksiki na cyrymonii adkryćcia i vystupiła ŭ supierhihancie, pryčym pakazała tam najlepšy dla siabie vynik za apošnija try Alimpijady — 26‑ie miesca.

Praŭda, heta tamu, što 17 spartsmienak nie dabralisia da finišu, a tak Šlepier pryjechała apošniaj.

Ale nie ŭpała ŭ takich umovach — užo narmalna. U Miłanie Šlepier pabiła dva rekordy: pieršaja harnałyžnica, jakaja vystupiła na siami alimpijadach, i samaja ŭzrostavaja z tych, chto vychodziŭ na start.

Pavialičyć

14 lutaha ŭ hihanckim słałamie debiutavaŭ jaje syn Łase, jon taksama vystupaje za Mieksiku. Tak, toj samy, jakoha jana trymała na rukach u «finalnaj» honcy ŭ 2011-m.

Takim čynam Sara i Łase stali pieršaj paraj maci-syn, jakija vystupili na adnoj zimovaj Alimpijadzie.

Na Kubku śvietu Łase jašče nie kataŭsia — tolki pa turnirach FIS i studenckich spabornictvach, dy i tam nie bliskaŭ. Tak što vysoka jaho nie čakajem, ale źjeździć na hulni z mamaj — heta niešta samo pa sabie ŭnikalnaje.

Zrešty, u Miłanie Sara i Łase asabliva nie pierasiakajucca: mužčyny spaborničajuć u Bormia, žančyny — u Karcinie.

Šlepier bačyć u hetym jak prablemu, tak i plus: «Heta składana bo my vystupajem u roznych łakacyjach. Ź inšaha boku, dobra, što jon moža atrymać ułasny alimpijski dośvied zamiest taho, kab vysłuchoŭvać ad mianie: «Ty pavinien rabić tak i tak». Ja ž zaŭsiody imknusia zavalić jaho paradami. Niemahčyma pierastać być mamaj i pieratvarycca prosta ŭ tavaryša pa kamandzie, tak što ja zbolšaha zadavolenaja, što jon nie pobač.

Łase ciapier u tym ža ŭzroście, u jakim była ja ŭ Nahana-1998. Ja vielmi im hanarusia. Jon małady, ale hety vopyt dapamoža jamu vyraści i zrazumieć, nakolki važny hety turnir». U samoha Łase padobnyja pačućci: «U niejkaj stupieni ja ščaślivy, što my nie pobač, tamu što jaje prysutnaść — asobny cisk dla mianie. Ale časam mnie chočacca, kab jana była sa mnoj, kab my mahli padzialić hety vopyt. Ale adna dumka pra jaje na Hulniach mianie krychu supakojvaje. Mama navučyła mianie ŭsiamu, što ja ŭmieju ŭ hornych łyžach. Jana była sa mnoj na praciahu ŭsioj karjery».

19 lutaha Sary spoŭnicca 47, ale jana ŭžo zadumvajecca pra vośmuju Alimpijadu ŭ 2030-m: «Dumaju, majo cieła spravicca. Mnie zdajecca, supierhihant, nie ličačy faktaru strachu, samaja lohkaja dla mianie dyscyplina.

Ale, kali ščyra, dla mianie kudy važniej dać šaniec maładym mieksikanskim spartsmienam. Tak što kali na Hulni adbiarecca chtości maładziejšy za mianie, navat kali ja budu chutčej, to sastuplu miesca. Heta važniej, čym rekord. Ale kali takich nie budzie — ja pajedu».

• 13
• 0
• 0
• 1
• 0
• 0
• 0
• 1