Čarhovaje niadaŭniaje padaražańnie bienzinu aburyła mnohich biełaruskich aŭtaamataraŭ. Za niapoŭnyja piać miesiacaŭ, jakija prajšli z pačatku hoda, ceny na haručaje ŭ Biełarusi pavyšalisia try razy i vyraśli ŭžo na 15%. Aŭtamabilisty taksama havorać ab tym, što ź siaredziny 2004 hoda ceny na bienzin vyraśli ŭ dva, a na dyzielnaje paliva — u dva z pałovaj razy.
W vyniku siarod naviedvalnikaŭ sajtaŭ «Aŭtamalinaŭka», stop‑gai.by i niekatorych inšych naradziłasia ideja pratestnaj akcyi «Stop bienzin!». Inicyjatary akcyi zaklikajuć nieabyjakavych vadzicielaŭ 1—4 červienia abmiežavać svajo pieramiaščeńnie na aŭto i ihnaravać niekatoryja aŭtazapravačnyja stancyi.
BiełaPAN sustreŭsia z adnym z aktyvistaŭ hetaj kampanii Kanstancinam Michajłavym.
«My čakali, — raskazvaje Kanstancin, — što prychod vieniesuelskaj nafty pakinie ceny na paliva na raniejšym uzroŭni. Adnak padaražańnie adbyłosia, što vyklikała buru emocyj z boku aŭtamabilistaŭ. Tamu my vyrašyli nie maŭčać, abjavili hramadzianskuju inicyjatyvu «My — nie dojnyja karovy». Matyvujem my hetu akcyju tym, što z Rasii da nas idzie biaspošlinnaja nafta, pryznačanaja dla prodažu na našym unutranym rynku zusim nie pa tych cenach, pa jakich nam prychodzicca jaje kuplać.
My zaklikajem usich nieabyjakavych z 1 pa 4 červienia praihnaravać zapraŭki kancerna «Biełnaftachim», a zapraŭlacca na stancyjach ASTA, «Słavniefť», «Junajted kompani». My nie chočam nanieści nikomu nijakaha ekanamičnaha ŭronu, ale chočam pakazać, što my adzinyja, salidarnyja i nie staniem maŭčać, bo my raźbirajemsia ŭ cenach. Akramia taho, nas chvalujuć usie prablemy, jakija jość u našaj dziaržavie».
Michajłaŭ ličyć, što nieabyjakavych da pavyšeńnia cen na transpartnyja pasłuhi ŭ krainie prosta niama, bo «śledam za cenami na bienzin padnialisia ceny na miasa i małako, zatym na prajezd u maršrutnym taksi, a zaŭtra moža padaražeć prajezd u astatnim haradskim hramadskim transparcie».
Pavodle słoŭ udzielnika akcyi, jaje arhanizatary nie adčuvajuć nijakaha nacisku z boku ŭład. «Dziaržava maŭčyć, i nas heta nie raduje, — adznačyŭ jon. — My ŭsio ž čakajem ad jaje niejkaj reakcyi. My, aŭtaamatary, vielmi chacieli b atrymać adkazy na svaje pytańni. Kali reakcyi nie budzie i paśla praviadzieńnia akcyi, mahčyma, budziem pisać skarhi, kab na nas źviarnuli ŭvahu, bajkatavać zapraŭki «Biełnaftachima».
